Ձեր վստահելի աղբյուրը

«Զորավարժություններն անցկացվում են ոչ թե սպառնալիքներից, մարտահրավերներից խուսափելու համար, այլ ընդհակառակը՝ սպառնալիքներին, մարտահրավերներին դիմագրավելու համար»,- ԱԺ-ում լրագրողների հետ զրույցում ասաց ԱԺ «Հայաստան» խմբակցության ղեկավար, պաշտպանության նախկին նախարար Սեյրան Օհանյանը՝ պատասխանելով հարցին, թե ինչպե՞ս կգնահատեք Նիկոլ Փաշինյանի երեկվա հայտարարությունը, որ ՀԱՊԿ զորվարածությունները Հայաստանում չեն կայանա, նպատակահարմար չի համարում, կարող է լարվածություն ստեղծել տարածաշրջանում։

Նա նշեց, որ զորավարժությունների անցկացման հիմնական նպատակը զորքերի պատրաստության  կատարելագործումն է, իսկ ՀԱՊԿ շրջանակներում նաև միջազգային փորձի փոխանակումն է։

«Հայտարարությունը, որ կարող է  ավելորդ լարվածություն ստեղծի տարածաշրջանում,  խոսում է  այն մասին, որ այսօրվա իշխանությունները  որոշակի պայմանավորվածություններ ունեն ադրբեջանցիների, թուրքերի հետ, որ չպետք է  կատարելագործեն մեր ունակությունները ոչ միայն մեր բանակի ներսում, նաև ռազմաքաղաքական այն դաշինքի, որի շրջանակում մենք անընդհատ աշխատում ենք։

Եթե ինքն ասում է, որ տարածաշրջանում լարվածություն կարող է ստեղծել, դա նշանակում է, որ Ալիևի այն խոսքերը, որ չպետք է թույլ տան հայկական բանակը կայանա, որ լավ չի ընդունում, երբ հայկական բանակը նոր զենք-զինամթերք է ձեռք բերում  Հնդկաստանից, այսինքն այս պայմանավորվածությունն իրողություն է»,- ասաց Օհանյանը։

Նա նշեց, որ արագ տեմպերով պետք է մեր բանակը կատարելագործել, բանակի մարտունակությունը բարձրացնել։  Նա վստահ է, որ այդ զորավարժությունները ռազմական տեսանկյունից Հայաստանին օգուտ տալու էր։

«Հայ-ադրբեջանական սահմանները Ադրբեջանի բնակավայրերից շատ-շատ հեռու են, իսկ մեր բնակավայրերին շատ մոտ են սահմանները: Մենք ունենալով մեր հետևում ժողովուրդ, ենթակառուցվածքներ, հայկական բնակավայրեր, չկարողացանք արագ կազմակերպվել և հիմնական սահմանային, շփման գծում ռազմավարական բոլոր կետերը զբաղեցնել, մեր երկիրը պաշտպանել: Ադրբեջանը երկրի խորքում ունեցած բնակավայրերից ենթակառուցվածքներ, ճանապարհներ չունենալով այդքան արագ կարողացավ գալ, մեր քթի տակ բարձրանալ մեր սահմանները և հետևից արագ բոլոր ճանապարհները, ենթակառուցվածքները, դիրքերը ամրապնդել, որովհետև օգտագործեց իր պետության շինարարական ամբողջ ներուժը: Իսկ մեր պետության շինարարական ներուժը օգտագործվում է այլ ուղղություններով»,-ասաց նա:

Սեյրան Օհանյանը նաև նշեց. «Այնպես չէ, որ մենք բոլորս, տարբեր անհատներ, շատ գոհ ենք ՀԱՊԿ-ի գործողություններից։ ՀԱՊԿ-ն, ի տարբերություն ՆԱՏՕ-ի, նոր կառույց է, որոշումների ընդունումը, ընթացակարգերը, գործողությունները, տարբեր տիպի միջոցառումներ դեռևս կատարելագործման խնդիր ունեն, հատկապես ՀՀ տարածքում, որը ՀԱՊԿ ընդհանուր տարածքից կտրված է, ՀՀ տարածքում օպերատիվ տարածման,  օպերատիվ պաշարումների ձևավորվման, ամենակարևորը տարանցիկ փոխադրման խնդիրներ կան, որոնք ազդում են մեր ընդհանուր հարաբերությունների վրա։ Բայց դա չի նշանակում, որ մենք ՀԱՊԿ անդամ չենք, ՀԱՊԿ-ի հետ չպետք է աշխատենք, չպետք է այսօր ՀԱՊԿ ունեցած հնարավորությունները, հատկապես զինված ուժերի ռազմական կոմպոնենտի զարգացման ուղղությամբ, օգտագործենք մեր ռազմական ներուժի բարձրացման ուղղությամբ»։