Ձեր վստահելի աղբյուրը

«Հրապարակ» թերթը գրում է.

«Անցած օրերին Արցախի ներքաղաքական զարգացումները դրամատիկ ընթացք ստացան, խոսվում էր պետնախարարի, նախագահի հրաժարականի մասին, սակայն երեկ ազատվեց ԱԱԾ տնօրեն Աշոտ Հակոբջանյանը, ինչը ևս տեղավորվում է Ռուբեն Վարդանյանի և Արայիկ Հարությունյանի հարաբերությունների տիրույթում և դրա հետևանքն է։ ԱՀ նախագահը փորձում է իր հավատարմությունը հայտնել Փաշինյանին և վստահեցնել, որ իրավիճակն ամբողջությամբ վերահսկում է։

Բանն այն է, որ Աշոտ Հակոբջանյանը Վարդանյանի մտերիմն է։ ԱԱԾ արդեն նախկին տնօրենը Վարդանյանի խորհրդական, գործարար Արման Հակոբջանյանի հորեղբորորդին է։ Ու չնայած Արցախի քաղաքական շրջանակները կանխել են Վարդանյանի հրաժարականը, որը, ըստ լուրերի, պարտադրվել էր Հայաստանից, սակայն այս պաշտոնանկությամբ Արայիկ Հարությունյանը փորձում է շահել Փաշինյանի սիրտը և հավաստիացնել, որ Վարդանյանը կզրկվի մյուս լծակներից ևս, եթե լոյալություն չդրսևորի ՀՀ իշխանությունների հանդեպ։ Իսկ ԱԱԾ նորանշանակ տնօրենը Հարությունյանի ամենամտերիմ ընկերներից մեկն է՝ գեներալ-մայոր Արարատ Մելքումյանը (մականունը՝ Չոլկա), որին երկու շաբաթ առաջ Վիտալի Բալասանյանի փոխարեն ԱԽ քարտուղար էր նշանակել։

Մինչ այդ Մելքումյանը զբաղեցնում էր ԱԱԾ տնօրենի տեղակալի պաշտոնը: Իսկ Արցախի ԱԽ քարտուղար է նշանակվել Սամվել Շահրամանյանը, ում արցախցիները որպես պետականամետ գործիչ են բնութագրում։ Նա 2018-20 թթ․ եղել է ԱԱԾ տնօրեն ու, ասում են, չի կատարել հեղափոխական իշխանությունների կամայական հրամանները՝ գերադասելով ներքին կայունության պահպանումը»։

Մանրամասները թերթի այսօրվա համարում