Ձեր վստահելի աղբյուրը

Հայաստանի իշխանությունները ռուս խաղաղապահներին չեն քննադատում, այլ միայն նրանց գործունեության վերաբերյալ մտահոգություններն են հայտնում։ Այսօր տեղի ունեցած ասուլիսում ասաց Նիկոլ Փաշինյանը՝ պատասխանելով հարցին, թե եթե նախկինում միայն Ադրբեջանն էր ռուս խաղաղապահներին քննադատում, ապա այսօր ՀՀ իշխանություններն են ակտիվորեն քննադատություններ հնչեցնում` քաջ գիտակցելով, որ նրանց մանդատը սահմանափակվում է ուժ չկիրառելով։

Դիտարկմանը, թե Երևանը որքանո՞վ է ներգրավված ռուսական կողմի հետ բանակցություններում, արդյոք Փաշինյանն անձամբ հանդիպել ու քննարկել է Լաչինի հետ կապված հարցերը խաղաղապահ զորախմբի հրամանատար Անդրեյ Վոլկովի հետ, Փաշինյանը նշեց՝  ռուս գործընկերների ուշադրությունն է հրավիրել այն փաստի վրա, որ Ադրբեջանում սկսվել է ռուս խաղաղապահների վարկաբեկման պետական արշավ, ինչն ակնհայտ է։

«Մենք պետք է հասկանանք խաղաղապահներն ինչ գործառույթ են իրականացնում։ Եռակողմ հայտարարությունը հստակ ձևակերպում է, որ Լաչինի միջանցքը մնում է խաղաղապահների վերահսկողության ներքո։ Համաձայն եմ, որ այսօր ռուս խաղաղապահներն են ԼՂ ժողովրդի անվտանգությունն ապահովում, բայց մենք ունենք Փառուխի դեպքերի նախադեպը, երբ ադրբեջանցիները մուտք են գործել ՌԴ խաղաղապահների պատասխանատվության գոտի և մենք, ըստ էության, ոչ մի արձագանք չենք տեսել: Խաղաղապահների պատասխանատվության գոտում էլ՝ Խծաբերդում, ՀՀ քաղաքացիներ են գերեվարվել»,- ընդգծեց նա։

Ըստ Փաշինյանի՝ Լաչինի միջանցքում ռուս խաղաղապահների տեղակայումից հետո գերեվարվել են ՀՀ քաղաքացիներ, որոնք առնչություն չունեն ռազմական գործողությունների հետ. «Այսինքն, սրանք հարցեր են, որ հանրությանը պետք է պատասխան տանք։ Լավ, բերաններս ջուր առած-նստա՞ծ ենք, թե զբաղվում ենք այս հարցերով։ Մենք այս հարցերով զբաղվում ենք, և ոչ թե ՌԴ խաղաղապահ զորախմբի հրամանատարի, այլ ՌԴ խաղաղապահների գերագույն հրամանատարի հետ»։

Լրագրողը նաև հարցրեց՝ որն է այն կարմիր գիծը, որի դեպքում Հայաստանը կհրաժարվի խաղաղության պայմանագրի ստորագրումից, Նիկոլ Փաշինյանն ասաց՝ չեն ստորագրի, եթե խաղաղության համաձայնագրի տեքստը չհամապատասխանի ՀՀ պետական շահերին։

Ճշտող հարցին՝ արդյոք կա նման փաստաթուղթ, նա արձագանքեց. «Եթե լիներ այդպիսի փաստաթուղթ, ես կասեի, որ արդեն ստորագրել եմ կամ վաղը պատրաստվում եմ ստորագրել։ Մենք մեր արձագանքներն ուղարկել ենք Ադրբեջանին և դեռ պատասխան չենք ստացել։ Ես ասել եմ, որ մենք պատրաստ ենք ստորագրել, և մեզնից կախված ամեն ջանք կգործադրենք, որ ստորագրենք խաղաղության փաստաթուղթ»։

Նրա խոսքով՝ եթե հաջողվի հասնել մի կետի, երբ խաղաղության փաստաթուղթը պատրաստ կլինի, դա ոչ թե վատ, այլ լավ լուր կլինի, քանի որ կնշանակի՝ ՀՀ շահերը բալանսավորված պաշտպանվում են։

Փաշինյանը միաժամանակ նշեց, որ խնդիրը ոչ միայն թղթի բովանդակությունն է, այլև այդ բովանդակության իրագործումը։

«Նոյեմբերի 9-ին էլ ստորագրված փաստաթուղթ ունենք, բայց փաստն այն է, որ եռակողմ հայտարարությունն այսօր չի կատարվում։ Մենք կարող ենք խաղաղության պայմանագիր ստորագրել, անունը դնենք խաղաղության պայմանագիր, ստորագրենք, բայց եթե այդ թղթի կիրառման և իրագործման մեխանիզմները չլինեն, մենք կարող է «խաղաղության պայմանագիր» անունով թուղթ ստորագրենք և մի շաբաթ հետո ստանանք նոր պատերազմ կամ նոր էսկալացիա»,- նշեց նա։

Ըստ Փաշինյանի՝ ուրախ կլիներ, եթե նման փաստաթութղթ լիներ ու ինքն այսօրվա ասուլիսում խոսեր դրա դյութների և մեխանիզմների մասին։ «Վատ է, որ չկա»,- ասաց նա։