Ձեր վստահելի աղբյուրը

«Արցախում իրավիճակի փոփոխություն չկա՝ ճանապարհը փակ է, գազամատակարարում չկա, ժողովուրդն էլ պաշարված, բայց կանգուն է, կանգնելու ենք մինչև վերջ»,- Երևանում ՄԱԿ-ի հայաստանյան գրասենյակի դիմաց լրագրողների հետ ճեպազրույցում ասաց Արցախի Հանրապետության արտաքին գործերի նախարարի պաշտոնակատար Դավիթ Բաբայանը։

Նա նշեց, որ Արցախի իշխանության առաջ  բարդ հարցեր են. «Նախ և առաջ  այս ճգնաժամային իրավիճակում պետք է գոյատևել, ապահովել բնակչության կենսական կարևորագույն պահանջները, մյուս կողմից անվտանգությունը։ Իհարկե, նաև  աշխատանք է տարվում այդ ճանապարհի բացման ուղղությամբ։ Տարբեր խողովակներով տարբեր տիպի աշխատանքներ ենք տանում»։ 

Բաբայանի խոսքով,  ճիշտ չէ ասել, թե ինչ քայլեր են ձեռնարկում, ում հետ են խոսում, որտեղ են հանդիպում։

«Այն, որ աշխատանքներ տարվում են, սա միանշանակ է։ Կարծում եմ՝ ռուս խաղաղապահները նույնպես  ամենաշահագրգռված կողմերից մեկն են, որպեսզի ճանապարհը բացվի։ Չէ՞ որ  իմիջային հարվածներն առաջին հերթին իրենց  են գալիս։ Սա ակնհայտ է։ Ես միշտ դեմ եմ եղել, որ մենք մտնենք ինչ-որ անառողջ քննարկումների մեջ՝ ռուսամետ, արևմտամետ,  այս մեկն է մեղավոր, այն մեկն է մեղավոր։ Բավական է, հոգնել ենք արդեն»։

Դավիթ Բաբայանն ընդգծեց՝ ադրբեջանցիների պահանջը հստակ է՝ նրանք ուզում են խեղդել  Արցախը. «Սկզբում սկսում են Կաշենի հանքավայրց, ուզում են հանքը փակվի, իսկ սա մեր ամենամեծ գործարանն է, բյուջեի եկամուտներն  ապահովող կարևորագույն աղբյուրը, գումարած այնտեղ մոտ 1800 մարդ է աշխատում։ Հասկանալի է չէ՝ ուզում են կաթվածահար անել»։

Արցախի Հանրապետության արտաքին գործերի նախարարի պաշտոնակատարի խոսքով, որպեսզի Ադրբեջանը դադարեցնի այս ահաբեկչական, ցեղասպան քայլը, պետք է նրա վրա քաղաքական, այլ տիպի ճնշումներ լինեն։ 

«Մենք դեռ չենք տեսնում այդ ճնշումը։ Ըստ երևույթին, Ադրբեջանը, կարելի է  ասել, ապտակում է նաև միջազգային հանրությանը»,- ասաց Դ.Բաբայանը։