Ձեր վստահելի աղբյուրը

«Գիշերը հրեշավոր դեպք է տեղի ունեցել: Գեղարքունիքի մարզի Ազատ գյուղում տեղակայված ՊՆ զորամասի հրդեհի հետևանքով  զոհվել է 15 զինծառայող»,- կառավարության այսօրվա նիստում հայտնեց Նիկոլ Փաշինյանը և առաջարկեց մեկ րոպե լռությամբ հարգել զոհերի հիշատակը:
Տեղեկացնելով, որ գիշերվա ընթացքում աշխատում են պաշտպանության նախարարի հետ ՝ Փաշինյանը Սուրեն Պապիկյանին առաջարկեց զեկուցել թե ինչ է տեղի ունեցել:

«Ռազմական ոստիկանությա հայտնած նախնական տվյալների համաձայն, հրդեհային անվտանգության կանոնների խախտման արդյունքում տեղի է ուենցել բռնկում, որի ժամանակ օգտագործվել է նաև արգելված միջոց, խոսքը վերաբերում է ավտոբենզինին, որը հետագայում հնարավոր չի եղել մարել»,-հայտնեց Պապիկյանը

Նիկոլ Փաշինյանը հայտարարեց, որ պարզաբանման առաջին հարցն այն էր, թե ո՞վ և ինչ չի արել:

Գործադիրի ղեկավարը Քննչական կոմիտեի նախագահ Արգիշտի Քյարամյանից ճշտեց, որ մեծ քանակությամբ բենզին է օգտագործվել, որը բռնկվել է և չի հաջողվել հանգցնել:

«Քրեական օրենսգրքի համապատասխան հոդվածով վարույթ է հարուցվել ՝ շրջապատի համար վտանգ ներկայացնող նյութերի հետ վարվելու կանոնների  խախտում, որն անզգուշությամբ առաջացրել է երկու և ավելի անձի մահ:

Կա նախնական վարկած,  առ այն, որ հրդեհը տեղի է ունեցել  ջեռուցման հետ կապված հարցում անվտանգության կանոնների խախտման պատճառով: Սա նախնական վարկածն է, որն այս պահի դրությամբ բավականին հիմնավորվել է»,-զեկուցեց Քյարամյանը:

Նիկոլ Փաշինյանի խոսքով՝ պարզվել է նաև, որ Ներքին գործերի նախարարության Հրշեջ ծառայությունն պատշաճ ժամանակում հասել է դեպքի վայր, բայց հեռավորությունն բավականին մեծ է եղել:

«Պարզել ենք, որ 2023 թվականի դեկտեմբերի 21-ին  զինված ուժերի գլխավոր շտաբի պետը ստորագրել է 14-ԳՇ կարգադրությունը,  հետևյալ վերնագրով. «Զինված ուժերի ստորաբաժանումներում  հրդեհների և դրանց կանխարգելման մասին»: Դրանով հստակ հրահանգ է տվել, թե ինչ պետք է անել հակահրդեհային կանոնները պահպանելու համար: 7-րդ կետում սահմանվել է. «Խստիվ արգելել վառարանների շահագործման համար որպես կպչան ավտոբենզին,  նեֆռազ և այլ տեսակի դյուրավառ հեղուկների օգտագործումը, դրանք պահպանել այլ հեղուկներից առանձին»: Այս հրամանի պրիմիտիվ պահպանումը  թույլ կտար չունենալ այս դեպքը, բայց մենք պարզում ենք, որ ոչ միայն բենզին է օգտագործվել, այլ բոլոր նախնական տվյալներով, փորձ  արվել 5 լիտրանոց տարան բացել, լցնել վառարանի մեջ: Բնականաբար, երբ եղել է կրակ, ոչ միայն այրվել է բենզինը, այլև կրակն անցել է  վառարանը վառել փորձող սպային, որից հետո նախնական տվյալներով, ինքնապաշտպանական բնազդով այդ 5 լիտրանոց բենզինով տարան շպրտվել է  զորամասի կացարանի ուղղությամբ: Ենթադրում ենք, մեծ հավանականությամբ, ոչ դիտավորյալ, որից հետ պարզ է թե ինչ է տեղի ունեցել»,-հայտնեց Փաշինյանը և տեղեկացրեց, որ առաջարկ է ներկայացրել նախագահին 2-րդ բանակային կորպուսի հրամանատարին պաշտոնանակ անելու վերաբերյալ, որն արդեն ստորագրվել է, իսկ Սուրեն Պապիկյանն էլ հայտնեց, որ աշխատանքից ազատվել են վերջինիս տեղակալները և այլ պատասխանատու սպաներ: