Ձեր վստահելի աղբյուրը

«Մենք ՄԱԿ-ի գրասենյակին տեղեկացրել ենք Արցախում ստեղծված վիճակը և այս իրավիճակում որևէ արձագանք չստանալ կառույցից, որը մարդու իրավունքների պաշտպան առաջնային կազմակերպությունն է, ցավալի է»,-ՄԱԿ-ի գրասենյակի դիմաց «Համախմբում» նախաձեռնության կազմակերպած բողոքի ակցիայի ժամանակ հայտնեց Արցախի Հանրապետության ՄԻՊ Գեղամ Ստեփանյանը:

Նա հայտարարեց, որ չեն սպասում ՄԱԿ-ի ինչ-որ կոչի, չնայած դրանք նույնպես կարևոր են, այլ ակնկալում են կոնկրետ գործողություններ:

«Կա պնդում, որ Արցախի ժողովրդի կյանքի երաշխավորման համար ՄԱԿ-ը պետք է միջազգային գործիքակազմ կիրառի, լինի խաղաղապահներին միջազգային մանդատի տրամադրում, ՄԱԿ-ի տարբեր գրասենյակների և  գործակալությունների բացում Ստեփանակերտում, կամ՝ այլ»,-ասաց Ստեփանյանը և հավելեց. «Երկրագնդի վրա կա մի հատված, որը կոչվում է Լեռնային Ղարաբաղ, որում ապրում են մարդիկ, այդ մարդիկ ունեն իրավունքներ և միաջազգային հանրությունը պարտավոր է ապահովել այդ իրավունքների իրացումը»:

Նա հայտնեց, որ իր ղեկավարած գրասենյակի հավաքագրած տվյալները տրամադրվում են ՀՀ ՄԻՊ գրասենյակին, որի միջոցով էլ դրանք փոխանցվում են տարբեր երկրների դեսպանատներին և միաջացգային կառույցներին:

Գեղամ Ստեփանյանը հավաստիացրեց, որ իր կառույցի պատրաստած զեկույցները հասնում են եվրոպական համապատասխան գրասենյակներ և իր անձնական հանդիպումների ժամանակ, երբ արտասահմանյան գործընկերներին հարցրել է, թե ինչու միջոցներ չեն ձեռնարկում, իրեն պատասխանել են, որ պետք է պահպանեն անկողմանակալ դիրքորոշում:

«Դե պահպանեք անկողմնակալ դիրքորոշում, քանի մարդիկ այնտեղ սպանվում են : Անկողմակալությունն է կարևոր, թե՝ ճշմարտությունն ասելը»,-հայտարարեց Արցախի Մարդու իրավունքների պաշտպանը:

Նա գտնում է, որ վիճակի պատասխանատուն եռակողմ հայտարարությունը ստորագրած պետություններն են, որոնք երաշխավորել են արցախցիների անվտանգությունը, բայց մեղավոր են նաև միջազգային բոլոր կառույցները, որոնք պարտավորված են պաշտպանել մարդու իրավունքները:

«Երբ Կոսովոյի դեպքում միջազգային մեխանիզմենր են կիրառվում, ապա այն պետք է արվի նաև Արցախի դեպքում»,-ասաց Գեղամ Ստեփանյանը և միջազգային կառույցներին հորդորեց չառաջնորդվել տնտեսական շահերով, այլ՝ մարդու իրավունքներով: