Ձեր վստահելի աղբյուրը

Ռուսական խաղաղապահ զորախմբի հասցեին ուղղված քննադատությունն անընդունելի են։ Այս մասին այսօր  ճեպազրույցում հայտարարել է ՌԴ ԱԳՆ պաշտոնական ներկայացուցիչ Մարիա Զախարովան։

Զախարովային ուղղվել է հետևյալ հարցը. «Լաչինի միջանցքն արդեն 18 օր է արգելափակված է։ Եվ, հաշվի առնելով, որ, փաստորեն, Ռուսաստանի Դաշնությունն ի վիճակի չէ ինքնուրույն ստիպել Ադրբեջանին կատարել իր պարտավորությունները՝ համաձայն 2020 թվականի նոյեմբերի 9-ի եռակողմ հայտարարության, հարց է առաջանում՝ հնարավո՞ր է այս հարցում համագործակցությունը ԵԱՀԿ Մինսկի համանախագահների հետ՝ հաշվի առնելով, որ թե՛ Ռուսաստանի Դաշնությունը, թե՛ ԱՄՆ-ն և թե՛ Ֆրանսիան մոտավորապես նույն դիրքորոշումն ունեն Լաչինի միջանցքի ապաշրջափակման և Արցախում հումանիտար ճգնաժամը կանխելու հարցում։ Հաշվի առնելով հումանիտար ճգնաժամը և ճանապարհի փակումը, հնարավո՞ր է Ստեփանակերտի օդանավակայանն օգտագործել Արցախ ապրանքների մատակարարման համար»։

«Ինչ վերաբերում է օդանավակայանի օգտագործմանը, ապա դրանք ԱԳՆ իրավասության հարցեր չեն։

Ինչ վերաբերում է ԵԱՀԿ Մինսկի խմբին, ես ուզում եմ հիշեցնել, թե ով է արգելափակել այն, ով է արգելափակել դրա աշխատանքը։ Դա Ռուսաստանը չէր, մենք չարգելափակեցինք նրա աշխատանքը, Ռուսաստանի արտգործնախարար Սերգեյ Լավրովը վերջերս շատ հստակ խոսեց ներկայիս վիճակի մասին։ Սրան ավելացնելու ոչինչ չկա։

Ինչ վերաբերում է Ռուսաստանի Դաշնության, ռուսական խաղաղապահ կոնտինգենտի հասցեին քննադատությանը, ապա այս իրավիճակում, կարծում եմ, դա անընդունելի է։ Մենք բազմիցս ասել ենք, որ ռուս խաղաղապահներն ամեն ինչ անում են տեղում իրավիճակը կարգավորելու համար։ Ոչ մի հասարակական հարձակում գործին չի օգնի: Ավելի վատ իրավիճակներն են եղել, մենք աշխատում ենք այս վիճակը բարելավելու ուղղությամբ»,- ասել  է նա։

Զախարովան մեկնաբանել է կառավարության նիստում Նիկոլ Փաշինյանի այսօր հնչեցրած հայտարարությունները

Փաշինյանն ասել է. «Եթե Ռուսաստանի Դաշնությունն օբյեկտիվ կամ սուբյեկտիվ պատճառներով չի կարողանում ապահովել կայունությունն ու անվտանգությունը Լեռնային Ղարաբաղում, կարծում եմ՝ ինքը պիտի քննարկում նախաձեռնի ՄԱԿ-ի Անվտանգության խորհրդում, և Լեռնային Ղարաբաղում Ռուսաստանի Դաշնության խաղաղապահ զորախմբին ՄԱԿ-ի Անվտանգության խորհրդի մանդատով օժտելու կամ Լեռնային Ղարաբաղ լրացուցիչ բազմազգ խաղաղապահ զորախումբ ուղարկելու հարց բարձրացնի:

Պիտի անկեղծ ասեմ, որ Հայաստանի Հանրապետությունը Լեռնային Ղարաբաղում Ռուսաստանի Դաշնության խաղաղապահ զորախմբի ներկայության համոզված կողմնակիցն է և այդ ներկայության ջատագովը: Բայց մեզ համար անընդունելի է Լեռնային Ղարաբաղի հայաթափման լուռ վկա դառնալու Ռուսաստանի Դաշնության խաղաղապահ զորախմբի ավելի ու ավելի տեսանելի դարձող գործելակերպը:

«Կարո՞ղ եմ ձեզ էլ մի հարց տալ. ինչ-որ մեկը կարո՞ղ է ամենայն պատասխանատվությամբ ասել՝ ոչ թե ակնթարթորեն, այլ հետագա պատասխանատվությամբ՝ ավելի լավ կլինե՞ր առանց Ռուսաստանի Դաշնության խաղաղապահ կոնտինգենտի։ Կարծում եմ՝ պատասխանն ակնհայտ է։ Հետևաբար, կարելի է խոսել այնքան, որ արդյունավետության բարձրացման անհրաժեշտություն կա և  այլն։ Եվ ևս մեկ անգամ կրկնում եմ, որ բոլորն այժմ աշխատում են այս իրավիճակի հանգուցալուծման ուղղությամբ։ Բայց նման բաներ ասելն ու հայտարարելը պարզապես գետնի վրա իրողությունները չհասկանալն է։ Ինձ այդպես է թվում»,- ասել է Զախարովան։

Զախարովան ճեպազրույցում անդրադարձել է նաև այն թեմային, որը շրջանառվում է վերջին օրերին, թե ճնշում է գործադրվում Հայաստանի վրա՝ ստիպելու նրան միանալ Ռուսաստանի և Բելառուսի միութենական պետությանը և Ադրբեջանին Երևանի կողմից չվերահսկվող միջանցք տրամադրել։

«Կարելի է հարց տալ՝ ո՞ւմ են հղում անում այն մարդիկ, ովքեր ասում են, թե իրենց պարտադրում են։ Ի՞նչ փաստերի են նրանք հղում անում։ Կա՞ն փաստեր։ Ինչպե՞ս է տեղի ունեցել հարկադրանքը։ Արդյո՞ք այս պարտադրանքը տեղի է ունեցել ընկերական մթնոլորտում, մի բաժակ կարմիր գինու շուրջ, թե՞ այդ պարտադրանքը ծանր էր ։ Ինչպե՞ս են նրանց ստիպել։ Սա պետք է հասկանալ։ Ինչպե՞ս եղավ այդ ամենը: Կամ մարդ ուղղակի դուրս եկավ ու ասաց. «Ես գիտեմ, որ ստիպել են, նույնիսկ հիշում եմ, բայց չեմ հիշում՝ ով և չեմ հիշում՝ ինչպես»։ Պետք է գոնե որոշ փաստեր լինեն»,- ասել է Զախարովան։

Նա նշել է, որ եթե նման հայտարարություններն արվում են առանց փաստերի, և միևնույն ժամանակ նշում են երկիրը և պնդում են, ապա դա պետք է հիմնավորվի փաստերով։

«Այդ ժամանակ հնարավոր կլինի մի բան ասել՝ ի հավելումն այն ամենի, ինչ արդեն ասել է ՌԴ նախագահի մամուլի քարտուղարը, որ ռուս պաշտոնյաներից որևէ մեկը նման բան չի ասել։ Նկատի ունեմ Հայաստանի միացումը միութենական պետությանը»,- հավելել է նա։

Նրա խոսքով, նույնը կարելի է ասել այն լուրերի վերաբերյալ, թե Մոսկվան պարտադրում է Երևանին իր վերահսկողությունից դուրս ինչ-որ միջանցքի տրամադրում.

«Սա կեղծիք է, որը նույնպես բազմիցս ասվել է։ Հայաստանի, Ադրբեջանի և Ռուսաստանի Դաշնության ղեկավարների 2021 թվականի հունվարի 11-ի հայտարարության համաձայն՝ տարածաշրջանում բոլոր տնտեսական և տրանսպորտային կապերի ապաշրջափակման եռակողմ աշխատանքային խմբի շրջանակներում քննարկվում են հաղորդակցությունների բացման տարբեր ուղիներ, այդ թվում՝ Հայաստանի հարավում երկաթուղային գծի երթևեկության վերականգնման հետ կապված հարցեր։ Այս աշխատանքի սկզբունքներից մեկը, որը չի վիճարկվում ոչ Երևանի, ոչ Բաքվի կողմից, այն է, որ երթուղիների նկատմամբ ինքնիշխանությունը պատկանում է այն կողմին, ում տարածքով նրանք անցնում են»։