Ձեր վստահելի աղբյուրը

«Արդյոք ճիշտ չէր լինի, որ մենք ուղղակի Ռուսաստանից պահանջենք կատարի իր  պարտավորությունները։ Մարդիկ ստորագրել են, պարտավորություն ունեն»,- ԱԺ արտահերթ նիստում «Քաղաքացիական պայմանագիր» խմբակցության կողմից ներկայացված «Ադրբեջանի կողմից Լեռնային Ղարաբաղում հումանիտար ճգնաժամ հարուցելու մասին» հայտարարության նախագծի քննարկմանն ասաց ՔՊ-ական պատգամավոր Վիգեն Խաչատրյանը։

Նա նշեց, որ միջազգային գործընկերներին էլ պետք է ոչ թե կոչ անեն, այլ խնդրեն, որ մասնակցեն։

«Այն, որ Ռուսաստանը չի անում, հավանաբար մենք պետք է անենք։ Եթե  ՌԴ-ն չի կարողանում, պետք է խնդրի մյուսներին, եթե  չի ուզում, առավել ևս մենք… Լավ չեմ հասկանում։ Եթե ԱՄՆ դեսպանատունը  Բաքվում կոչ է անում  Ադրբեջանին այդ վայրագություններին վերջ տալ, ինձ հասկանալի չէ Բաքվում ՌԴ դեսպանության լռումը, լուռ կեցվածքը, և  հասկանալի չէ Հայաստանում ՌԴ դեսպանի պահվածքը։ Թող վեր կենա, գնա Լաչին, իրենց պետությունն է խայտառակվում»,- ասաց պատգամավորը։

Հարցի հիմնական զեկուցող ՔՊ-ական Հայկ Կոնջոյանն ընթերցեց իրենց հայտարարության մի հատված, ըստ որի՝ «ՌԴ-ին կոչ է արվում իրականացնել անհրաժեշտ գործողություններ ապահովելու 2020 թ. նոյեմբերի 9-ի եռակողմ հայտարարությամբ ամրագրված դրույթների լիակատար իրականացումը ռուս խաղաղապահների վերահսկողության գոտում»։

ՔՊ-ական Արսեն Թորոսյանն առաջարկեց  ՌԴ ուղղված իրենց խոսքի մասում «կոչ ենք» անում բառերը փոխարինել «Ռուսաստանի Դաշնությունից պահանջում ենք»։