Ձեր վստահելի աղբյուրը

Երրորդ օրն է՝ Գորիս-Ստեփանակերտ ճանապարհն արգելափակված է ադրբեջանցի «բնապահպանների» կողմից։ Երեկվանից բողոքի ակցիաներ են տեղի ունենում մայրաքաղաք Երևանում՝ ի պաշտպանություն Արցախի։

Այսօր ՄԱԿ-ի գրասենյակի մոտ իրեն բողոքի ակցիան էր անցկացնում «Համախմբում» նախաձեռնությունը։

«Համախմբում» շարժման անդամ, հասարակական-քաղաքական գործիչ Ավետիք Չալաբյանը նշեց, որ ՄԱԿ-ի անմիջական պարտավորությունների մեջ է մտնում էթնիկ զտումների և ցեղասպանության կանխարգելումը, մարդու իրավունքների պաշտպանությունը և այլն։ 

Նա նամակ հանձնեց ՄԱԿ-ի գրասենյակին՝ հույս հայտնելով, որ դրա պատճեները օպերատիվ ռեժիմով կհասցնեն համապատասխան հասցեատերերին։

«Այն, ինչ կատարվում է Արցախում, տեղի է ունենում ՄԱԿ-ի անմիջական իրավասության գոտում։ ՄԱԿ-ի խնդիրն է կանխարգելել պատերազմը, ցեղասպանությունը, մարդու հիմնարար իրավունքների կոպիտ խախտումները և այլն։ Հուսով եմ՝ այս կառույցը, որն աշխատում է ՀՀ տարածքում, իր անմիջական լիազորությունները կօգտագործի»,- ասաց Ավետիք Չալաբյանը։

Նա նշեց, որ Ադրբեջանի ղեկավարությունը չի թաքցնում իր նպատակը, պարբերաբար հայտարարում է՝ Արցախ չկա, Արցախի հարց չկա, իսկ այնտեղ բնակվող մարդիկ իմ քաղաքացիներն են և նրանց հարցերը կլուծեն։ «Այսինքն՝ վերացնել Արցախը որպես սուբյեկտ։ Ցավոք, Ադրբեջանի ղեկավարությանն այդ հարցում աջակցում է նաև ՀՀ գործող իշխանությունը, որն, օրինակ, խուսափում է Արցախի Հանրապետություն, Արցախի ժողովրդի ինքնորոշման իրավունք տերմինի կիրառումից»,- ընգդծեց նա։

Նրա խոսքով՝ նոյեմբերի 9-ի փաստաթղթի տակ դրված է գործող իշխանության ղեկավարի՝ Նիկոլ Փաշինյանի ստորագրությունը, այսինքն՝ Արցախի շուրջը ձևավորված ստատուս քվոյի երեք ստորագրող կողմերից մեկն էլ Հայաստանն է։

«Դա նշանակում է, որ Հայաստանն ունի նույն չափով պատասխանատվություն, ինչ մյուսները։ Ուստի կարծում եմ, որ դա փարիսեցիություն է՝ պնդել, թե մենք պատասխանատվություն չունենք։ Այլապես մենք այդ փաստաթուղթն ինչու էինք ստորագրում»,- նշեց նա։

Ըստ Չալաբյանի՝ դժբախտաբար ունենք ծայրահեղ ցինիկ իշխանություն, որն, անհասկանալի կերպով, ուզում է մեր ժողովրդի վզին փաթաթել մի դոկտրին, որ Արցախը կարող է լինել Ադրբեջանի կազմում։ «Դա աբսուրդ է, Արցախը չի կարող լինել Ադրբեջանի կազմում որևէ ձևով»,- ասաց նա։

Նրա խոսքով՝ այս  ընթացքում Ադրբեջանը Շուշիում, Հադրութում, Քարվաճառում և այլն, ամբողջ հայկական ժառանգությունը վերացրել է։

«Ադրբեջանը հետևողականորեն գնալու է՝ հայկական ժառանգությունը ոչնչացնելու և հայ բնակչությանն ամբողջապես տեղահանելու ճանապարհով։ Իսկ մեր իշխանությունը որդեգրել է հետևյալ դիրքորոշումը՝ ոչինչ չենք կարող անել։ Դա սո՛ւտ է։ Իշխանությունը, բիզնես շահերից ելնելով, գրավադրել է Արցախը։ Հարվածի տակ է ոչ միայն Արցախը, այլև Հայաստանը։ Այս իշխանությունների ցինիկ, կարճատես և ազգադավ դիրքորոշումը մեզ հասցրել է այս վիճակին։ Մեր աչքի առաջ իսկապես Արցախը կարող է հայաթափվել, հաջորդը կարող է լինել Սյունիքը»,- ընդգծեց Ավետիք Չալաբյանը։