Ձեր վստահելի աղբյուրը

Ստեփանակերտի Հանրապետական բժշկական կենտրոնում հինգ հիվանդ կա, որոնց պետք է շտապ տեղափոխել Երևան՝ բուժհետազոտության, բուժման նպատակներով։

Այս մասին Panorama.am-ի հետ զրույցում հայտնեց կենտրոնի գործադիր տնօրեն Մհեր Մուսայելյանը։

«Նրանցից երեքին անհապաղ պետք է տեղափոխել Հայաստանի մայրաքաղաք։ Նրանցից երկուսը գտնվում են վերակենդանացման բաժանմունքում, նրացից մեկի վիճակը ծայրահեղ ծանր է, մյուս երկուսի վիճակն էլ  ծան են, կայունացվել է, բայց կարիք ունեն տեղափոխման»,-ասաց Մուսայելյանը։

Հիվանդներից մեկին արհեստական շնչառության սարք է միացված, ունի սուր բրոնխիալ ասթմա, թոքաբորբ, թթվածնային անբավարարություն։

Նրա խոսքով, մյուս հիվանդը՝ 60-ն անց հետազոտություններից հետո այսօր պետք է սրտի վիրահատության ենթարկվեր «Նորք-Մարաշ» բժշկական կենտրոնում։

«Ամեն բան պատրաստ է, պայմանավորվածությունը կա վիրահատության, բայց ճանապարհը փակ է»,-ասաց նա։

ԲԿ տնօրենի խոսքով, այս պահին բժշկական կենտրոնը դեղորայքի ու բժշկական միջոցների պակաս չունի, սակայն եթե այս իրավիճակը երկար շարունակվի, ապա լուրջ խնդիր է առաջանալու։

_{Լուսանկարում Ստեփանակերտի բժշկական կենտրոնում գտնվող ու Երևան տեղափոխվելու կարիք ունեցող հիվանդներից մեկն է։}