Ձեր վստահելի աղբյուրը

Իսպանիայի Կոնգրեսը դեկտեմբերի 22-ին կայացած լիագումար նիստի ընթացքում միաձայն ընդունել է հայտարարություն՝ Ադրբեջանի կողմից Լաչինի միջանցքի արգելափակման և դրա հետևանքով ստեղծված հումանիտար ճգնաժամի վերաբերյալ։ Այս մասին տեղեկացնում է Իսպանիայում ՀՀ դեսպանությունը։

Հայտարարության մեջ մասնավորապես նշվում է՝

«Արդեն 11 օր է, ինչ Ադրբեջանն արգելափակել է Լաչինի միջանցքը՝ Լեռնային Ղարաբաղի հետ Հայաստանի միակ ցամաքային կապը։ Միևնույն ժամանակ, դադարեցվել է այս տարածք գազամատակարարումը, իրավիճակ, որը հանգեցրել է հումանիտար ճգնաժամի և լարվածության աճ է գրանցել տարածաշրջանում։

Այս պատճառով և Եվրոպական հանձնաժողովի դիրքորոշմանը համահունչ՝ Պատգամավորների Կոնգրեսը.
- Անհանգստությամբ հետևում է Լաչինի միջանցքի շուրջ տեղի ունեցող տարբեր իրադարձություններին:
- Կոչ է անում Ադրբեջանի իշխանություններին՝ ապահովելու միջանցքի երկայնքով տեղաշարժի ազատությունն ու անվտանգությունը՝ 2020 թվականի նոյեմբերի 9-ի եռակողմ հայտարարությանը համապատասխան։ Ազատ տեղաշարժի սահմանափակումները մեծ տառապանք են պատճառում բնակչությանը և կարող են ստեղծել հումանիտար ճգնաժամ։
-  Կոչ է անում կողմերին լուծելու և հարթելու տարաձայնությունները երկխոսության և բանակցությունների միջոցով:
- Հորդորում է միջազգային կառույցներին կանխելու տարածաշրջանում նոր հումանիտար ճգնաժամը»։

Արցախի Հանրապետության պետնախարար Ռուբեն Վարդանյանը շնորհակալություն է հայտնել Իսպանիայի կոնգրեսի ներկայացուցիչներին այս բարդ իրավիճակում Արցախի ժողովրդի կողքին կանգնելու համար. «Երախտապարտ եմ նաև բոլոր այն մարդկանց, որոնք շարունակում են աշխատել Ադրբեջանի նկատմամբ միջազգային ճնշումն ուժեղացնելու ուղղությամբ:

Անկախ նրանից, որ մենք դեռևս չունենք շոշափելի արդյունքներ, պետք է ակտիվ քայլեր ձեռնարկել, որոնք կստիպեն Ադրբեջանին դադարեցնել Արցախի շրջափակումը: 120,000 մարդ կանգնած է հումանիտար աղետի առաջ, ուստի յուրաքանչյուր քայլ, որը կնպաստի այս վտանգի չեզոքացմանը, կարևոր է և անհրաժեշտ»: