Ձեր վստահելի աղբյուրը

«Սպանդանոցային մորթն այլընտրանք չունի, ամեն ինչ անելու ենք, որ շուկայում վաճառվի միայն ու միայն սպանդանոցային ծագման միսը»,- ասաց ՍԱՏՄ ղեկավար Գեորգի Ավետիսյանը լրագրողների հետ հանդիպմանը։

Նրա խոսքով, շատ մարդիկ ամեն ինչ անում են շրջանցելու այս օրենսդրական պահանջը, մտածում են մեքենայություններ, վաճառում են 5-րդ ձևը, որը փաստում է, որ կենդանին մորթվել է սպանդանոցային պայմաններում։

«Այս ամենով զբաղվում է ոստիկանությունը, կան հարուցվածք քրեական գործեր։ Հույս ունեմ, որ այդ գործերը կսթափեցնեն անբարեխիղճ տնտեսվարողներին, քանի որ տուգանքները բավարար չեն, որ նրանք ավելի զգոն լինեն»,-ասաց տեսչական մարմնի ղեկավարն ու ավելացրեց, որ վերահսկողության աշխատանքներ իրականացնելիս համագործակցում են ոչ միայն ոստիկանության, այլև ՏԻՄ-երի հետ։

Ամանորին ընդառաջ մեծացել է փողոցային առևտրի ծավալները։ Այստեղ ՍԱՏՄ-ն որևէ գործառույթ չունի, քանի որ դրա համար պատասխանատու են տեղական ինքնակառավարման մարմինները։
«Ամեն դեպքում այս խնդիրը չի լուծվի, քանի դեռ ունենք փողոցից ապրանք գնող քաղաքացիներ։ Ասել եմ, ևս մեկ անգամ կրկնում եմ, որ փողոցից գնում կատարելու դեպքում իրենք չեն հարգում ոչ միայն իրենց, այլև իրենց ընտանիքի անդամներին»,-կարծիք հայտնեց Ավետիսյանը։

Միայն սեպտեմբերի ընթացքում կասեցվել է 14.500 կգ մսեղիքի վաճառք, միայն դեկտեմբերի ընթացքում իրացման դաշտ ՍԱՏՄ-ն չի թողել 6700 կգ միս, տարվա ընթացքում ընդհանուր առմամբ նման 210 խախտում է արձանագրվել, խախտում թույլ տված անհատները տուգանվում են առաջին անգամ 20-50 հզ, իսկ տնտեսվարողները՝ 50-100 հզ դրամ։

«Միակ մարզը, որտեղ սպանդանոց չկա, Վայոց Ձորն է, մնացած մարզերում սպանդանոցներ կան, կարող եմ ասել, որ Շիրակում սպանդանոցները քիչ են, բայց ցանկության դեպքում կբավարարվի»,-նշեց նա։