Ձեր վստահելի աղբյուրը

«Ես չէի շտապի այդպիսի եզրահանգումներ անել, որ խաղաղության պայմանագրի գործընթացը փակուղում է»,- այսօր խոհրդարանական ճեպազրույցների ժամանակ ասաց ՔՊ խմբակցության պատգամավոր Սարգիս Խանդանյանը:

Նրա խոսքով՝ դա երեկ վերահաստատել է ԱԳ նախարարը, որ խաղաղության պայմանագրի տեքստի շուրջ քննարկումները շարունակվում են, Հայաստանը վերջին առաջարկներն ուղարկել է Ադրբեջանին և սպասում է արձագանքի։

«Իհարկե, Ադրբեջանի գործողությունները խոչընդոտում են գործընթացին, խոսքը թե Լաչինի միջանցքի փակման, թե Հայաստանի տարածքային ամբողջականության խախտման և զորքերի հետ չքաշելու մասին է, ինչպես նաև այն քաղաքական հայտարարությունների, որոնք արվում են Ալիևի կողմից»,- ասաց Սարգիս Խանդանյանը։

Պատգամավորը նաև հիշեցրեց, որ երեկ Նիկոլ Փաշինյանն ու ԱՄՆ պետքարտուղարը հեռախոսազրույց են ունեցել, վերջինս պատրաստակամություն է հայտնել որպես միջնորդ նպաստել խաղաղության պայմանագրի առաջխաղացմանը. «Մենք մեր ուղենիշներից չենք ընկրկում և շարունակելու ենք ամեն ինչ անել, որ դա իրականություն դառնա»:

Նրա խոսքով՝ խաղաղության պայմանագրի շուրջ գործընթացը մեկնարկել է Վաշինգոտոնում, բայց Հայաստանը միշտ ասել է, որ պատրաստ է յուրաքանչյուր հարթակում խաղաղության պայմանագրի շուրջ բանակցություններ վարել Ադրբեջանի հետ:

Խաղաղության պայմանագրի ստորագրման դեպքում որպես երաշխավոր ո՞ր կողմն է ավելի ցանկալի հարցին ի պատասխան` Սարգիս Խանդանյանն ընդգծեց՝ կարևոր է, որ միջնորդ կողմը կարողանա երաշխավորել այդ պայմանագրի կենսունակությունը։ 

Նրա խոսքով՝ գործընթացը կատարվում է Միացյալ Նահանգների միջնորդությամբ սկսված գործընթացի տրամաբանությամբ, ևւ հայկական կողմի համար կարևոր է երաշխիքների հատվածը:

«Երաշխիքների մասին խոսելիս պետք չէ մտածել` որևէ երկիր որեւէ կերպ երաշխավորելու է իր ֆիզիկական կամ որևէ ներկայությամբ այդ պայմանագրի գոյությունը: Օրինակ, երաշխիք կարող է լինել, օրինակ, զորքերի հետքաշումը և ապառազմականացումը սահմանի երկայնքով և այլն: Կարևոր է, որ միջնորդը նպաստի, որ այս համաձայնությունները ձեռք բերվեն, և մեր ակնկալիքն է բոլոր միջնորդներից՝ լինի դա Ռուսաստանը, ԵՄ-ն, թե Միացյալ նահանգները, որ կարողանան ապահովել փոխընդունելի առաջարկների հաստատումը և ձևակերպումը խաղաղության պայմանագրի տեքստի մեջ»,- ասաց նա։ 

Լրագրողի հարցին, թե ՌԴ ԱԳ նախարար Սերգեյ Լավրովը երեկ հայտարարեց, որ Ադրբեջանի և Արցախի ներկայացուցիչները հանդիպել են, կարծում է, որ Լաչինի միջանցքի հարցը հնարավոր է շուտով լուծվի, իսկ դրանից հետո հայտարարեցին, որ Արայիկ Հարությունյանը հանդիպել է Ադրբեջանի ներկայացուցիչների հետ, բայց առաջընթաց չկա այդ հարցում, արդյոք միջանցքի բացման հետ կապված որևէ առաջարկ Ադրբեջանը ներկայացրե՞լ է, Սարգիս Խանդանյանը պատասխանեց.

«Այո, տեղի է ունեցել հանդիպում, դա հաստատել են նաև ԼՂ մեր գործընկերները: Այս հարցի շուրջ առաջընթացը Լաչինի միջանցքի բացումն է, դա պետք է լինի հիմնական պահանջը և ենթադրում եմ, որ բանակցությունների առանցքում դա է եղել, բայց մինչ այսօր Լաչինի միջանցքը շարունակում է փակ մնալ։ Այսինքն՝ բանակցությունների արդյունքները առայժմ տեսանելի չեն: Թե լրացուցիչ  ինչ դետալներ են քննարկվել այդ բանակցությունների ընթացքում, ես տեղյակ չեմ»:

Պատասխանելով լրագրողի հարցին, թե խոսվեց Արցախի պետնախարար Ռուբեն Վարդանյանի հնարավոր պաշտոնանկության մասին, որը հերքվեց, հիմա էլ խոսակցություններ կան, որ այս հարցով Հայաստանի իշխանություններն են ճնշում գործադրում Արցախի իշխանությունների վրա, ՔՊ խմբակցության քարտուղար Արթուր Հովհաննիսյանը նշեց, որ ՀՀ իշխանությունները բացարձակապես չեն խառնվում ԼՂ իշխանությունների գործերին և ներքաղաքական կյանքին:

«Սա նորմալ է և հենց այդպես էլ պետք է լինի, մենք ի սկզբանե առաջնորդվել ենք հենց այս տրամաբանությամբ: Ձեր հարցը որևէ կերպ հնարավոր չի հաստատել և դա չի համապատասխանում իրականությանը։ Ինչ վերաբերում է ջանքերին, մենք բազմիցս արձանագրել ենք, թե ով ինչ պարտավորություն ունի Լաչինի միջանցքում և շարունակում ենք հույս հայտնել, որ բոլորն իրենց պարտավորությունները կկատարեն հնարավորինս արագ՝ հաշվի առնելով նաև միջազգային հանրության կողմից կատարված հստակ արձանագրումներն ու գնահատականները պատասխանատուների և պատասխանատվության վերաբերյալ:

Հույս ունենք, որ վերջիվերջո թե ռուսական խաղաղապահ զորախումբը, թե պատասխանատու այլ սուբյեկտներ կկարողանան լուծել այս հարցը և կստիպեն Ադրբեջանի ղեկավարությանը ապաշրջափակել Արցախը, բացել Լաչինի միջանցքը: Լավրովի հայտարարությունները, որը հույս է հայտնել, որ միջանցքը կբացվի, ես որևէ կերպ չեմ ուզում մեկնաբանել, քանի որ չգիտեմ, թե ինչ հիմքեր է ունեցել իր խոսքում Լավրովը»,- նշեց Արթուր Հովհաննիսյանը։