Ռուբեն Վարդանյանը շնորհակալություն է հայտնել ԵԽ պատգամավորներին
Արցախի Հանրապետության պետնախարար Ռուբեն Վարդանյանը շնորհակալություն է հայտնել Եվրոպական խորհրդարանի բոլոր պատգամավորներին Արցախի հայերին նրանց աջակցության համար։
«Սա կարևոր քայլ է՝ ստիպելու Ադրբեջանին վերջ դնել Արցախում՝ Լեռնային Ղարաբաղում շարունակվող հումանիտար ճգնաժամին։ Ես իմ սրտանց շնորհակալությունն եմ հայտնում խորհրդարանի բոլոր պատգամավորներին Արցախի հայությանը ցուցաբերած աջակցության համար»,-Թվիթերի իր միկրոբլոգում գրել է Ռուբեն Վարդանյանը՝ անդրադառնալով Եվրոպական Խորհրդարանի կողմից Արցախի բնակիչների իրավունքների վերաբերյալ քննարկումներին ու դրա արդյունքում ընդունված բանաձևին։
Հիշեցնենք, որ Եվրոպական խորհրդարանը քննարկել է Լեռնային Ղարաբաղում մարդու իրավունքների վերաբերյալ հարցն ու ափսոսանք հայտնել Ադրբեջանի ինքնահռչակ բնապահպանների կողմից Լաչինի միջանցքի ներկայիս շրջափակման հետևանքով Լեռնային Ղարաբաղում առաջացած ծանր հումանիտար ճգնաժամի կապակցությամբ։
Նշվել է՝ քանի որ միջանցքը պատերազմից տուժած տարածաշրջանը Հայաստանի և արտաքին աշխարհի հետ կապող միակ ճանապարհն է, Եվրախորհրդարանի պատգամավորները կոչ են անում Ադրբեջանին անհապաղ վերաբացել այն՝ ապահովելու ազատ տեղաշարժը և առավել խոցելի խավի համար անհրաժեշտ ապրանքների և ծառայությունների հասանելիությունը:
Քննարկումների արդյունքում ընդունվել է բանաձև, որն ընդգծում է Հայաստանի և Ադրբեջանի միջև համապարփակ խաղաղության համաձայնագրի անհրաժեշտությունը, որը երաշխավորում է Լեռնային Ղարաբաղի հայ բնակչության իրավունքներն ու անվտանգությունը։
Այն կոչ է անում թույլ տալ միջազգային կազմակերպություններին մուտք գործել տարածք՝ անհրաժեշտ մարդասիրական օգնություն տրամադրելու համար, ինչպես նաև ՄԱԿ-ի կամ ԵԱՀԿ փաստահավաք առաքելությանը մեկնել Լաչինի միջանցք՝ տեղում հումանիտար իրավիճակը գնահատելու համար:
«Ի հավելումն, Եվրախորհրդարանի պատգամավորները դատապարտում են տարածքում ներկա ռուս «խաղաղապահների» անգործությունը և գտնում են, որ նրանց պետք է փոխարինեն ԵԱՀԿ միջազգային խաղաղապահները։ Նրանք նաև խրախուսում են ԵՄ-ին երաշխավորել, որ Լեռնային Ղարաբաղի բնակիչներն այլևս պատանդ չլինեն Բաքվի ակտիվության, Ռուսաստանի ապակառուցողական դերի կամ Մինսկի խմբի անգործությանը»,-ասված է ԵԽ պաշտոնական կայքում։
Հարակից հրապարակումներ`
- Արցախում Ադրբեջանի կողմից ստեղծված հումանիտար աղետն օրեցօր ավելի է խորանում. Ռուբեն Վարդանյան
- Արդբեջանը պետք է հասկանա, որ կողք կողքի ապրելու միակ ձևը հարևաններ լինելն է. Ռուբեն Վարդանյան
- ԵԽ Նախարարների կոմիտեի նախագահը կոչ է անում վերաբացել Լաչինի միջանցքը
- Եվրախորհրդարանը պահանջում է անհապաղ վերականգնել Լաչինի միջանցքով տեղաշարժի ազատությունը. «Արմենպրես»
- Բլինքենը Փաշինյանի հետ հեռախոսազրույցում ընդգծել է Լաչինի միջանցքի անխափան գործունեության կարևորությունը
- Ռուբեն Վարդանյան. Ես հստակ ասում եմ, որ մեր նպատակն է ունենալ անկախ Արցախ
Լրահոս
Տեսանյութեր
Թալանում ու թալանում են , խաբելով, ստով ո՞ւմ փորն է կշտանում. Քաղաքացիները՝ թանկացումների մասին
