Ձեր վստահելի աղբյուրը

Քաղաքացիները զարմանում են, թե ինչու մինչև հիմա Գեղարքունիքի մարզի Ազատ գյուղի տարածքում տեղակայված ՀՀ ՊՆ N զորամասի ինժեներասակրավորային վաշտի կացարանում բռնկված հրդեհի դեպքից հետո, որի հետևանքով զոհվել է 15 զինծառայող, 7-ը մարմնական վնասվածներ են ստացել, պաշտպանության նախարար Սուրեն Պապիկյանը հրաժարական չի տվել։

«Պատասխանատուն առաջին հերթին պաշտպանության նախարարն է  իր տեղակալով, ով պետք է զբաղվի ապահովության հարցերով։ Զինծառայողը պետք է ծառայի զորմասում,  ոչ թե այլ տեղ մնա, որտեղ նորմալ պայմաններ չեն ապահովում։

Զարմանալի է, որ մարդը կարող է կորպուսի  հրամանատար ազատի աշխատանքից, ինքը հանգիստ նստի  կառավարության նիստում»,- Panorama.am-ի հետ զրույցում ասաց քաղաքացիներից մեկը։

Մեկ այլ քաղաքացու խոսքով, ցավալի դեպք է, հերթական անգամ  շոկի է ենթարկել հասարակությանը։

«Բացթողումներ կան, մեղավորներ կան։ Չեմ կարող կոնկրետ ասել,  որ օղակում է, տեսականորեն կարելի է ասել գերագույն գլխավոր հրամանատարից մինչև այդ տեղամասի  հրդեհային անվտանգության պատասխանատուն»,- նշեց քաղաքացին։

Քաղաքացիները համոզված են, որ եթե վաղուց լինեին հրաժարականներ, հիմա նման աղետի առաջ չէին կանգնի։

Հիշեցնենք՝ դատախազության հաղորդմամբ, հունվարի 19-ին, ժամը 05:15-ին, ՀՀ ՊՆ N զորամասից Վարդենիսի Ռազմական ոստիկանության բաժին հեռախոսագիր է ստացվել, որ նույն օրը՝ ժամը 01:30-ի սահմաններում, նշված զորամասի Գեղարքունիքի մարզի Ազատ գյուղում տեղակայված շինության ներսում վառարանը ավտոբենզինով վառելու ընթացքում հրդեհ է բռնկվել: Հրդեհի հետևանքով անձնակազմից 15 պարտադիր ժամկետային զինծառայողներ մահացել են: Նույն զորամասի վեց պարտադիր ժամկետային զինծառայողներ և մեկ սպա մարմնական վնասվածքներով, ժամը 02:00-ի սահմաններում, տեղափոխվել են Գեղարքունիքի կայազորային հոսպիտալ:

ՀՀ քրեական օրենսգրքի 532-րդ հոդվածի 4-րդ մասի հատկանիշներով առերևույթ հանցագործության տարրերի առկայության փաստով կազմված փաստաթղթերը 2023 թվականի հունվարի 19-ին ուղարկվել  են Քննչական կոմիտեի Զինվորական քննչական գլխավոր վարչության 5-րդ կայազորային քննչական բաժին՝ հետագա ընթացքը որոշելու համար: