Ձեր վստահելի աղբյուրը

«Եթե մինչև դեկտեմբերի 19-ը Ադրբեջանն ապաշրջափակի Լաչինի միջանցքը, և ամբողջությամբ լուծվի հարցը, ապա ՄԻԵԴ-ում վարույթը կկարճվի»,-Panorama.am-ի հետ զրույցում հայտնեց միջազգային իրավունքի մասնագետ Արա Ղազարյանը։

Նրա գնահատմամբ, եթե նույնիսկ նման զարգացումներ լինեն, միևնույն է, նման վարույթները շատ կարևոր են, զսպող ազդեցություն ունեն։

«Չեմ կարող ասել՝ որոշիչ են, քանի որ սադրանքները կրկնվելու են, բայց կարևոր են»,-ասաց իրավաբանը։

Եթե Արցախը Հայաստանին կապող միակ ճանապարհը մինչև ՄԻԵԴ-ի կողմից Ադրբեջանի պատասխանի համար սահմանված ժամկետում չբացվի, ապա պատասխանից մի քանի օր անց եվրոպական դատարանում որոշում կկայացվի։

«Լավ է, ՄԻԵԴ-ը կարճ ժամանակ է տվել Ադրբեջանին, գործեր կան, որ այդ ժամանակը շատ երկար է»,-ասաց Ղազարյանը։

Հիշեցնենք, որ Մարդու իրավունքների Եվրոպական  դատարանը որոշել է Ադրբեջանին ժամանակ տրամադրել մինչև երկուշաբթի՝ դեկտեմբերի 19-ը, ժամը 16-ը (Ֆրանսիայի ժամանակով) պատասխան ուղարկել Հայաստանի ներկայացրած պահանջի վերաբերյալ, որից հետո Դատարանը կկայացնի վերջնական որոշում:

Միջազգային իրավական հարցերով ՀՀ ներկայացուցչի գրասենյակը երեկ դիմել է Մարդու իրավունքների եվրոպական դատարան՝ պահանջելով կիրառել միջանկյալ միջոցներ Ադրբեջանի նկատմամբ և պարտավորեցնել վերջինիս ապաշրջափակել Բերձորի (Լաչինի) միջանցքը:

Արցախը շրջափակելու ու դրա հետևանքով հումանաիտար  ճգնաժամ առաջացնելու փաստով, ըստ Արա Ղազարյանի, հետագայում էլ կարելի է դիմել Եվրոպական դատարան։

«Փաստերն այնքան շատ են, որ չգիտես, որ փաստով դիմես դատարան»,-ասաց նա։

Ադրբեջանի կողմից Արցախ գազի մատակարարման խափանման վերացման ու միջանցքի հնարավոր բացման գործում իրավաբանը կարևորում է եվրոպական մի քանի երկրների գործադիր ու օրենսդիր մարմինների տարածած հայտարարությունները։

«Թեև Ադրբեջանն իմիտացիա է անում, որ այնտեղ անձինք են, որոնց գործողությունները չի վերագրվում պետությանը, բայց բոլորը հասկացել էին ու նաև հայտարարեցին, որ Ադրբեջան, այդ դու ես անում, ոչ թե մասնավոր խմբերը։ Ինձ թվում է, դրանք են վճռորոշ ազդեցություն ունեցել։ Թե կուլիսների հետևում ինչ բանակցություններ են ընթացել, ինչ զիջումներ են եղել երկու կամ մեկ կողմից, չգիտենք, բոլոր դեպքերում մենք ամբողջական  տեղեկատվություն չունենք, բայց որոշակի արդյունք կա»,-ասաց նա։

Նշենք, որ այսօր Արցախի պետնախարար Ռուբեն Վարդանյանը հայտարարեց. «Առանց որևէ նախապայմանների, առանց որևէ մեր կողմից զիջումների կամ մեր կողմից թուլություն ցուցադրելու, Ադրբեջանը վերականգնել է գազի մատակարարումը»։

Անդրադառնալով ՄԻԵԴ-ի որոշումների կատարման մասով Ադրբեջանի փորձին՝ միջազգային իրավունքի մասնագետն ընդգծեց, Ադրբեջանը չի կատարում որոշումները։

«Այդ երկիրը մոտենում է երկու տարվա այն սահմանգծին, երբ ՄԻԵԴ-ում ընդունված պրակտիկայի համաձայն, քաղաքական ճնշումները մեծանում են։  Շուտով երկու տարի կանցնի Սարիբեկյանի ու դրան հաջորդող այլ վճիռներից, բայց Ադրբեջանը բացարձակապես ոչինչ չի արել, նույնսիկ  նվազագույնը՝ գործողությունների ծրագիր չի ներկայացրել։ Մեր խնդիրն է այդ պրեսսինգը մեծացնել, ուժեղացել, ԵԽ նախարարների կոմիտեում հանրային կարծիք ձևավորել, որ Ադրբեջանը կոնկրետ հայկական գործերով չի ցանկանում կատարել ՄԻԵԴ-ի որոշումները։ Եվ մենք հաջողություն կունենանք այդ  հարցում»,-ասաց Արա Ղազարյանը։

Հիշեցնենք, որ դեկտեմբերի 12-ից ադրբեջանցիները՝ հանդես գալով իբր «բնապահպաններ» փակել են Արցախն աշխարհին կապող միակ ճանապարհն ու պահանջում են, որ իրենց թույլ տան մուտք գործել հանքավայրեր՝ հետևելու դրանց շահագործման պայմաններին։ Արցախում դեմ են այս պահանջին, ռուս խաղաղապահները թույլ չեն տալիս ադրբեջանցիներ մուտք գործել Արցախի տարածք։ «Բնապահպանները» վրաններ են տեղադրել, փակել ճանապարհը, ինչի հետևանքով Արցախ չեն հասնում սնունդ, դեղորայք, կենսական նշանակության այլ ապրանքներ։