Ձեր վստահելի աղբյուրը

«Մենք ունենք հետևյալ իրավիճակը, երբ համայնքի ղեկավարն իրավունք ունի ինքնակամ կառուցված շենք-շինությունների քանդման որոշումներ կայացնել համայնքային հողերի վրա կամ որոշ դեպքերում՝ պետական սեփականության հողերի վրա»,-գործադիրի այսօրվա նիստում ասաց ՏԿԵ նախարար Գնել Սանոսյանը՝ զեկուցելով հերթական նախագիծը:

Նա տեղեկացրեց, որ կառավարությունը օրենքով սահմանել է, որ ինքնակամ շինություն կառուցել չի կարելի, և քանդման որոշումները հստակ են:

Արձանագրելով որ շարունակում են լինել դեպքեր, երբ ոչ համայնքային հողերի, բազմաբնակարան շենքերի վրա ապօրինի շինարարություն է արվում:

«Երբ այնտեղի սեփականատերերը բնակիչներն են, ոչ թե համայնքը, նկուղային հատվածներում, տանիքներում իրականացվել կամ իրականացվում են ապօրինի շինարարություններ: Մենք հիմա փորձում ենք կարգավորումներ անել՝ համայնքի ղեկավարին տալով իրավասություն դրանք քանդելու և թույլ չտալու նման կառուցապատումներ»,-հայտարարեց  Սանոսյանը:

Նախարարը զեկուցեց կառավարության 2007 թ.-ի որոշուման մեջ փոփոխություն կատարելու նախագիծը, որով բազմաբնակարան շենքի ընդհանուր բաժնային սեփականության պահպանման պարտադիր աշխատանքների և միջոցառումների շարքում նախատեսվում է նաև ինքնակամ շինարարության կառուցման և ընդհանուր օգտագործման տարածքների ապօրինի զավթման կանխարգելումը և դրանց քանդումը:

Երևանի քաղաքապետի տեղակալ Տիգրան Ավինյանն էլ տեղեկացրեց, որ քաղաքապետարանն ակտիվորեն իրականացնում է բազմաթիվ քանդման և մաքրման աշխատանքներ:

Տեղեկացնելով, որ այսօր էլ կան օրինակներ, երբ բնակիչներն ինքնակամ շինություններ են կառուցում բազմաբնակարան շենքերի տանինքներին՝ փոխքաղաքապետը հայտարարեց, որ համայնքների ղեկավարների՝ դրանք կանխելու կամ հետևանքները վերացնելու լիազորությունները սահմանափակ են:

Ըստ Ավինյանի՝ բազմաբնակարան շենքերի վրա ինքնակամ կառույցները ոչ միայն տգեղ են, այլև սեյսմիկ առումով վտանգներ են ներկայացնում:

Կադաստրի կոմիտեի ղեկավար Սուրեն Թովմասյանն էլ հայտնեց, որ ՀՀ-ում հաշվառել են շուրջ 24 հազար ինքնակամ կառույց:

«Օրական շուրջ 200 ինքնակամ կառույց է մուտք արվում համակարգ՝ հաշվի առնելով այն հանգամանքը, որ մինչև դեկտեմբերի 31-ը ինքնակամ կառույցները հաշվառելու Երևան քաղաքի վերջնաժամկետն է»,-հայտնեց Թովմասյանը և երևանցիներին տեղեկացրեց, որ մինչև դեկտեմբերի 31-ը հաշվառելու պարագայում հնարավոր է դրանք օրինականացնելու հնարավորություն ունենան:

«Այս ժամկետը բաց թողնելուց հետո չկա հնարավորություն որևէ ինքնակամ կառույց հաշվառել և օրինականացնել Երևանում»,-հայտնեց Կադաստրի կոմիտեի ղեկավարը: