Ձեր վստահելի աղբյուրը

«Ես ոչ բավարար եմ գնահատում ռուս խաղաղապահների գործողությունները, հարկավոր էր ավելի կոշտ միջոցներ կիրառել»,-Աժ-ում հայտարարեց «Հայաստան» խմբակցության քարտուղար Արծվիկ Մինասյանը և հավելեց. «Իրենք ասում են, որ նման մանդատ չունեն, բայց ես ասում եմ, որ կա այդ մանդատը, որը գալիս է մարդու հումանիտար իրավունքների ապահովման հրամայականից և այդ մանդատը ՌԴ-ն ունի նաև որպես ՄԱԿ-ի անվտանգության խորհրդի անդամ, ԵԱՀԿ Մինսկի խմբի համանախագահ երկիր և, ի վերջո, որպես 2020 թ նոյեմբերի 9-ի եռակողմ հայտարարության կարևորագույն երաշխավորող կողմ»:

Նա հայտարարեց, որ այդ մանդատն օգտագործելու համար Հայաստանի պաշտոնական տեսակետն էլ պետք է օգնի և բացատրեց, որ հայկական կողմը ոչ թե անընդհատ պետք է մեղադրի Ռաուսաստանին, այլ պահանջներ առաջադրի միջազգային հանրությանը՝ միջնորդելով, որ շատ ավելի կոշտ միջոցներ իրականացի:

«Երբ որ մենք խոսում ենք Արցախում հումանիտար աղետի մասին, այն միջազգային իրավունքում պահանջում է կոնսոլիդացիա ՄԱԿ-ի անդամ այն բոլոր երկրների միջև, որոնք ստորագրել, վավերացրել և իրականացնում են այն, իսկ չի արվում, քանի որ Հայաստանի արտաքին քաղաքականությունն ակտիվ չէ այդ ուղղությամբ: Միայն կոչերով չէ, այն անընդհատ աշխատանք  է պահանջում»,-շեշտեց Մինասյանը

Անդրադառնալով ԵՄ դիտորդական առաքելության գործունեության ավարտի փաստին՝ ընդդիմադիր պատգամավորը հարց բարձրացրեց, թե ի՞նչ են իրենք արել, քանի որ առաքելության գտնվելու ժամանակ Ադրբեջանը սահմանին անընդհատ կրակել է և եղել են զոհեր:

«Հարցը հետևյալն է, Հայաստանի իշխանությունն ասում է՝ չբարձրաձայնեք Արցախի ինքնորոշման մասին, չխոսենք Արցախի Հանրապետության մասին, որպեսզի Ադրբեջանին ավելի ագրեսիվ վարքագծի չմղենք: Այդ դեպքում թող իշխանություններն ասեն, թե ի՞նչ են անում որպեսզի մեր հայրենակիցների իրավունքները երաշխավորված պաշտպանվեն»,-ասաց Արծվիկ Մինասյանը: