Ձեր վստահելի աղբյուրը

«Առաջինից երկրորդ ընթերցում գրավոր 4 առաջարկներ են ստացվել «Հայաստան» խմբակցությունից, որից 3-ը նույնաբովանդակ են և վերջիններս իմ կողմից չեն ընդունվել»,-ԱԺ-ում հայտնեց արդարադատության փոխնախարար Արփինե Սարգսյանը՝ զեկուցելով «Կառավարության կառուցվածքի և գործունեության մասին» օրենքում փոփոխություններ և լրացումներ կատարելու մասին և հարակից օրենքների նախագծերի փաթեթը:

Փոխնախարարը պարզաբանեց, որ ընդդիմադիր խմբակցությունն առաջարկել էր ոստիկանության բարձրագույն կոչումների շնորհման իրավունքը թողնել ՀՀ նախագահին, մինչդեռ նախագծով առաջարկվում է այն տալ վարչապետին:

«Հաշվի առնելով, այն հանգամանքը, որ Ոստիկանությունը դառնում է ՆԳՆ-ին ենթակա պետական մարմին, այդ դեպքում ՍԴ կանոնակարգը գործել չի կարող: Բացառություն է կազմում միայն Ոստիկանական զորքերի հրամանատարական կազմը, քանի որ Սահմանադրության այսօրվա գործող կանոնակարգման ուժով Ոստիկանության զորքերը համարվում են այլ զորքեր, հետևաբար կոչումների և նշանակումների հետ հարցերը գտնվում են ՀՀ նախագահի տիրույթում»,-ասաց Արփինե Սարգսյանը, բայց և շտապեց հայտնել, որ նախագահից այդ իրավասությունն էլ կվերցնեն և կտան վարչապետին՝ երբ ձեռնամուխ լինեն նաև ոստիկանական գվարդիայի ձևավորմանը:

Փոխնախարարը հայտնեց, որ մասնակիորեն ընդունել են ոստիկանական մահակների պատրաստման նյութի կանոնակարգման վերաբերյալ ընդդիմության 4-րդ առաջարկը:

«Հաշվի առնելով նաև ԱԺ փոխխոսնակ Հակոբ Արշակյանի հորդորը, նախագծում ընդգրկել ենք դրույթ, որի համաձայն մահակների ընդհանուր բնութագրական տվյալները սահմանվելու է կառավարության որոշմամբ, որպեսզի որևէ առևերևույթ մտահոգություն անգամ այս թեմայով չլինի: Վերահաստատում եմ այն մոտեցումը, որ մահակը պետք է լինի այնպիսին, որ բավարարի մարդու իրավունքների պաշտպանության բարձր ստանդարտներին»,-հայտարարեց արդարադատության փոխնախարարը:

Նրա տեղեկացմամբ՝ փոփոխություններով նաև ՆԳՆ ֆունկցիոնալ բազայից հանվել է աշխատանքի միգրացիայի ոլորտում քաղաքականության մշակման հատվածը, քանի որ կառավարությունը գտել է, որ, բոլոր դեպքերում, այդ ոլորտում քաղաքականությունը պետք է շարունակի մշակել Աշխատանքի և սոցիալական հարցերի նախարարությունը, իսկ ներքին գործերի նախարարությունը կօժանդակի տարբեր պրոցեսների կատարմանը:

Արփինե Սարգսյանը հայտնեց, որ Մասնավոր պահնորդական ծառայության ոլորտում քաղաքականության մշակման լիազորությունը նույնպես տրվել է ՆԳՆ-ին, այլ ոչ թե ոստիկանության ծառայությանը: