Ձեր վստահելի աղբյուրը

Փաստաբաններ, իրավաբաններ, դատավորներ, նախկին դատախազներ, օրենսդիր մարմնի անդամներ,  սովորական քաղաքացիներ շարունակում են քննադատել Բարձրագույն դատական խորհրդի երեկվա որոշումը, որով դադարեցվեցին Երևանի ընդհանուր իրավասության դատարանի դատավոր Աննա Փիլոսյանի լիազորությունները։

Բանն այն է, որ Փիլոսյանն Արցախի նախկին ՄԻՊ, իրավապաշտպան Ռուբեն Մելիքյանի կինն է, Մելիքյանը հաճախ է պաշտպանում իշխանությունների կողմից հետապնդման ենթարկվող անձանց շահերը, կարծիք հայտնում,  գնահատական տալիս, քննադատում  իշխանություններին ու նրանց գործողությունները։

Շատերը ԲԴԽ որոշումը հենց այս համատեքստում են դիտարկում։

«Ինձ հարվածելու նպատակով (դիմացից էլ, թիկունքից էլ) կնոջս թիրախավորելը, իհարկե, ծայրահեղ անբարո վարմունք է։ Առաջնորդվել ու առաջնորդվում եմ «ամեն մեկի հատուցումը լինելու է ըստ իր արդարության» սկզբունքով, և բազմիցս տեսել եմ այդ սկզբունքի անշեղ գործողությունը։ Էլի եմ տեսնելու։ Բայց դա՝ հետո։
Իսկ հիմա ցանկանում եմ շնորհակալություն հայտնել զորակցության բոլոր ջերմ խոսքերի համար»,-ֆեյսբուքյան իր էջում գրել է  Ռուբեն Մելիքյանը՝ արձագանքելով ԲԴԽ որոշմանն ու դրան հետևած արձագանքներին։

Ավելի ուշ՝ այսօր  նա գրել է. 

«Երեկ հարյուրներով զորակցության հաղորդագրություններ ենք ստացել՝ ընկերներից, մտերիմներից, գործընկերներից, ծանոթներից ու անծանոթներից։
Ամենահուզիչը Արցախից ստացված տասնյակ հաղորդագրություններն ու մեկնաբանություններն են։ Մոտավորապես այսպես. «Պարոն Մելիքյան, պենդ կացիք, լոխ լավա ինան»։
Շշմելու մարդիկ են ապրում Արցախում։ 16 օր է՝ լիակատար շրջափակման մեջ են, բայց ի՛նձ են փորձում զորակցել մի առիթով, որն իրենց խնդիրների կողքին ուղղակի մի աննշան բան է թվում»։

Դատավոր Փիլոսյանին պատասխանատվության ենթարկելու միջնորդություն է ներկայացրել արդարադատության նախարարությունը՝ փաստաբան Գայանե Պապոյանի արված գրառման հիմքով։ 

Ըստ ԱՆ-ի, դատավորը թվով չորս քաղաքացիական գործերով վճիռները հրապարակվել ու հայցվորներին են ներկայացվել 1-2 տարի ուշացումով։ Միջազգային փորձագետ Կարո Ղազարյանը, որ այս վարույթի վերաբերյալ բաց նամակ է հղել USAID-ի ղեկավարին, հաշվել է,  որ 5000 գործ քննած դատավորի կատարողականությունը 99.9 տոկոս է։

«Քաղաքացիական գիտակցություն» ՀԿ նախագահ Նարեկ Սամսոնյանը մասնավորապես գրել է. 

«Իշխանություններին՝ Մելիքյանի հետ հաշվեհարդար տեսնելու գործում, իրենց գործուն մասնակցությամբ օժանդակել են կոնկրետ անձինք, որոնք դեռ ընդդիմադիր շրջանակներում իրենց լավ են զգում, կամ ոնց հարկն է վատ չեն զգում: Էս գործում կոնկրետ թուրքական իշխանություններին մատնագիր է ներկայացրել Էրիկ Ալեքսանյանի թիմակից, մի ընդդիմադիր «կուսակցության» հետ կապեր ունեցող գայանե պապոյանը: Սույն անձի պահվածքը ուղղակիորեն կապ ունի Էրիկ Ալեքսանյանի հետ ու փաստացի էս ամեն ինչի պատճառը Էրիկ Ալեքսանյանի ակնհայտ սուբյեկտիվ վերաբերմունքն է դատավոր Արուսյակ Ալեքսանյանի նկատմամբ»։

Փաստաբան Գայանե Պապոյանը, արձագանքելով իրեն ուղղված բազամթիվ քննադատություններին, գրել է. «Դատավորին կարգապականան պատասխանատվության ենթարկելու համար ես չեմ դիմել ո՛չ ԱՆ, ո՛չ էլ դատավորների ընդհանուր ժողովի էթիկայի և կարգապահական հարցերի հանձնաժողովին, այլ կարգապահական վարույթի հարուցման առիթ է հանդիսացել ԶԼՄ հրապարակումը։

Մասնավորապես ես, օգտվելով իմ ՖԲ հարթակից, գրառում եմ կատարել առ այն, որ դատավոր Փիլոսյանը 2 տարի է չի տրամադրում դատական ակտը, իսկ այդ ընթացքում պատասխանողը հասցրել է սնանկ ճանաչվել։ Նշված գրառումը տարածել է iravaban.net կայքը , որին այդ մասով ես որևէ հարցազրույց չեմ տվել: Կայքը պարզապես տարածել է իմ գրառումը։ Հենց դա էլ հանդիսացել է դատավորի նկատմամբ վարույթ հարուցելու առիթ։

Ինչ վերաբերվում է ՖԲ-ում գրառում կատարելուն, ապա որևէ մեկի համար նորություն չէ, որ փաստաբանական գործունեության ընթացքում յուրաքանչյուր փաստաբան տարբեր հարթակներով պարբերաբար բարձրաձայնում է դատական համակարգում առկա, դատավորի աշխատելաոճի հետ կապված խնդիրները, հայտնում իր դժգոհությունները:

Ես կատարել եմ գրառում, որով բարձրաձայնել եմ առկա խնդիրը, ընդ որում՝ նմանատիպ գրառումներ կատարել եմ տարբեր դատավորների վերաբերյալ, ինչը բխում է վստահորդի շահից, որը, թերևս, փաստաբանի համար պետք է լինի առանցքային։

Իսկ ինչ վերաբերվում է կարգապահական տույժի ընտրված տեսակին, ապա գտնում եմ, որ այն խիստ է և համաչափ չէ դատավորի կողմից թույլ տրված խախտման բնույթին»։

ԱԺ «Հայաստան» խմբակցության պատգամավոր Էլինար Վարդանյանը ԲԴԽ որոշմնան մասին գրել է. 

«ԲԴԽ-ն դադարեցրեց դատավոր Աննա Փիլոսյանի լիազորությունները՝ ֆեյսբուքյան գրառման հիման վրա կարգապահական վարույթ նախաձեռնելով դատավորի նկատմամբ:
ԲԴԽ անդամներից, ովքեր Մնացական Մարտիրոսյանին Կոռուպցիոն հանցագործությունների քննություն իրականացնող դատավորների կազմում էին ընտրել, ավելին սպասել անիմաստ էր: Զարմանալ ևս պետք չէ, սա դատական համակարգը յուրային դարձնելու հերթական քայլն է: Արդեն քանի տարի է իշխանությունները հետևողականորեն գնում են այդ ուղղությամբ: ԲԴԽ-ն այդ հարցում լավ գործիք է: Իսկ ԲԴԽ անդամ դառնալը ևս գին ունի:

Տպավորություն է, սակայն, որ այս քայլն ուղղված է նաև Ռուբեն Մելիքյանի դեմ՝ իր ընդդիմադիր հայացքներին հավատարիմ մնալու համար: Ռուբեն Մելիքյանին հարվածելու համար, նրա կնոջ լիազորությունների դադարեցումը, վտանգավոր նախադեպ է ստեղծում:

Հ.Գ. Ասել, թե Հայաստանում արդարադատությունը մինչև վերջին շունչը ոչնչացվել է, նշանակում է ոչինչ չասել»։

Աննա Փիլոսյանը հայտարարել էր.  «Կարծում եմ՝ իրավունք վաստակել եմ հայտարարելու, որ հեռանում եմ այնպես, ինչպես եկել եմ՝ խիղճս մաքուր ու ճակատս պարզ»: