Ձեր վստահելի աղբյուրը

«Բոլորս տեսնում ենք, որ Նիկոլ Փաշինյանն ու նրա թիմը շատ գեշ կերպով փորձում են Ռուսաստանին հանել տարածաշրջանից՝ Հարավային Կովկասից։ Մշտապես զսպված ռուսական արձագանքները, որ միշտ լսել ենք, արդեն փոխվում են շատ կոպիտ, կոշտ, երկրի առաջին դեմքերին ոչ հարիր հայտարարությունների»,-ասաց «Հայրենիք» կուսակցության խոսնակ Սոս Հակոբյանը, որը մասնակցում էր Այլընտրանքային նախագծեր խմբի նախաձեռնած «Ինչպես Հայաստանն արձագանքեց Ալիևին» թեմայով քննարկմանը։

Նա հարց հնչեցրեց, եթե Ռուսաստանին հեռացնում են, կա՞ մեկ այլ աշխարհքաղաքական տեսանելի ուժ, որը մեր մեջքը շարունակելու է քիչ թե շատ պահել, մեզ նեցուկ լինել՝ հաշվի առնելով այն փաստը, որ մենք լինելով փոքր երկիր, պետք է բալանսավորենք մեր թշնամիներին այլ՝ ավելի մեծ ու ազդեցիկ երկրների հետ դաշինքներով։

«Վստահաբար չկա։ Ասուլիսում Նիկոլ Փաշինյանը մի այդպիսի տեսլական ներկայացրեց։ Դա Ադրբեջանի ախորժակը զսպելու իր յուրահատուկ մեթոդն է։ Մտնելով թուրքական ազդեցության դաշտ՝ հույս ունի, որ Ադրբեջանի վրա ազդեցություն ունեցող Թուրքիան գուցե բացառի տարածաշրջանում բախումները»,-ասաց Սոս Հակոբյանը։

Նա այս առումով ուշադրություն հրավիրեց այն փաստին, թե Թուրքիան ինչ օգնություն է ցուցաբերել Ադրբեջանին Արցախի դեմ պատերազմում, ինչպես նաև Էրդողանի կալվածատիրական նկրտումներին, որոնք էմոցիոնալ ֆոն են ստեղծում Ադրբեջանում։ Նա նկատեց՝  Թուրքիան այդպես «տիրում է» Ադրբեջանին, նրա հասարակությանը, մինչդեռ Հայաստանին ու Թուրքիայի նկատմամբ ապատիա ունեցող հայ հասարակությանը տիրելը լինելու է բռնաճնշումներով ու մշտապես մահակի առկայությամբ, ինչպես եղել է պատմության տարբեր ժամանակներում։

«Մենք պետք է հասկանանք, որ այս ճանապարհը տանելու է Թուրքիայի կողմից Հայաստանի ներքին կյանքի օկուպացիայի՝ անգամ մի կողմ թողնելով այն, որ 44-օրյա պատերազմում Ադրբեջանին օգնություն ցուցաբերած երկիրը դժվար շահագրգռված լինի մեր անվտանգությամբ»,-ասաց բանախոսը։

Անդրադառնալով պաշարված Արցախում տեղի ունեցող քաղաքական գործընթացներին՝ Սոս Հակոբյանը ցավ հայտնեց դրանց վերաբերյալ, անթույլատրելի ու հակացուցված համարեց բարձրաստիճան որևէ պաշտոնյայի հրաժարական։

«Այս իրավիճակում մեր հայրենակիցները զբաղված են ազդեցության գոտիներ բաժանելով, տիրելով։ Որևէ հրաժարական այս պայմաններում հակացուցված է, դա կարող է բերել պետական համակարգի ոչնչացման գործընթացի։ Հասկանալի է, որ Արցախում էլ պետք է լինի մրցակցություն, բայց այդ մրցակցությունը պետք է լինի նորմալ պայմաններում»,-նշեց Սոս Հակոբյանը՝ խորհուրդ տալով Արցախի, Հայաստանի պաշտոնյաներին քիչ տարվել լայվերով, ավելի շատ աշխատել, հիշեցրեց, որ Արցախում թիվ մեկ քաղաքական պաշտոնյան երկրի նախագահն է, ու պետք է իրեն պահի այնպես, ինչպես հարիր է առաջին դեմքին։

Նա ցավ հայտնեց, որ Արցախում նման իրավիճակի ականատես եղանք, ինչը թույլ տվեցին թե պետնախարարը, թե նախագահը։

«Կարծում եմ՝ շատ վտանագավոր է և մեզ կարող է տանել ինքնաոչնչացման այն կարծիքը, որ այսօր կամ վաղը պետք է Լաչինի միջանցքը բացվի, այլապես կորած ենք։ Իրավիճակն այնպիսին է, որ Լաչինի միջանցքը հեշտ չի բացվելու։ Թշնամու մոտ հաջողվել է դա դարձնել ազդեցության գործիք, և նա դա բանեցնում է։ Հնարավոր է, որ կարիք լինի երակարաժամկետ դիմակայության՝ հասկանալով, որ հետքայլը կարող է հանգեցնել անդառնալի հետևանքների»,-ասաց «Հայրենիք»-ի խոսնակն ու հիշեցրեց, որ մարդիկ իրենց իրավունքների համար պայքարել են տարիներ շարունակ,  հակառակ սցենարի դեպքում, երբ տրվում ես թշնամուն, փրկություն այլևս չկա։

Ընդդիմադիր քաղաքական ուժի ներկայացուցիչն ընդգծեց՝  ստեղծված իրավիճակում որպես օրակարգի առաջնահերթ խնդիր հասարակությանը պետք է  ներկայացնել իշխանափոխությունը։

«Բոլորը պետք է լավ հասկանան, ընդդիմությունը իրավիճակի փոփոխման գործիքներ, լծակներ չունի։ Դրանք ունի իշխանությունը։ Արցախում ինչքան էլ կազմակերպված լինի հասարակությունը, հույս ունեմ նաև քաղաքական իշխանությունը, Հայաստան պետության ազդեցությունը ԼՂ հարցի հանգուցալուծման, ընթացքի, տեսլականի, հորիզոնի առումով շարունակելու է մնալ շատ մեծ։ Մեծ խաղացողները՝ կլինի Ռուսաստանը, Եվրոպան խոսում են Հայաստանի հետ։ Հետևաբար մենք չպետք է մոռանանք, որ այստեղ իշխանափախության հարցը մնում է ոչ միայն Հայաստանի, այլ Արցախի հարց»,-ասաց նա։

Հակոբյանի խոսքով, իրավիճակը դժվար է, բայց անելանելի չէ։

Լուսանկարները՝ այսօրվա քննարկումից։