Ձեր վստահելի աղբյուրը

«Միակ պրոհայկական հանգուցալուծումը գտնվում է  Երևանում։ Երևանում կլինի ազգային իշխանություն, մենք կունենանք կամք իրականացնելու այդ գործողությունն ու դրա շուրջ կհավաքենք ռեսուրսներ», - Tert.am-ին տված հարցազրույցում ասել է թուրքագետ, պատմական գիտությունների թեկնածու Վարուժան Գեղամյանը՝ պատասխանելով հարցին, թե ո՞վ է հանգուցալուծելու  Լաչինի միցանցքի շուրջ ստեղծված իրավիճակը։

Նրա խոսքով, հեշտ է ասել՝ «մենք էլ ոչինչ չենք կարող անել, դատապարտված ենք և այլ»։

«Դա պարտվողական թեզ է։ Նույն բանը  տարածում են թուրքերն ու ադրբեջանցիները, որ հայեր՝ դուք դատապարտված եք, դուք ոչինչ չեք կարող անել։ Ո՞վ ասաց, որ ոչինչ չենք կարող անել։ Գուցե պատճառը, որ ոչինչ չենք կարող անել, այն է, որ այն մարդիկ, ովքեր պատասխանատու են մեր բոլորի ռեսուրսները հավաքելու, ունակ չե՞ն դա անելու։ Կարծում եմ, որ միայն դա է պատճառը»,- ասել է Վարուժան Գեղամյանը։

Նա նշել է, որ պատերազմն ու կռիվն այսօր հանրային դիսկուրսում պետությունը, դե ֆակտո  իշխանությունները հավասարեցրել են պարտության, այսինքն անխուսափելիորեն ցանկացած բախում հավասար է պարտության։

«Այդպես չէ։ Ո՞վ ասաց, որ պատերազմը պարտություն է, ո՞վ ասաց, որ ռազմական գործողությունների դիմելն անպայման պարտություն է ենթադրում։ Բնավ ոչ։ Այո, մեկ անգամ պարտվեցինք, բայց պարտվել են իրենք, ոչ թե հայկական պետությունը, հայկական բանակը։ Ակնհայտ են չէ՞ եղել թերացումները, այլ հնարավոր վարկածների մասին չեմ խոսում»,- ասել է թուրքագետ, պատմական գիտությունների թեկնածու Վարուժան Գեղամյանը։