Կառավարությունը ձերբակալվածների պահման վայրերը կհամապատասխանեցնի միջազգային չափանիշներին
«Գտնում ենք, որ անհրաժեշտ է առանձին իրավական ակտով սահմանել ձերբակալվածներին պահելու վայրերի շինությանն առչվող առանձնահատկությունները՝ ՄԱԿ-ի խոշտանգումների կանխարգելման կոմիտեի կողմից առաջարկվող միջազգային չափանիշներին համապատասխանեցնելու համար»,-ԱԺ Պաշտպանության և անվտանգության հարցերի մշտական հանձնաժողովում հայտարարեց ՀՀ ոստիկանության պետի տեղակալ Արթուր Մարտիրոսյանը:
Նա տեղեկացրեց, որ ՀՀ նոր քրեական և քրեական դատավարության օրենսգրքերի ուժի մեջ մտնելու կապակցությամբ կառավարության որոշմամբ փոփոխություն է կատարվել 2008թ. հունիսի 5-ի թիվ 574-Ն որոշմամբ հաստատված Ոստիկանության համակարգում գործող ձերբակալվածներին պահելու վայրերի ներքին կանոնակարգում, և քանի որ «Ձերբակալվածներին պահելու վայրերի շինության և կահավորման առանձնահատկությունները» դուրս են Ներքին կանոնակարգի կարգավորման առարկայից, շինությանը վերաբերող դրույթները չի ներառվել նշված որոշման մեջ:
Փոխոստիկանապետի խոսքով՝ Սահմանադրության 6-րդ հոդվածի 2-րդ մասի դրույթներն ապահովելու նպատակով՝ անհրաժեշտություն է առաջացել «Ձերբակալված և կալանավորված անձանց պահելու մասին» օրենքում նախատեսել լիազորող նորմ:
Արթուր Մարտիրոսյանը հատնեց, որ ձերբակալվածների պահման շինության առանձնահատկությունների վերաբերյալ առանձին իրավական ակտի բացակայության դեպքում անհնար է դառնում իրավասու վերադաս մարմինների կողմից դրանց կառուցման և հիմնական վերանորոգման ընթացքում հսկողություն սահմանել շինարարական այնպիսի առանձնահատկությունների վրա, որոնց բացակայության դեպքում խախտվում են պահվող անձանց իրավունքները:
«Հարկ է նաև նշել, որ ձերբակալվածների պահման վայրերում (ՁՊՎ) վերահսկողություն իրականացնող հասարակական դիտորդական խմբի և ՀՀ մարդու իրավունքների պաշտպանի գրասենյակի աշխատակիցների կողմից մշտական ստուգայցեր են կատարվում և բոլոր ստուգայցերի արդյունքում արձանագրվում են մարդու իրավունքների այնպիսի խախտումներ, որոնք ուղղակի կապված են շինարարական առանձնահատկությունների հետ: Վերջիններիս կողմից հատկապես նշվում են, որ ՁՊՎ-ներում առկա չեն աստիճանների թեքահարթակներ, զուգարաններն առանձնացված չեն լոգարաններից, խցերի պատուհանները փոքր են, ինչի պատճառով խոչընդոտվում է բնական լուսաթափանցելիությունը և օդափոխությունը, բուժզննության սենյակները համատեղված են այլ նշանակության սենյակների հետ, տեսակցության սենյակը չի համապատասխանում միջազգային ստանդարտներին՝ չի ապահովվում պահվող անձի և տեսակցողի ֆիզիկական շփումը, զբոսաբակերը չունեն ծածկեր, որոնք կպաշտպանեն արևի ուղիղ ճառագայթներից ու տեղումներից, խցերում արհեստական լուսավորությունը գիշերային ժամերին թուլացնելու հնարավորությու չունի՝ պահվող անձանց քունը չխանգարվելու համար, հանձնուքների ընդունման համար սենյակներ առանձնացված չեն, հիվանդներին, հղի և իրենց մոտ անչափահաս երեխա ունեցող կանանց պահելու համար առանձնացված խցերն ապահովված չեն տաք ջրով և այլ թերություններ»,-ասաց փոխոստիկանապետը:
Նա հայտարարեց, որ նշված թերություններն ու խախտումները հնարավոր կլինի վերացնել «Ձերբակալված և կալանավորված անձանց պահելու մասին» օրենքում համապատասխան լրացում կատարելով և ՁՊՎ-երի շինության առանձնահատկություններն ՀՀ կառավարության առանձին որոշմամբ սահմանելով:
Հանձնաժողովը ՔՊ-ական պատգամավորների կողմ և Գեղամ Նազարյանի ձեռնպահ ձայներով ընդունեց նախագիծը և ավրատեց նիստը:
Լրահոս
Տեսանյութեր
Առնվազն երկու կողմ կա, ովքեր չէին ցանկանա, որ ԵԱՏՄ նիստը Հայաստանում անցկացվեր. Արթուր Խաչատրյան
