Ձեր վստահելի աղբյուրը

Արցախի Հանրապետության պետական  նախարար Ռուբեն Վարդանյանը Ստեփանակերտի Վերածննդի հրապարակից բոլորին կոչ արեց այսօր մասնակցել ժամը 14։00-ին կայանալիք համաժողովրդական հանրահավաքին, որը կայանալու է հենց այդ հրապարակում։

«Բոլորին կոչ եմ անում այսօր ժամը երկուսին գալ այստեղ ընտանիքներով, աշխարհին ցույց տանք, որ մենք կանք, միանանք ու ասենք  մի խոսք՝ մենք պաշտպանելու ենք մեր պետությունը, մեր արժանապատվությունը, մեր պատմությունն ու մեր ապագան»,- ուղիղ եթերում ասաց Ռուբեն Վարդանյանը։

Նա նշեց, որ վերջին շաբաթում հանդիպումներ է ունեցել Մարտակերտում, Կաշենում,  Մարտունիում, Ասկերանում, Ստեփանակերտում,  վստահ է՝ բոլորը իսկապես հասկանում են, թե ինչքան լուրջ է այս իրավիճակը, պետք է միանալ և հաղթահարել բոլոր դժվարությունները։

Ռ. Վարդանյանի խոսքով, հանդիպումների ընթացքում հասկացել են, որ այսօր կայանալիք հանրահավաքը կարևոր և ճիշտ միջոցառում է։ Նա ասաց, որ գիտի մարդիկ կան, որոնք դեմ են դրան։

«Վստահ եմ, որ մենք կարող ենք մնալ հայ, մնալ արժանապատիվ արցախցի միայն իրար հետ միասին պաշտպանելով մեր պետությունը, մեր Արցախը։ Այլ ճանապարհ չունենք։ Բոլորին կոչ եմ անում գալ այստեղ ժամը 14։00-ին, որոշում կայացնենք ու գնանք առաջ։ Ուրիշ ճանապարհ չունենք»,- ասաց Ռուբեն Վարդանյանը։