Ձեր վստահելի աղբյուրը

Այսօր Ազատության հրապարակում բողոքի ակցիա էին կազմակերպել արցախցի երիտասարդները, որոնց միացել էին Հադրութից, Շուշիից և Արցախի այլ շրջաններից բռնագաղթած արցախցիները և Հայաստանի քաղաքացիները։ Ակցիայի մասնակիցները իրենց բողոքի ձայն էին բարձրացրել՝ ադրբեջանցիների կողմից  Բերձորի միջանցքն արդեն երկրորդ օրը փակ պահելու փաստի կապակցությամբ։

«Արցախում է գտնվում իմ ընտանիքը՝ ծնողներս, քույրերս և եղբայրներս։ Այս պահին ամբողջ Արցախը գտնվում է  շրջափակման մեջ։ Արտաքին աշխարհի հետ կապող միակ ուղին այսօր փակ է և փաստորեն կյանքի սպառնալիքի տակ են գտնվում բոլորը։Այս պահին այն իրավիճակն է, որ գոներ պարենամթերք և առաջին անհրաժեշտության դեղամիջոցները չեն կարողանում հասցնել Արցախ։ Այն հիվանանդերը, որոնք ծայրահեղ ծանր վիճակում են գտնվում և պետք է տեղափոխվեն Հայաստան, որովհետև այնտեղ բուժման համապատասխան հնարավորություններ չկան, չեն կարողանում տեղափոխել։ Այսինքը՝ հնարավոր է տասնյակ մարդիկ մահանան զուտ այն պատճառով, որ ճանապարհը փակ է։

Այսօրվա մեր ակցիայի նպատակն այն է, որ գոնե մի ձևով մեր ձայն միջազգային հանրության հասցնենք, որովհետև հնարավոր չէ որ ժողովրդին անտեսեն»,-ասում է ԵՊՀ միջազգային հարաբերությունների ֆակուլտետի ուսանող, արցախցի Տիգրան Աղաջանյանը։