Ձեր վստահելի աղբյուրը

Լեհական Լյուբլինում ծեծի է ենթարկվել ուկրաինացի փախստականների ընտանիքը, այդ լուրը «փոթորիկ» է առաջացրել նրանց հայրենակիցների շրջանում: Այդ մասին լեհական Dziennik Wschodni թերթի հրապարակած հոդվածին անդրադարձել է «ՌԻԱ նովոստի»-ն։

Միջադեպը տեղի է ունեցել քաղաքի կենտրոնում՝ ավտոբուսի կանգառում, երբ Օքսանա անունով փախստականը, նրա 27-ամյա հղի դուստրն ու 13-ամյա որդին վերադառնում էին զբոսանքից։ Տուժողի խոսքով՝ իրենց մոտեցել են երկու տղամարդ և ծխախոտ խնդրել։ «Մեզնից ոչ ոք չի ծխում: Նրանց դուստրն է նրանց ասել այդ մասին: Նա խոսում է լեհերեն, բայց ուկրաինական առոգանությամբ: Լսելով դա՝ նրանք ագրեսիվ են դարձել»,-ասել է Օքսանան՝ հավելելով, որ հայհոյանքն ուղեկցվել է անպարկեշտ բառերով և հայրենիք վերադառնալու պահանջով:

Երբ անչափահաս որդին ցանկացել է ոստիկանություն զանգահարել, ագրեսիվ տղամարդիկ փորձել են խլել հեռախոսը, տապալել գետնին ու հարվածել նրա գլխին, ծեծի են ենթարկվել նաև այն կանայք, ովքեր փորձել են պաշտպանել երեխային։

«Մի քանի հոգի տեսան դա: Ես օգնություն խնդրեցի, բայց ոչ ոք չպատասխանեց: Նույնիսկ տղամարդիկ պարզապես դիտում էին»,-դժգոհեց Օքսանան: Արդյունքում ամբողջ ընտանիքը հայտնվել է հիվանդանոցում, դեռահասի մոտ մատի կոտրվածք է ախտորոշվել: Տուժածները կարծում են, որ հարձակումը տեղի է ունեցել էթնիկ հողի վրա։ Ոստիկանությունը պարզել է հարձակվողների ինքնությունը, նրանք տեղի երկու բնակիչներ են՝ 25 և 30 տարեկան, և այժմ կատարվում է հետաքննություն։

Ինչպես նշում է Dziennik Wschodni-ն, միջադեպի մասին տեղեկություն է հրապարակվել սոցիալական ցանցերում, այն «փոթորիկ է առաջացրել փախստականների շրջանում»։