Ձեր վստահելի աղբյուրը

«Արդեն ավելի քան 29 ժամ  Արցախն ամբողջությամբ շրջափակման մեջ է, արդեն իսկ սկսվել է  այդ տոտալ շրջափակումը։ Սա փաստ է։ Դա կլինի՞ նախաբան ավելի  լայնածավալ գործողութունների համար։ Ինչ որ կերպ դա կախված է միջազգային հանրության  համապատասխան արձագանքից»,- Երևանում ասուլիսի ժամանակ ասաց Արցախի Հանրապետության արտաքին գործերի նախարարի պաշտոնակատար Դավիթ Բաբայանը։

Ըստ նրա, եթե չլինի արձագանք, որևէ շահագրգռվածություն, Արցախի ժողովրդի նկատմամբ կարեկցանք, լինի անտարբերություն, իհարկե, սա կարող է բերել նորանոր զարգացումների, եթե հիմա չէ, ապա մի քիչ ավելի ուշ կամ հաջորդ անգամ։

Բաբայանն ընդգծեց՝ անպատժելիությունը խթանում է ագրեսիան։

«Իհարկե, երբ որ ադրբեջանցիները տեսնում են անպատժելիություն, միջազգային հանրության որոշ անդամների կողմից խրախուսում, օրինակ, նույն Թուրքիայի կողմից, բնական է, Ադրբեջանն ավելի համարձակ է դառնում, դիմում է  այսպիսի սարսափելի քայլերի. փաստորեն 21-րդ դարում սովամահի առջև կանգնեցնում մի ողջ ժողովրդի»,- ասաց Արցախի ԱԳ նախարարի պաշտոնակատարը։

Նա կարծում է, որ եթե աշխարհով մեկ լինի կոշտ արձագանք, դա իր ազդեցությունը կունենա, ճիշտ է՝ ոչ 100 տոկոս կազդի, բայց ազդեցություն կունենա։

Ինչ վերաբերում է  ռուս խաղաղապահների  կողմից ռազմական ճանապարհով ճանապարհը բացելու հնարավորությանը, Դավիթ Բաբայանն ասաց. «Առաջարկել ենք, որ անհրաժեշտ է նախ և առաջ ավելացնել խաղաղապահների թվաքանակը։ 1980 հոգի՝ շփման գծի ամբողջ երկայնքով կամ մոտակայքում տեղակայված, քիչ թիվ է։ Ադրբեջանական, այսպես կոչված թատերական այս ներխուժման դեմ կանգնած էին ընդամենը 1-2 խաղաղապահ զինվոր։

Երկրորդ,  մենք առաջարկել ենք, որպեսզի ռուս խաղաղապահները ստանան միջազգային մանդատ։ Ցանկալի էր հենց ՄԱԿ Անվտանգության խորհրդի կողմից։ Դա հնարավորություն կտար միջազգային լեգիտիմություն և հնարավորություն կանխելու նման պրովակացիաները, քանի որ այդ ուժերը խաղաղապահներ են,  նրանք չեն պարտադրում խաղաղություն, ինչպես եղել է  Կոսովոյում, այլ տեղեր։

Ստանալով միջազգային մանդատ՝ արդեն որոշ նոր որակներ կհաղորդվեր այդ առաքելությունը և միգուցե իրավիճակն ավելի կայուն կլիներ»։

Նա նշեց, որ, իսկապես, առանց ռուս խաղաղապահ առաքելության, չկա Արցախի անվտանգություն։ 

Հարցին՝ այս իրավիճակում ռուս խաղաղապահներն ունե՞ն ճանապարհը բացելու մանդատ, Դ. Բաբայանն ասաց. «Ռուս խաղաղապահները խաղաղապահներ են, պատժիչ բաղադրիչը չունի։

Կանգնած են 2-3 խաղաղապահ, որոնց առկայությունն այնտեղ արդեն կայունության մի գրավական է եթե կողմերը հետևում են քաղաքակիրթ նորմերին։ Եթե կողմերից մեկի պետական քաղաքականության հիմքում ահաբեկչությունն ու ատելություն է, նույն խաղաղապահները հայտնվում են ծանր վիճակում։ Այդ ճանապարհն անցնում է ամբողջությամբ Ադրբեջանի օկուպացրած տարածքում։  Կան մի քանի ռուս խաղաղապահ։ Գալիս է մի ամբոխ՝  կանանցով, երեխաներով, ներխուժում են այդ տարածք։ Ի՞նչ պետք է անեն։ Դրա համար ենք ասում՝ մանդատը երկարաձգվի,  քանակը շատանա և ստանան միջազգային հանրության կողմից համապատասխան լիազորություններ»։

Նա ընդգծեց, որ ռուս խաղաղապահները ուժի կիրառման լիազորություններ չունեն։