Ձեր վստահելի աղբյուրը

«Ադրբեջանի հանցավոր գործողությունների հետևանքով շուրջ 120 հազար մեր հայրենակիցներ պատանդի կարգավիճակում են հայտնվել»,-ԱԺ Արտաքին հարաբերությունների հանձնաժողովի նիստում հայտնեց «Հայաստան» խմբակցության պատգամավոր Անդրանիկ Թևանյանը՝ ներկայացնելով Ադրբեջանի կողմից Լաչինի միջանցքը պարբերաբար փակելու կապակցությամբ ՀՀ Ազգային ժողովի հայտարարության նախագիծը:

Ընդդիմադիր պատգամավորը հիշեցրեց, որ  «Հայաստան» խմբակցությունն այն արդեն ներկայացրել էր դեկտեմբերին, ըստ որի՝ Ադրբեջանը միջազգային հանցագործություն է իրականացնում 120 հազար մարդու հանդեպ՝ ստեղծելով քաղաքական, անվտանգային, գոյաբանական և հումանիտար ճգնաժամ:

«Կարծում ենք, որ նոյեմբերի 9-ի պայմանավորվածությունների խախտում է տեղի ունենում և ՌԴ խաղաղապահները պետք է բոլոր ջանքերը ներդնեն, որպեսզի այդ միջանցքը բացվի»,-հայտնեց պատգամավորը և հավելեց, որ Հայաստանն էլ պետք է ամեն կերպ աջակցի Արցախի ապաշրջափակման գործողություններին:

Թևանյանը հիշեցրեց, որ ներկայացված հայտարարության մեջ արձանագրվում է, որ շրջափակման գործողությունն ցույց է տալիս, որ Արցախը չի կարող լինել Ադրբեջանի կազմում, իսկ Հայաստանն պետք է իրականացնի իր հանձնառությունը Արցախի անվտանգության ապահովման, ինքնորոշման իրավունքի համար:

«Եթե Հայաստանը չի իրականացնում իր այս ֆունկցիաները, ապա այն նշանակում է, որ Արցախի մեր հայրենակիցները վտանգվում են ոչ միայն ադրբեջանական գործողությունների արդյունքում, այլ՝ նաև Հայաստանի դիրքորոշման:

Մեր և իշխանությունների դիրքորոշումների տարբերությունն այն է, որ իշխանություններն ընդունում են Ղարաբաղը Ադրբեջանի կազմում և այն հրապարակային ասվեց: Այս իշխանությունները համարում են, որ արցախցիները պետք է շփվեն Բաքվի հետ ադրբեջանական օրենսդրության շրջանակներում: Հայաստանի և Ադրբեջանի իշխանությունների տեսակետները նույնական են այս հարցում: Նրանց թիրախներն նույնպես նույնն են՝ թիրախավորել են ռուս խաղաղապահներին և Ղարավբաղի իշխանություններին:

Այս մեկ ամիսը ցույց տվեց, թե ինչի կարող է հանգեցնել այն քաղաքականությունը, որը որդեգրել է Հայաստանի իշխանությունը: Լաչինի միջանցքը փակվել է ոչ միայն Ադրբեջանի հանցավոր գործողությունների արդյուքում, այլև՝ նախորդ տարի Պրահայում տեղի ունեցած քառակողմ հանդիպման, որտեղ համաձայնություն է ձեռք բերվել, որ Ղարաբաղը պատկանում է Ադրբեջանին»,-հայտարարեց Անդրանիկ Թևանյանը և հիշեցրեց, որ այդ մասին բաց տեքստով հայտարարել է նաև Ալիևը՝ Աստանայում տեղի ունեցած գագաթնաժողովում և որևէ հակադարձում չի ստացել:

Ընդդիմադիր պատգամավորի խոսքով՝ Նիկոլ Փաշինայնի բոլոր հայտարարությունները և վերջին ասուլիսը ցույց են տվել, որ Լաչինի միջանցքի փակման պատճառներից մեկն էլ ՀՀ-ի վարած քաղաքականությունն է, որը Ղարբաղը ճանաչում է, որպես Ադրբեջանի մաս:

Թևանյանը նկատեց, որ վերջին ասուլիսի ժամանակ Փաշինյանը հայտարարեց, թե Արցախի և ՀՀ-ի դիրքորոշումները նույնական են, բայց Արցախից այդ միտքը հերքել են:

«Կարող ենք արձանագրել, որ Հայաստանի և Արցախի իշխանությունների մոտեցումները տարբեր են, Հայաստանի և Ադրբեջանի մոտեցումները գրեթե 100%-ով նույնական են և այս պայմաններում Լաչինի միջանցքը շարունակելու է փակ մնալ այնքան, քանի դեռ Հայաստանի դիրքորոշումը չի փոխվել»,-ասաց Թևանյանը, և շեշտելով, որ ընդդիմության ներկայացրած հայտարարության հիմքում ընկած է քաղաքական ուղղության փոփոխությունը, որով Հայաստանը պետք է հետապնդի ԼՂ ժողովրդի ինքնորոշման հարցը, հավելեց. «Հայաստանը չպետք է առաջնորդվի՝ «Ղարաբաղը տանք, որ, միգուցե, խաղաղ ապրենք, կամ Հայաստանը փրկենք» կեղծ թեզերով»:

Նա իր կարծիքը հիմնավորեց նրանով, որ Հայաստանի և Արցախի անվտանգային համակարգերը փոխկապակցված են, և Ադրբեջնը չի թաքցնում, որ ողջ Հայաստանի նկատմամբ ունի ծավալապաշտական նկրտումներ, որը հաստատում է նաև ՀՀ իշխանությունը, բայց նաև հայտարարում, թե գնալու են հանձնելու ժանապարհով:

Հարակից զեկուցող ՔՊ-ական պատգամավոր Մարիա Կարապետյանն ընթերցեց 2022 թ դեկտեմբերի 14-ին ԱԺ-ի ընդունած ՔՊ-ի հայտարարության տեքստը և, վնասակար համարելով ընդդիմության ներկայացրած հայտարարությունը, կոչ արեց դեմ քվեարկել նախագծին:

Մեկ ժամ տևած քննարկման վերջում Անդրանի Թևանյանը հայտնեց, որ եթե նախագիծը բացասական եզրակացությամբ մտնի ԱԺ օրակարագ և ՔՊ-ական պատգամավորները դեմ քվեարկեն դրան, ապա Ադրբեջանն էլ ավելի է լկտիանալու, հետևաբար՝ նախագիծը միչև երկու ամսով հետ է վերցնում՝ նաև լրամշակման համար: