Ձեր վստահելի աղբյուրը

«Եթե հիշում եք՝ Լաչինի միջանցքի ապօրինի փակումից հետո չմասնակցեցինք Մոսկվայում նախատեսված եռակողմ հանդիպմանը, որը, ենթադրաբար, պետք է շարունակեր խաղաղության պայմանագրի նախագծի քննարկումները, և՝ հասկանալի պատճառներով չմասնակցեցինք»,-կառավարության հետ հարցուպատասխանի ժամին խորհրդարանում հայտարարեց Արարատ Միրզոյանը՝ պատասխանելով ՔՊ-ական պատգամավոր Լիլիթ Մինասյանի՝ խաղաղության պայմանագրի պատրաստման ընթացքին վերաբերող հարցին:

Հիշեցնելով, որ հայկական կողմը խմբագրական առաջարկներն է ներկայացրել Ադրբեջանական կողմին՝ Միրզոյանն ասաց, որ այժմ սպասում են նրանց արձագանքին:

«Մերնք մեր առաջարկները և կից հիմնավորումներն ուղարկել ենք ադրբեջանական կողմին և արդեն մեկ ամիս է որևէ արձագանք չունենք: Ես ուզում եմ ընդգծել, որ թյուր են այն պատկերացումները, որ հայկական կողմը դադարեցրել է, արգելակում կամ ոչ կառուցողական է խաղաղության այս գործընթացում և, մասնավորապես՝ խաղաղության պայմանագրի տեքստի շուրջ ընթանցող գործընթացներում: Կրկնում եմ՝ մենք մեր առաջարկներն ուղարկել ենք և ադրբեջանական կողմի պատասխանները պետք է լինեն, որոնք մինչ այս պահը չկան: Ստացվում է, որ, անկախ հանդիպումների հանգամանքից, գոնե մինչև այս պահն, ադրբեջանական կողմն է դադարեցրել բուն խաղաղության պայմանագրի տեքստի քննարկումները և զուգահեռաբար տեսնում ենք սադրիչ գործողությունները և՛ Լաչինի միջանցքում, և՛ նոյեմբերի 9-ի եռակողմ հայտարարության դրույթների խախտումներն Ադրբեջանի կողմից»,-ասաց նախարարը:

Լիլիթ Մինասյանը հետաքրքրվեց նաև ԵՄ-ից Հայաստան նոր երկարաժամկետ առաքելություն ուղարկելու հավանականության մասին:

Հայտարարելով, որ ցանկանում է առիթն օգտագործել և հայկական կողմի գնահատանքը հնչեցնել ԵՄ նախորդ դիտորդական առաքելության իրականացման կապակցությամբ՝ Միրզոյանն ասաց. « Այս առաքելությունը կարևոր գործառույթ կատարեց, Հայաստան-Ադրբեջան միջազգային սահմանին լարվածության աճի կամ հետագա էսկալացիայի կանխման գործում: Ավելորդ է նույնիսկ նշել, որ նոր դիտորդական առաքելության սահմանման պարագայում, մենք միայն աջակցող և կառուցողական դերակատարում կունենանք: Անշուշտ մենք դրական ենք վերաբերվում այդ քննարկմանը և դրական կվերաբերվենք, եթե այդպիսի որոշում ընդունվի ԵՄ կողմից և տեղում լայն համագործակցություն կհաստատենք նրանց հետ»: