Ձեր վստահելի աղբյուրը

«Ձեր հարցի մեջ կար արդեն պատասխանը: Դուք ասում եք ՀԱՊԿ-ի զորավարժությունը սպառնալիք կլինրե թուրք-ադրբեջանական տանդեմին, հետևաբար, ինչո՞ւ այդ զորավարժությունը Հայաստանում չեք անում»,-պատասխանելով թուրք-ադրբեջանական զորավարճություններին ի պատասխան ՀԱՊԿ զորովարժություններից հրաժարվելու Հայաստանի դրդապատճառների մասին լրագրողի հարցին՝ ասաց Նիկոլ Փաշինյանը:

Հիմնավորելով ընթացիկ տարում ՀԱՊԿ զորավարժությունները Հայաստանում անցկացնելու առաջարկի մերժումը՝ բանախոսն ասաց.«Շատ պարզ պատճառով, որովհետև ՀԱՊԿ-ը եկավ, Ձեր ասած, թուրք-ադրբեջանական տանդեմի համար սպառնալիքը ստեղծեց, հետո ասաց՝ ցտեսություն, դե մենք գնացինք:

Պատկերացրի՞ք այդ իրավիճակը, հենց այդ պատճառով, որովհետև մենք ասում ենք՝ եկեք հասկանանք ՀԱՊԿ-ի պատասխանատվության գոտին ո՞րն է, որից հետո նոր մեր հարաբերությունները խորը և ինստիտուցիոնալ կառուցենք: Երբ ՀԱՊԿ-ը չի ասում, թե իր պատասխանատվության գոտին որն է՝ այն մեր համար ֆունդամենտալ հիմնահարց է:  ՀԱՊԿ-ը չի արձանագրում, թե որտեղով է անցնում այդ կարմիր գիծը: Ասնեք՝ Սոթք-Խոզնավարով չի անցնում, Ջերմուկի մոտով չի անցնում, որտեղո՞վ է անցնում… Մինչև մենք այն չիմանանք՝ այ այդ իրավիճակում կհայտնվենք: Կհրավիրենք, կասենք՝ եկեք երկու օր սպառնալիք ստեղծեք թուրք-ադրբեջանական տանդեմի համար,  երրորդ օրը հանգստեցեք և չորրորդ օրը գնացեք ձեր գործերին, մենք էլի մնանք այդ տանդեմի առաջ դեմ հանդիման»:

Նիկոլ Փաշինյանը, պատասխանելով իշխանությունների կողմից վախեցած արտաքին քաղաքականություն տանելու մասին հարցին, հիշեց Վազգեն Սարգսյանի խոսքերը. «Ես վախենում եմ ոչնչից չվախեցողներից»:

ՀՀ գործադիրի ղեկավարը մեկնաբանեց նաև իր ղեկավարած իշխանության կողմից խաղաղություն մուրալու քաղաքականություն վարելու մասին հարցին:

«Ես համաձայն եմ, որ մուրալով խաղաղություն հնարավոր չէ ունենալ, այն հնարավոր է ունենալ վաստակելով: Կա խոսույթ, որ կարելի է խաղաղություն ունենալ այն պարտադրելով, բայց մեր փորձը ցույց տվեց, որ էդ էլ չի ստացվում, բայց որ խաղաղությունը պետք է վաստակել՝ ակնհայտ է»,-ասաց Փաշինյանը և, կարծիք հայտնելով, որ այդ որակումը քաղաքական գնահատականի հարց է, հավելեց. «Խաղաղության կարելի է հասնել դիտանկյունները որոշակիորեն փոխելով, իրողությունները և իրադրությունները ճիշտ գնահատելով, մաքսիմալ հաշվարկված քայլեր անելով, միջազգային ասպարեզում Հայաստանի դերը, նշանակությունը, տեսանելիությունը մեծացնելով, ՀՀ-ի ինստիտուցիոնալ ավելի բարձր կայացվածության մակարդակով և տարածաշրջանում հարաբերությունները փոխելով և այդպես շարունակ: Մենք խաղաղություն կարող ենք ունենալ, եթե ի վիճակի լինենք հանդուրժող հարաբերություններ հաստատել Թուրքիայի և Ադրբեջանի հետ՝ որոշակի համաձայնությունների դաշտ ձևավորելով և զարգացնել մեր հարաբերությունները նաև Իրանի և Վրաստանի հետ»:

Լրագրողի դիտարկմանը, թե Փաշինյանը հույս չի դնում ՀԱՊԿ-ի վրա, բայց հավատում է Ադրբեջանի և Թուրքիայի հետ հարաբերությունների կարգավորմանը՝ Փաշինյանը պատասխանեց. «Ես ՀԱՊԿ-ի վրա հույս դնում եմ, այլ բան է, որ ՀԱՊԿ-ը կարող է հուսախաբ անի: Իսկ Ադրբեջանի և Թուրքիայի հետ հարաբերությունների կարգավորմանը հավատում եմ մի պատճառով՝ որովհետև որևէ բան անելուց առաջ պետք է ինչ-որ ձևով հավատալ նրան: Եթե չենք հավատում՝ ինչո՞ւ ենք բանակցում, ձև՞ ենք անում: Փորձը ցույց է տալիս, որ ձևի համար բանակցությունն լավ տեղ չեն տանում»: