Ձեր վստահելի աղբյուրը

Արդարադարության նախարարության կողմից շրջանառության մեջ դրված ռազմական դրության ժամանակ համացանցը սահմանափակելու վերաբերյալ նախագիծն իրավապաշտպան Ավետիք Իշխանյանի կարծիքով միայն մեկ նպատակի համար է՝ ամրապնդել օրվա իշխանությունն ու հաստատել երկրում վերջնական բռնապետություն։

«Այս օրինագծի նպատակը ցանկացած ժամանակ ռազմական դրություն հայտարարելն է, հատկապես այն դեպքում, երբ իրենց իշխանությանը վտանգ է սպառնում։ Օրինակ, եթե լինի ընդդիմության լուրջ դիմադրություն, ողջ ժողովուրդը դուրս գա իրենց հրաժարականի պահանջով, այդ ժանանակ ռազմական դրություն կհայտարարեն, ռեպրեսիվ ապարատը կմիացնեն և ողջ ընդդիմադիր գործիչներին, լրագրողական կայքերին կոչնչացնեն ու կհաստատեն վերջնական բռնապետություն»,- Panorama.am-ի հետ զրույցում ասաց Ավետիք Իշխանյանը։

Նա ընդգծեց՝ այս օրինագծի նպատակը ոչ թե պատերազմն է, հայրենիքի փրկությունը, այլ սեփական իշխանությունն ամրապնդելը, բռնպետություն հաստատելը։

«Ինչպես նշեցի, երբ իսկապես լուրջ ընդդիմություն ձևավորվի և սկսվի իշխանության դեմ պայքարը, այդ ժամանակ կհայտարարվի ռազմական դրություն։ Նպատակը դա է. ոչ թե հայրենիքի պաշտպանության համար է, այլ ընդդիմության դեմ իշխանությունն ամրապնդելու։

Կհայտարարվի ռազմական դրություն, երբ իշխանության կորստի վտանգ զգան»,- ասաց իրավապաշտպանը։

Ա. Իշխանյանի խոսքով, ժողովրդին կթողնեն Հանրային հեռուստաընկերության և այլ իշխանամետ լրատվամիջոցների  հույսին՝ այսինքն մեկ ուղղությամբ քարոզչություն։

«Այս նախագիծը որևէ առնչություն, աղերս չունի Ադրբեջանի սանձազերծած և շարունակվող պատերազմի հետ, ոչ մի աղերս չունի»,- շեշտեց իրավապաշտպանը։

Նա նաև նշեց, որ եթե լիներ իսկապես հայրենիքին նվիրված իշխանություն, որն ապացուցված կլիներ այս տարիներին, ապա կարելի էր այս օրինագիծը որոշ շտկումներով նույնիսկ քննարկել, բայց այս իշխանության համար հայրենիք, տարածքներ, զոհեր, զրո նշանակություն ունեն.
«Օրինակնե՞ր՝ խնդրեմ․ 2020թ․ պատերազմի, իմ համոզմամբ, հատուկ դեպի պարտության տանող ապիկար կառավարումը, կապիտուլյացիայից հետո տարածքների հանձնումը՝ Գորիս-Կապան ճանապարհը, Սև լիճը և այլ տարածքներ։ Արդեն այս տարի, որքան տարածքներ կորցրեցինք։ Եվ այս ամենը բացարձակապես չի անհանգստացնում  վարչապետ կոչեցյալին։

Սրանց միակ նպատակն իրենց իշխանությունը պահելն է։ Ինչպես Քովիդի համաճարակը օգտագործեցին իրենց հակառակորդների դեմ, այնպես էլ, այս «ռազմական դրություն» կոչված ֆարս օրինագիծը, ավելի ուժգնությամբ կօգտագործվի»։

Հիշեցնենք, որ արդարադատության նախարարությունը Իրավական ակտերի նախագծերի հրապարակման e-draft.am միասնական կայքում նախագիծ է շրջանառության մեջ դրել՝ առաջարկելով մի քանի օրենքում փոփոխություններ և լրացումներ, կատարել, մասնավորապես՝ «Ռազմական դրության իրավական ռեժիմի մասին» «Պաշտպանության մասին» «Զինվորական ծառայության և զինծառայողի կարգավիճակի մասին», «Վարչարարության հիմունքների եվ վարչական վարույթի մասին»։ Նշվում է, որ նախագծում առաջարկվող իրավակարգավումները միտված են ռազմական դրության իրավական ռեժիմի առավել արդյունավետ կանոնակարգմանը: Նախագծով առաջարկվող կարգավորումների ընդունման պարագայում, ի թիվս այլնի, կսահմանվեն՝ «Հայաստանի Հանրապետության տարածքում ինտերնետային կայքերի, սոցիալական ցանցերի, ինտերնետային հավելվածների գործողության ժամանակավոր կասեցման (արգելափակման), ինտերնետ հասանելիության մասնակի կամ ամբողջական սահմանափակման իրավական հիմքերը, ինչպես նաև Հայաստանի Հանրապետության տարածքում ինտերնետ հասանելիության սահմանափակման դեպքում պետական կառավարման համակարգի և տեղական ինքնակառավարման մարմինների, ռազմավարական նշանակության և պետական պահպանության ենթակա օբյեկտների և ենթակառուցվածքների, ինչպես նաև առանձին կազմակերպությունների (անկախ կազմակերպական-իրավական ձևից) ինտերնետ հասանելիության ապահովման կարգը»։