Ձեր վստահելի աղբյուրը

Բուհերի ընդունելության կարգում նախորդ տարի կատարվել են փոփոխություններ, որոնց արդյունքում դիմորդը կարող է  միասնական քննություն հանձնել երկու անգամ։ Այդ իսկ պատճառով քննությունների փուլերն ավելացել են՝ 1-ին, 2-րդ, 3-րդ։ Ասուլիսում ասաց ՀՀ ԿԳՄՍ նախարարության գնահատման և թեստավորման կենտրոնի փոխտնօրեն Կարո Նասիբյանը։ 

Նա հայտնեց, որ առաջին փուլի քննությունները կայանում են հունվար-փետրվար ամիսներին, երկրորդը՝ ավանդական հունիս ամսվա քննություններ են, երրորդը՝ հուլիսի լրացուցիչ փուլի քննությունները։

«Միայն միասնական քննությունները կարող ենք հունվարին կազմակերպել, ներբուհական քննություններին այս փոփոխությունները չեն վերաբերվում, ներբուհական քննությունները շարունակում են մնալ նույն ձևով»,- ասաց Նասիբյանը։

Գնահատման և թեստավորման կենտրոնի փոխտնօրենն ընդգծեց, որ հունվար-փետրվար ամիսներին կայանալիք քննությունների համար դիմորդները լրացնում են միայն քննությունների դիմում-հայտ, այսինքն հայտում չեն լրացնում բուհ, մասնագիտություն։

«Բնականաբար, հունվարի քննություններից հետո որևէ մրցույթ չի կարող կայանալ։ Գնահատման և թեստավորման կենտրոնը մրցույթը կազմակերպում է  բոլոր քննությունների ավարտից հետո»,- նշեց Նասիբյանը։ 

2023/2024 ուստարվա բուհերի ընդունելության առաջին փուլի քննական  հայտագրման գործընթացն ավարտված է, հունվարի 15-ից սկսվում են առաջին փուլի քննությունները։ Քննությունների սկիզբը նախատեսված է 11։30-ին։

Միասնական քննությունների օրերն են՝

«Քիմիա»,  «Ռուսաց լեզու»-հունվարի 15
«Օտար լեզուներ» - հունվարի 22
«Հայոց լեզու և հայ գրականություն»-հունվարի 29
«Մաթեմատիկա»- փետրվարի 4
«Կենսաբանություն», «Աշխարհագրություն»- փետրվարի 5
«Հայոց պատմություն»,  «Ֆիզիկա» -փետրվարի 12։

«Հունվար-փետրվարի քննությունների համար մեր սպասվածից  ավելի դիմորդներ են հայտագրվել։ Եթե մենք սպասում էինք, որ նրանց թիվը կարող է լինել առավելագույնը 3000-5000, այսօր մենք ունենք հայտագրված 6871 դիմորդ, որոնք ցանկանում են հանձնել միասնական քննություն»,- ասաց Կ. Նասիբյանը։

Նա հայտնեց նաև, որ առաջին փուլի միասնական քննություններին կարող են մասնակցել  բոլոր նրանք, ովքեր ցանկանում են իրենց ուսումը շարունակել բուհերում առանց որևէ սահմանափակման ի տարբերություն հունիսին և հուլիսին կայանալիք  քննությունների և հայտագրման։

Կազմավորված է  29 միասնական քննական կենտրոնները, 10-ը Երևանում են, մարզերում՝ 1 կամ 2 կենտրոն։ Ավանդաբար Սյունիքում երկու միասնական կենտրոններ են կազմավորվում՝ Կապանում և Գորիսում։

ԳԹԿ փոխտնօրենի խոսքով, ամենից շատ դարձյալ հայտագրվել են «Անգլերեն» առարկայից քննություն հանձնողներ. քննություն կհանձնի 3139 դիմորդ, այնուհետև «Մաթեմատիկա»՝ 2950, «Հայոց լեզու և հայ գրականություն»՝ 2018։ 

Նա ասաց, որ ի տարբերություն ամառային քննական շրջանի, քննական կենտրոնների ընտրության հարցում այս հունվարյան քննական շրջանում որոշակի խնդիրներ կան, քանի որ  կան շատ թվով դպրոցներ, որոնց մարզադահլիճները համապատասխան ջերմություն չեն ապահովում. «Դիմել ենք ԿԳՄՍ նախարար Ժաննա Անդրեասյանին, որպեսզի դիմի մարզպետներին ու Երևանի քաղաքապետին հնարավորինս օժանդակելու քննության ընթացքում դպրոցներում համապատասխան ջերմություն ապահովելու հարցում»։

Քննությունները կազմակերպվելու են կիրակի օրերին, բացառություն է փետրվարի 4-ին, որը շաբաթ է. այն նպատակով է, որ դպրոցներում դպրոցական դասընթացը չխախտվի։

«Զգուշացնեմ, որ քննասենյակներում տեսախցիկներ տեղադրելու հնարավորություն չունենք. նախ մեր ժամանակը քիչ էր, չէինք կարող մրցույթ անցկացնել, իսկ տեսախցիկների տեղադրման ժամանակ մրցույթ է հայտարարվում, հաղթող կազմակերպությունը զբաղվում է այդ գործով։ Բացի այդ, մենք ինքներս չենք պատկերացնում, թե ինչպես պետք է տեսախցիկը տեղադրենք,  հեռուստացույցը դնենք միջանցքում, իսկ ծնողները դրսից, այս ցուրտ ժամանակահատվածում, հետևեն իրենց երեխաների քննության ընթացքին։ Իսկ ծնողներին չէիք կարող հրավիրել ներս, աղմուկը խանգարում է։

Ամառային քննությունների ժամանակ անպայման մենք նորից ունենալու ենք տեսախցիկներ»,- ասաց Կարո Նասիբյանը՝ հավելելով, որ կարգով նախատեսված չեն տեսախցիկներ, իրենք կարգից դուրս էինք դա կազմակերպում։

Առաջին փուլի քննության վարձաչափը 4500 դրամ է, ամառայինը՝ 1500 դրամ։

Նա հայտնեց, որ առաջին փուլում այն դիմորդները, ովքեր անհաջողությամբ են հանձնում կամ գնահատականն իրենց չի բավարարում, հնարավարություն ունեն ամռանը մասնակցել քննություններին։

ԳԹԿ փոխտնօրենը նաև ասաց, որ վերջին տարիներին, երբ տվյալ մասնագիտության քննության համար առարկան կամ-ով էր լինում, օրինակ, «Անգլերեն» կամ «Հայոց լեզու»,  դիմորդների ճնշող մեծամասնությունն ընտրում է  «Անգլերեն»։ Որպես կանոն «Անգլերեն» առարկայի քննության արդյունքները տարիներ շարունակ միշտ բարձր է  եղել։

«Երեխաների համար  կարծեք ավելի հեշտ է «Անգլերեն» առարկայից քննություն հանձնելը, քան մնացած առարկաներից։ Բնականաբար, իրենք օգտվելու են այդ հնարավորություններից։ Հիմա նույնը շարունակվում է. օրինակ, Իրավագիտություն մասնագիտության դեպքում «Պատմություն» առարկայից քննությունը պարտադիր է, «Անգլերեն» կամ «Հայոց լեզու»-ի դեպքում մեծամասնությունը նախընտրել է «Անգլերեն»»,- ասաց Կարո Նասիբյանը։

Ինչ վերաբերում է պետական ավարտական քննություներին, նա հայտնեց, որ դրանք արդեն սկսվել են։

«Երբ ներդրվեց այդ գաղափարը, սովորողները հիմնականում քննություն հանձնում են «Հայոց պատմություն» առարկայից։ Մոտ 22 հազար շրջանավարտ ունենք,  «Հայոց պատմություն»-ից քննություն է հանձնում  9165 շրջանավարտ, «Հայոց լեզու և  հայ գրականություն»՝ 4097, «Մաթեմատիկա»՝ 6218»,- ասաց  ԿԳՄՍ նախարարության գնահատման և թեստավորման կենտրոնի փոխտնօրեն Կարո Նասիբյանը։