Ձեր վստահելի աղբյուրը

Դեկտեմբերի 12-ից «բնապահպան» ներկայացող ադրբեջանցիներ փակել են Հայաստանն Արցախին կապող միակ ճանապարհը՝ զրկելով արցախցիներին սննդի, դեղորայքի, կենսական անհրաժեշտության այլ  ապրանքների մատակարարումից։ Օրեր շարունակ Արցախի, Հայաստանի քաղաքացիները Երևանում բողոքի ակցիաներ են իրականացնում տարբեր երկրների դեսպանատների, միջազգային կազմակերպությունների գրասենյակների դիմաց՝ պահանջելով պատժել հանցագործ Ադրբեջանին։

Ո՞վ է ստեղծված իրավիճակի պատասխանատուն, ո՞ւմ պետք է ուղղվեն բողոքի սլաքները։ Այս ու այլ հարցերի շուրջ Panorama.am-ը զրուցել է քաղաքագետ Ստեփան Դանիելյանի հետ։

Panorama.am-Պարոն Դանիելյան, ստեղծված իրավիճակում ո՞ւմ դուռը պետք է թակեն քաղաքացիները։
Ստեփան Դանիելյան-Քաղաքացիները թակելու միայն մի դուռ ունեն, դա կառավարության դուռն է։ Եթե հիշում եք, 2018-ին գործող վարչապետն ասել էր՝ կառավարության դուռը ժողովրդի դուռն է, որը կարող են նաև ջարդել։ Իր խոսքերն եմ մեջբերում։ Ահա այդ դուռն է, որից քաղաքացիները կարող են պահանջ ունենալ, որովհետև արտաքին քաղաքականությունը  վարում է կառավարությունը, եթե որևէ բան չի ստացվում, ապա մեղավորը կառավարությունն է։ Թակելու համար այլ դուռ  քաղաքացին չունի։

Հայաստանից դուրս կարող են տարբեր հանրահավաքներ անել, հատկապես այն մարդիկ, որոնք Հայաստանի քաղաքացի չեն։ Նրանք կարող են հումանիտար խնդիրների մասին բարձրաձայնել։ Նորից եմ կրկնում, Հայաստանում գոյություն ունի մի դուռ, այլ դուռ չկա։ Անհասկանալի է, երբ գնում են, տարբեր երկրների դեսպանատների մոտ հանրահավաքներ են իրականացնում։ Սա անհասկանալի է։ Կառավարության դռան մոտ կարող են և հանրահավաքներ անել, և պահանջել, և այլ բաներ անել։

Panorama.am-ՄԱԿ-ի հայաստանյան գրասենյակի դիմաց անժամկետ նստացույց հայտարարած  Արտակ Բեգլարյանը, որ Արցախում պետնախարարի պաշտոնն է զբաղեցրել, չի՞ պատկերացնում իրական պատասխանատուին, թե՞...
Ստեփան Դանիելյան-Որքանով ես հասկանում եմ, Բեգլարյանը ֆորմալ Արցախի քաղաքացի է, որքանով հասկանում եմ՝ հանդես է գալիս  մարդու իրավունքների նախկին պաշտպան, այդ դերակատարման մեջ է։ Նա հանդես չի գալիս որպես պաշտոնյա, ինձ համար դա տրամաբանական է, կարծում եմ՝ այդ քայլով  ինքը դիմում է  Հայաստանի հանրությանը։

Panorama.am-Ի՞նչ պետք է անի Հայաստանի կառավարությունը։
Ստեփան Դանիելյան-Մենք չենք կարող ասել, ինչ պետք է անի, քանի որ այդ կառավարությունը փակ դռների հետևում ինչ-որ բանակցություններ է վարում, որոնց մասին մենք տեղյակ չենք։ Գնում է Պրահա, ճանաչում է Արցախն Ադրբեջանի կազմում։ Այդ դեպքում  ինքը տվել է բոլոր իրավունքներն Ադրբեջանին։ Այս իրավիճակում միակ լուծումը Հայաստանի կառավարության հրաժարականն  է, քանի որ այն ինչ պայմանավորվել է Փաշինյանը, խորհրդարանով չի վավերացվել։ Դա ինչ-որ անձի խոստումներ են, այդ պատճառով այդ անձը պետք է մեջտեղից դուրս գա, որ խոստումներն իր հետ գնան։ Սա է ամենաուղիղ ու ռացիոնալ ճանապարհը։

Panorama.am-Իսկ եթե չգնա՞, ամեն դեպքում նման մտադրություն իշխանությունը չունի։
Ստեփան Դանիելյան-Այս իշխանությունն այն իշխանությունը չէ, որ ինքնակամ հեռանա, սա նաև ցույց է տալիս Հայաստանի  քաղաքական դաշտի անարդյունավետությունը, ոչ միայն իշխանության, այլ նաև՝ ընդդիմության, որը նույնպես քաղաքական մտածողություն չունի և նման իրավիճակում չի կարողանում պրոցեսներ գեներացնել, լինել հասկանալի հանրության համար։

Panorama.am-Արցախի իշխանությունների անելիքը ո՞րն է։
Ստեփան Դանիելյան-Արցախի իշխանությունները պետք է զբաղվեն հումանիտար խնդիրների կազմակերպմամբ, սննդի, դեղորայքի  հարց գոյություն ունի, պետք է աշխատեն ռուս խաղաղապահների, նաև Ռուսաստանի կառավարության հետ, նաև պետք է դիմեն Հայաստանի հանրությանը՝ ցույց տալով Հայաստանի կառավարության վտանգավոր քայլերը։

Panorama.am-Կունենա՞ն Արցախում այդ խիզախությունը։
Ստեփան Դանիելյան-Ես չեմ կարող Ձեր հարցին պատասխանել, քանի որ այստեղից խոսելը հեշտ է, իսկ երբ այնտեղ ես գտնվում, պատկերն արդեն այլ է, և էմոցիաներն են այլ։  Արցախի իշխանությունների վրա պատասխանատվության ծանր բեռ է դրված այսօր։ Այստեղից խորհուրդներ տալը շատ ավելի հեշտ է, քան այնտեղ գտնվելով։  Բնականաբար, իրենք ունեն ինչ-որ փակ ինֆորմացիա, որը մենք չունենք, կոնկրետ ով ում հետ ի՞նչ է խոսում, ինչե՞ր են խոսել, դրա համար ես չեմ ցանկանում ենթադրություններ անել։

Panorama.am-Անընդհատ խոսվում է միջազգային հանրության արձագանքների մասին, իսկ տարածաշրջանի երկրներն ինչպե՞ս են արձագանքել Լաչինի միջանցքն ադրբեջանցիների կողմից փակ պահելու փաստին։
Ստեփան Դանիելյան-Այսօր «Փակագիծ» տեղեկատվական հարթակն ինֆորմացիա տարածեց,  ինքս չեմ ստուգել ու չեմ կարող ստուգել, բայց վստահում եմ այդ հարթակին, ըստ որի, երեք օր է՝ փակվել է Նախիջևան-Բաքու ճանապարհն Իրանի կողմից՝ կարծես թե Լաչինի ճանապարհի փակմանն ի պատասխան։ Վերջին ժամանակներում կոնկրետ քայլեր մենք միայն Իրանից ենք տեսնում։

Panorama.am-Իսկ արևմուտքի՞ց, որտեղ այս օրերին Եվրոպայում Ալիևին ներկայացնում են որպես վստահելի գործընկեր։
Ստեփան Դանիելյան-Եվրոպային պետք է Ադրբեջանի գազը և հակառուսական, հակաիրանական դիրքորոշումը։ Այդ առումով Ադրբեջանն իրենց դաշնակիցն է, և իրենք  իրենց շահերով են շարժվում։ Եվ գուցե շատ ուրախանային, եթե Արցախի հայությունը տեղահանվեր, գլխացավանքից կազատվեին։ Այդքանը կարող եմ ասել։

Panorama.am-Շնորհակալ եմ։

Լալա Տեր-Ղազարյան