Ձեր վստահելի աղբյուրը

«Մեզ համար պարտավորություն է լինել այստեղ, որովհետև առկա են լարվածությունները, որոնք ակտիվանում են, բռնկվում են և խոցելի են դարձնում Հայաստանը»,- ՀՀ ԱԺ նախագահ Ալեն Սիմոնյանի հետ համատեղ ասուլիսում ասաց Ֆրանսիայի Ազգային ժողովի նախագահ Յաել Բրաուն-Պիվեն, ով Հայաստան է  ժամանել  երեկ։

Նա նշեց, որ Ֆրանսիան պետք է  կանգնած լինի եղբայրական ժողովուրդների և եղբայրական երկրների կողքին, որոնք ենթարկվում են սպառնալիքների, որոնց տարածքային ամբողջականությունն է ենթարկվում սպառնալիքների և հարձակումների։

«Սեպտեմբերյան իրադարձությունները մեծ աղմուկ բարձրացրեցին Ֆրանսիայում և Ազգային ժողովն արձագանքեց այդ աղմուկին բանաձև ընդունվելով, որով պահանջում է Ադրբեջանի կողմից Հայաստանի հանդեպ ագրեսիան դադարեցնել և Հարավային Կովկասում  հաստատել երկրատև խաղաղություն»,- հիշեցրեց Ֆրանսիայի ԱԺ նախագահը՝ հավելելով, որ Ֆրանսիան միշտ եղել է Հայաստանի կողքին։

Յաել Բրաուն-Պիվեն նշեց, որ շատ անհանգիստ են Լեռնային Ղարաբաղում ստեղծված իրավիճակի կապակցությամբ. «Այն մեզ մտահոգում է, որովհետև այն շրջափակումը, որ շարունակվում է, մարդասիրական այնպիսի իրավիճակ է ստեղծում, որը գնալով վատթարանում է: Շատ կարևոր է, որ վերականգնվի ճանապարհը,  ազատ երթևեկությունը Հայաստանի և Լեռնային Ղարաբաղի միջև, ինչպես նաև էլեկտրաէներգիան և ինտերնետը: Ամեն ինչ կանենք,  որպեսզի խուսափենք մարդասիրական աղետից»։

Ֆրանսիայի ԱԺ նախագահը  նաև ասաց, որ մտահոգված են 1500 հայկական  մշակութային և պատմական ժառանգության ճակատագրով, որը կարող է ոչնչացվել։ Ֆրանսիան ՅՈՒՆԵՍԿՕ-ի հետ միասին ջանքեր կգործադրի  այդ ուղղությամբ։ Ժառանգությունը մեր պատմությունն է, ժողովրդի ողջ կյանքն է»,- ասաց Յաել Բրաուն-Պիվեն։

Նա համոզմունք հայտնեց, որ անհրաժեշտ է բոլոր կողմերի միջև վերականգնել երկխոսությունը, որպեսզի հասնեն խաղաղ և կայուն լուծման։