Ձեր վստահելի աղբյուրը

Արցախը Հայաստանին ու աշխարհին կապող միակ ճանապարհը փակելով՝ Ադրբեջանը փորձում է կաթվածահար անել Արցախը։ Երևանում ասուլիսի ժամանակ ասաց Արցախի Հանրապետության արտաքին գործերի նախարարի պաշտոնակատար Դավիթ Բաբայանը։

Նշենք, որ նա Ֆրանսիայից է վերադաձել և ճանապարհը փակ լինելու պատճառով չի կարողացել գնալ Արցախ։

«Արցախը շարունակում է  մարտնչել և շարունակելու է։ Մենք բոլորս հիմա պետք է միասնական ճակատով հանդես գանք։

Ողջ հայությանը կոչ եմ անեմ, որպեսզի միասնական ջանքերով մեր ձայնը լսելի դարձնենք միջազգային տարբեր ատյաններում։

Միջազգային հանրությանն էլ կոչ ենք անում քայլեր ձեռնարկել և զսպել Ադրբեջանի հայատյանց, մարդատյաց,  ցեղասպան քաղաքականության դրսևորումը և ամեն ինչ անեն, որ ճանապարհը բացվի»,- ասաց Բաբայանը։

Ասուլիսին ներկա են նաև ԱՀ Մարդու իրավունքների պաշտպան Գեղամ Ստեփանյանը, Պետնախարարի խորհրդական Արտակ Բեգլարյանը։ Նրանք Հայասանում էին «Ընդդեմ ցեղասպանության հանցագործության» 4-րդ գլոբալ ֆորումին մասնակցելու համար և ճանապարհի փակ լինելու պատճառով չեն կարողանում վերադառնալ Արցախ։

Գեղամ Ստեփանյանը միջազգային դերակատարներին, միջազգային իրավապաշտպան, միջկառավարական կազմակերպությունների ուշադրությունը հրավիրեց  կարևոր հանգամանքի վրա՝ փաստացի այս պահի դրությամբ Արցախում 120 հազար մարդ գտնվում է  շրջափակման մեջ։

Նա ընդգծեց, որ Արցախը նաև օդային հաղորդակցություն չունի աշխարհի որևէ կետի հետ։

«Մարդու իրավունքների մասին  միջազգային իրավունքը հստակ ամրագրում է, որ որևէ վայրկյան չպետք է  խաթարվի կենսաապահովման համար անհրաժեշտ  պայմանները, իսկ  մենք  տեսնում ենք, որ արդեն 24 ժամ շարունակ խաթարված է  Արցախում ապրող մարդու  ամենատարրական իրավունքը, և դա իրականացվում է Ադրբեջանի իշխանությունների  կողմից և անձամբ Ադրբեջանի նախագահի ուղղորդմամբ ու նրա հրահանգներով։ Այն թեզեր, որոնք շրջանառվում են իբրև բնապահպանական հարցեր և այլն,  ամբողջությամբ կեղծ են  և կան տեղեկատվություն, որ այդ ճանապարհը փակողները  հիմնականում ադրբեջանական իշխանությունների կողմից ուղղորդվողներն են, այդ թվում նաև  հատուկ ծառայությունների ներկայացուցիչներ»,- ասաց Գ. Ստեփանյանը։

Նա նշեց, որ 24 ժամից ավելի  դադարեցված է սննդամթերքի, էներգակիրների, դեղորայքի և այլ  անհրաժեշտ պարագաների մատակարարումն ամբողջ Արցախի տարածքում։

«Մարդու իրավունքների պաշտպանի հաստատությունն ահազանգեր է ստանում, որ  բժշկական հաստատություններում առկա  դեղորայքային պաշարները մի քանի օրվա կբավարարեն, նման ձևով շարունակվելու դեպքում այս հարցում կանգնելու ենք շատ լուրջ խնդրի առաջ։

Միևնույնը վերաբերում է  նաև սննդամթերքի ու էներգակիրների, խոսքը դիզվառելիքի մասին է,  մատակարարումներին»,- ասաց ԱՀ Մարդու իրավունքների պաշտպանը։

Նա տեղեկացրեց, որ 1100 մարդ  ձմռան այս ցուրտ պայմաններում մնացել է ճանապարհներին, այդ թվում 270 երեխա, ովքեր զրկվել են իրենց ընտանքիներին միանալու հնարավորությունից։

«Սա Ադրբեջանի կողմից իրականացվող էթնիկ զտման, ցեղասպանական քաղաքականության հերթական բաղադրիչն է։

Այն իրականացվում է  հետողականորեն և համակարգված կերպով։ Դրանք հատուկենտ  դեպքեր չեն, այլ 2020 թվականի նոյեմբերի 9-ից հետո  հաստատված հրադադարի դիտավորյալ խախտումներ և ձեռք բերված պայմանավորվածությունների դիտավորյալ խաթարումներ»,- ասաց Գեղամ Ստեփանյանը։