Ձեր վստահելի աղբյուրը

«Նախագծով իրականում փորձ է արվում 2020թ.-ի և 2022 թ.-ի սխալները լեգիտիմացնել և իրավական դաշտ ստեղծել, որպեսզի մարդիկ հարցեր չտան, թե ի՞նչ հիմքով նախկինում արգելափակվեցին կայքերը»,-հրավիրված ասուլիսում հայտարարեց մեդիափորձագետ Արթուր Պապյանը՝ անդրադառնալով Արդարադատության նախարարության մշակած «Ռազմական դրության իրավական ռեժիմի մասին» օրենքում փոփոխություն կատարելու մասին նախագծին::

Գործադիրը նախագծով առաջարկում է ռազմական դրության ժամանակ սահմանափակել համացանցը:

Մեդիափորձագետը հայտնեց, որ օրենքում կարգավորումները հստակ չեն և հիշեցրեց, որ հիմքերի անորոշության պատճառով 44-օրյա պատերազմի ժամանակ արգելափակվեց «Տիկ Տոկ»-ը, բայց բաց մնաց «Թելեգրամ»-ը, որտեղ մի քանի անգամ շատ վնասական տեղեկատվություն կար:

Նա նաև նկատեց, որ տրամաբանական չէին պատերազմի ժամանակ արգելափակման նման մասնակի քայլերը:

Արթուր Պապյանը տեղեկացրեց, որ իր ղեկավարած «Բազմակողմանի տեղեկատվության ինստիտուտը» պատերազմի ժամանակ կատարված արգելափակումների վերաբերյալ հարցումներ էր ուղարկել ԱԱԾ-ին և օպերատորներին: Վերջիններս հայտնել են, որ օրենքի համաձայն պարտավոր են եղել համագործակցել ԱԱԾ-ի հետ, իսկ անվտանգության պատասխանատու գերատեսչությունից պատասխանել են, որ իրականացվել են երկրի անվտանգության ապահովմանն ուղղված գործողություններ: 

Նրա խոսքով՝ իր կազմակերպության հարցումները հանրային շահից էր բխում, որպեսզի նմանատիպ իրավիճակներում տեղեկատվական կազմակերպություններն ավելի հիմնավորված գործեն:

«Իշխանությունները, հավանաբար, տեսնում են առաջիկայում որոշակի զարգացումներ և ինտերնետի սահմանափակման կարիք»,-ենթադրեց Պապյանը և հանրային քննարկումներից խուսափելու միտում տեսավ այն փաստի մեջ, որ օրենքի նախագիծը քննարկման էր դրվել դեկտեմբերի 22-ին՝ նախատոնական շրջանում, որն ավարտվել է հունվարի 3-ին:

Մեդիափորձագետը կարևորեց պատերազմի ժամանակ ֆեյք լուրերի դեմ պայքարը, բայց առաջնային համարեց դրա դեմ կիրառվող գործիքների արդյունավետությունը, որոշակիությունը և տեղեկացրեց, որ մեդիա հանրության մոտ նախագիծը մտահոգություն է առաջացրել և մոտ օրերս կլինի հայտարարություն, որը հետաձգվել էր տոն օրերի պատճառով:

Տեղեկատվական անվտանգության փորձագետ Սամվել Մարտիրոսյանն էլ ասաց, որ նախագծում մտցված են ռեպրեսիվ գործիքներ, օրինակ՝ ինտերնետ կապի ամբողջական անջատում, որը նախկինում Հայաստանում երբեք չի արվել և պարզ չէ, թե դրա կիրառումն ի՞նչ հետևանքներ կարող է ունենալ:

Նա կանխատեսեց, որ ինտերնետի անջատումը կարող է բանկային խնդիրներ առաջացնի, բջջային կապն ամբողջությամբ անջատվի, քանի որ չկա օրենք, որով սահմանված լինի կրիտիկական ենթակառուցվածները, բայց ներկայացված նախագծով ստեղծվում է այդ ամենը միանգամից անջատելուհնարավորություն:

«Օրենքի նախագծով կարող են լրատվամիջոցներից ողջ տեխնիկական բազան տանեն, միայն նոթատետրը և գրիչը թողնել: Գրիչն էլ, որպես ոչ ռազմահայրենասիրական գործիք, ձեռքներից վերցնեն»,-նկատեց Մարտիրոսյանը:

Նա հայտարարեց, որ նախագծով ստեղծվել է գործիքակազմ, բայց չկա բովանդակային հիմքերը, թե ե՞րբ և ո՞ր դեպքերում է այն կիրառվելու:

Հիշեցնելով, որ «Տեղկատվության անվտանգության հայեցակարգն» ընդունվել է 2009 թվականին, որի ժամանակ առաջատար սոցիալական ցանցը դեռ «Օդնոկլասնիկ»-ն էր և նույնիսկ այն հաշվի չէր առնվել հայեցակարգում՝ մեդիափորձագետը հայտարարեց, որ նախագծում բազմաթիվ անորոշություններ կան, որոնք կամայական որոշումների հնարավորություններ են տալիս:

Նա հայտնեց, որ այսօր արդեն Հայաստանում կատարվում են անհասկանալի գործողություններ, երբ ադրբեջանական որոշ կայքեր արգելափակված են, բայց ավելի վատ բովանդակություն տարածող մյուս ադրբեջանական կայքերը բաց են, հետևաբար պետք է հստակեցվեն առաջարկվող սահմանափակման գործիքակազմի կիրառման հիմքերը: