Ձեր վստահելի աղբյուրը

«Այսօր արդեն երրորդ օրն է՝ 72 ժամ, մենք գտնվում ենք արգելափակման մեջ»,- ուղիղ եթերում ասաց Արցախի Հանրապետության պետնախարար Ռուբեն Վարդանյանը՝  ներկայացնելով Արցախում տիրող իրավիճակը։

Նրա խոսքով՝ հպարտ է, որ ապրում է Արցախում։ «Մենք անցնում ենք այս ճգնաժամը շատ պարկեշտ և մեծ հավատ ունեմ, որ ամեն ինչ հաղթահարելու ենք։ Նման ուժ, որ տեսնում եմ ձեր մեջ, հավատ, որ միասին ամեն ինչ անելու ենք, ինձ տալիս է մեծ էներգիա»,- նշեց նա։ 

Ռուբեն Վարդանյանի գնահատմամբ՝ ստեղծված իրավիճակն աննախադեպ է, քանի որ արցախյան պատերազմների ժամանակ՝ 90-ականներին և 44-օրյա, Արցախը Հայաստանին կապող ճանապարհը երբեք չի փակվել, և հնարավոր է եղել մթերք, վառելիք, դեղորայք տեղափոխել Արցախ։ 

«Առաջին անգամ մենք նման իրավիճակում ենք։ Իհարկե դա նոր իրողություն է, բնականաբար, դժվար է, բայց դա արվել է նրա համար, թե մենք  հնարավորինս երկար դիմանանք այս իրավիճակին»,- նշեց նա։ 

Նա նա նշեց, որ ցավոք սրտի, կան մարդիկ,  ավելի շատ ունևորների կողմից, որոնք չեն հասկանում, որ անձնական զանգերով կամ անձնական խնդրանքներով ոչ մի հարց չի լուծվելու:

«Բոլորի նկատմամբ նույն մոտեցումն է լինելու: Ես գիտեմ դեպքեր, որոնք անթույլատրելի են եւ ես թույլ չեմ տալու դա շարունակվի, մարդիկ պատիժ են կրելու, եթե օգտագործելով իրենց  հնարավորությունները, փորձեն ինչ-որ հարցեր լուծել: Ամեն ինչ բացահայտվելու է։ Ես գիտեմ, որ մի քանի տեղերում փորձել են գները բարձրացնել»,- ընդգծեց պետնախարարը։

Ռուբեն Վարդանյանը հիշեցրեց, որ գործում է 119 համարով թեժ գիծ, մարդիկ կարող են նման դեպքերի դեպքում ահազանգել, բոլոր դեմքերը կստուգվեն և նման մարդիկ կպատժվեն։

«Բոլորս հավասար են: Մեր հաղթելու միակ ճանապարհն այն է, որ բոլորս միասին հավատանք, որ չկա մարդկանց մի խումբ որ  ավելի շատ իրավունքներ ունեն, քան մյուսները»,- նշեց նա։