Ձեր վստահելի աղբյուրը

ՀՀ առողջապահության նախարար Անահիտ Ավանեսյանն այսօր կառավարության նիստից հետո լրագրողների հետ զրույցում ասաց, որ հնարավոր չէ սանավիացիայի միջոցով Երևան տեղափոխել Ստեփանակերտում գտնվող ծանր հիվանդներին։

Նրա խոսքով, դիմել են միջազգային կառույցներին՝ օգտագործել բոլոր խողովակները, որ հնարավոր դառնա հիվանդների տեղափոխումը Երևան:

«Բոլոր խողովակներով փորձում ենք ճնշում գործադրել Ադրբեջանի վրա»,- նշեց նա։

Ավանեսյանը միաժամանակ ասաց, որ դիմել են ԱՀԿ-ին, սակայն դեռ գրավոր պատասխան չկա։ «Մենք չենք սպասում գրավոր պատասխանի, այլ  քայլեր, հստակ գնահատական, ճնշում ենք ակնկալում։ ԱՀԿ-ն այն կազմակերպություններից է, որը նման դեպքերում պետք է իր բոլոր խողովակները օգտագործի»,-  ընդգծեց նա։

Ըստ Անահիտ Ավանեսյանի՝ Արցախի այն գյուղական համայնքները, որոնք Լաչինի միջանցքի փակման հետևանքով կտրվել են Ստեփանակերտից, ՀՀ առողջապահության նախարարության միջոցով դեղորայք և անհրաժեշտ բժշկական պարագաներ են ստացել։

«Ես անմիջական կապի մեջ եմ Արցախի ԱՆ-ի հետ։ Մեր մասնագետներն աշխատում են Ստեփանակերտի հիվանդանոցի բժիշկների հետ, փորձում են անել հնարավորը ծանր վիճակում գտնվող հիվանդների վիճակը ստաբիլ պահելու համար։ Կարծում եմ, որ այս պաին ճիշտ է դադարեցնել պլանային վիրահատությունները և բոլոր ռեսուրսներն ուղղել միայն անհրաժեշտ բուժօգնություն ցուցաբերելու համար»,- ասաց նա՝ հավելելով, որ հումանիտար ճգնաժամն առկա է, Արցախում մարդիկ կանգնած են ճգնաժամի առաջ։

Անահիտ Ավանեսյանը նշեց նաև, որ ուժեղացրել են Գորիսի բժշկական կենտրոնի բոլոր ծառայությունների սպեկտորը։