Ձեր վստահելի աղբյուրը

Հայաստանում առաջին անգամ անցկացվում է Մանսուրյանի անվան կոմպոզիտորների միջազգային մրցույթ։ Այն ինքնատիպ է իր բովանդակությամբ ու ձևաչափով. մրցույթին պետք է ներկայացվեն ստեղծագործություններ, որտեղ միահյուսված են հայկական պոեզիան և երաժշտությունը, ժանր, որին իր ստեղծագործական կյանքում բազմիցս անդրադարձել է մաեստրո Մանսուրյանը։ Մրցույթի կազմակերպիչների հաղորդմամբ, այս պահին ընթանում է կոմպոզիտորների հայտերի ընդունման գործընթացը։ «Կողբ» հիմնադրամի նախաձեռնությամբ իրականացվող մրցույթի ժյուրիի անդամներից է ՀՀ ժողովրդական արտիստ, Մովսես Խորենացի մեդալակիր, Հայրենիքին մատուցած ծառայությունների համար ՀՀ երկրորդ աստիճանի մեդալակիր, Հայաստանի պետական կամերային երգչախմբի գեղարվեստական ղեկավար և գլխավոր դիրիժոր  Ռոբերտ Մլքեյանը։

Մրցույթի և հունվարի 27-ին՝ Տիգրան Մանսուրյանի տարեդարձին նվիրված համերգի մասին մանրամասներ է հայտնում Ռոբերտ Մլքեյանը։

-Պարոն Մլքեյան, Տիգրան Մանսուրյանի անվան կոմպոզիտորների միջազգային մրցույթի շրջանակում Դուք՝ որպես ժյուրիի անդամ, ներկայացված հայտերը գնահատելիս ի՞նչ սկզբունքներով եք առաջնորդվելու։

-Իմ կողմից առաջնահերթությունը կտրվի ստեղծագործողի՝ բացարձակ իմացությանն այն ձայնի վերաբերյալ, որի համար գրված է ստեղծագործությունը, տեղեկացվածությանը ձայնածավալի հնարավորություններին, տեմբրային առանձնահատկություններին, ձայնածավալի ճիշտ օգտագործմանը, տեքստի՝ բառի հետ կապված շեշտադրություններին ըստ բառակազմության։ Հիմնական խնդիրը պետք է դրվի հայոց լեզվի ճիշտ շեշտադրության վրա։

-Ի՞նչ խորհուրդ կտաք մրցույթին մասնակցել ցանկացող կոմպոզիտորներին։

-Որպես պարբերաբար աշխարհի տարբեր ստեղծագործողների հետ համագործակցող և կատարումների միջոցով մեկնաբանող անձ՝ խորհուրդ կտամ լինել հնարավորինս համարձակ, չկաշկանդվել և չվախենալ ո՛չ ժանրային առանձնահատկություններից, ո՛չ էլ ժամանակագրությունից, ազատ և անվախ ընտրել հայ պոեզիայի յուրաքանչյուր ներկայացուցչի՝ վաղ միջնադարից մինչև մեր օրեր, շրջանցելով հասարակության մեջ ձևավորված կարծրատիպերը։

-Հայաստանում անցկացվում են երաժշտական մի շարք մրցույթներ։ Մանսուրյանի անվան կոմպոզիտորների միջազգային մրցույթը, ըստ Ձեզ, ինչո՞վ է առանձնանում։

-Առանձնանում է նրանով, որ մասնակիցները դառնալու են մի մրցույթի մասնակից, հաղթող, որը կրում է այն մարդու անունը, ով իր ստեղծագործական կյանքի մի ամբողջ մեծ ընթացքում լավագույն կերպով է ներկայացնում այս մրցույթի առաքելությունը՝ պոեզիայի, հայոց խոսքի և երաժշտության սինթեզը` ստեղծագործության հաջողությամբ է՜լ ավելի հանրահռչակելով մեր լեզուն ու խոսքը։

-Մրցույթում ներկայացվող ստեղծագործությունները պետք է գրվեն հայկական պոեզիայի նմուշների հիման վրա։ Ընդհանրապես այս ձևաչափը՝ պոեզիայի և երաժշտության միաձուլումը, ընդունվա՞ծ է ժամանակակից երաժշտարվեստում։

-Միանշանակ ընդունված է ամբողջ աշխարհում, Հայաստանում՝ հատուկենտ։ Կարծում եմ՝ բարդություններից մեկը մեր լեզուն է՝ բանահյուսություն, շեշտադրում։ Քչերն են համարձակվում մտնել այդ բարդ ու պատասխանատու աշխատանքի մեջ։ Բայց ուսումնասիրելով Տիգրան Մանսուրյանի երաժշտական գործունեության արդեն երկարաժամկետ ընկալումն ու հաջողությունն աշխարհում՝ կարող են վստահել այս մոտեցմանն ու նաև մասնակցել մրցույթին։

-Դուք ղեկավարելու եք հունվարի 27-ի համերգը՝ նվիրված մաեստրո Մանսուրյանի տարեդարձին, որի ընթացքում ներկայացվելու են Մանսուրյանի ստեղծագործությունները, որոնք պրեմիերաներ են։ Ծանոթացե՞լ եք արդեն ստեղծագործություններին։ Եվ ըստ Ձեզ՝ ի՞նչ խորհուրդ ունեն դրանք։

-Ծանոթ լինելը շատ մեղմ նկարագիր է: Ես տիրապետում եմ ամեն նոտային, բառին, վանկին, տառին և սովորաբար առանց ծանոթ լինելու երբեք չեմ աշխատում ոչ մի ստեղծագործության վրա, անկախ նրանից, թե ով է հեղինակը։ Գրվել են ստեղծագործություններ, որոնք հայ ազգային մշակույթի համար բարձրարժեք և մնայուն են։ Բացի այդ, այս տեղծագործությունների հնչեցմամբ ապագա կամ արդեն գործող կոմպոզիտորները կունենան հանճարեղ ձևակերպված պոեզիա-երաժշտություն համադրության օրինակներ, որոնք կլինեն ուղեցույց և օրինակ նրանց համար։