Ձեր վստահելի աղբյուրը

«Ժողովուրդ» թերթը գրում է. ««Ժողովուրդ» օրաթերթը տեղեկացավ, որ Ամանորից առաջ իշխող խմբակցության պատգամավորներ Արմեն Խաչատրյանը, Հայկ Ցիրունյանը, Վահագն Ալեքսանյանը և Դավիթ Առուշանյանն այցելել են Արցախի շրջափակման հետևանքով Գորիսում մնացած արցախցիներին:

«Ժողովուրդ» օրաթերթի տեղեկություններով՝ հանդիպումն այդքան էլ հարթ չի անցել, արցախցիները բավականին սառն են ընդունել ՔՊ-ական պատգամավորներին: Ամեն դեպքում, արցախցիներն իրենց վերաբերմունքն են ցույց տվել ՔՊ-ականներին և հասկացրել են, որ Արցախում այսօր ստեղծված իրավիճակի առաջին պատասխանատուն և մեղավորը հենց իրենք են: Այս առիթով մեկնաբանություն խնդրեցինք իշխող խմբակցության պատգամավոր Վահագն Ալեքսանյանից, որն արձագանքեց.

«Հանդիպումը հարթ է անցել, որևէ միջադեպ կամ դժգոհություն չի եղել: Արցախցիներից հետաքրքրվել ենք՝ ինչ խնդիրներ կան, փորձել ենք լուծումներ գտնել, դիմել ենք նաև մարզպետարան: Ընդդիմադիր լրագրող էլ է այնտեղ եղել, կարող եք իրենից հարցնել»:

Հավելենք, որ այդ հանդիպումից հետո շատ ՔՊ-ականներ խուսափում են այլևս այցելել արցախցիներին: Նրանցից շատերը արդեն մեկ ամիս է՝ մնացել են Երևանում և չեն կարողանում վերադառնալ Արցախ, բայց իշխող պատգամավորներն այլևս չեն այցելում»։

Մանրամասները թերթի այսօրվա համարում