Ձեր վստահելի աղբյուրը

Արցախյան երրորդ պատերազմում զոհված զինծառայողների ծնողները, որոնց նկատմամբ Եռաբլուր զինվորական պանթեոնում սեպտեմբերի 21-ին ոստիկանության ծառայողները բռնություն էին գործադրել, բողոքի ակցիա են իրականացնում Քննչական կոմիտեի շենքի մոտ: Ծնողներից մեկը լրագրողների հետ զրույցում ասաց, որ արդեն մեկ ամիս է քննչական կոմիտեում որևէ գործողություն տեղի չի ունենում, առերեսում չկա։

«Ուզում ենք ճշտել՝ կապիկներից ո՞ր մեկի հրամանն է կատարվում քննչական կոմիտեի կողմից։ Հրամանը կա՛մ գլխավորինն է, կա՛մ նրա ձագերից մեկինը»,- ասաց նա։

Ծնողը վստահ է՝ ոստիկանության ծառայողները Եռաբլուրում ինքնուրույն չեն գործել. «Նախ պետք է պատժվեն կարմիր գլխարկները, դրանից հետո ով հրաման է տվել, վերջում էլ, բոլորս պատկերացնում ենք, որ «համար մեկը» պետք է պատժվի էլի»։

Ըստ նրա, ՔԿ ղեկավար  Արգիշտի Քյարամյանը կամք չի ունենա պատժել մեղավորներին. եթե ունենա չանելու ուղիղ հրաման, չի անի։ Նա նշեց, որ կասկածներ ունեն, Քարամյանը գործընթացը դադարեցնելու  հրաման է ստացել։

Պատերազմի ժամանակ նահատակված Մխիթար Գալեյանի հայրը՝ Գարիկ Գալեյանն ասաց, որ ամեն փաստարկ կա՝ միջադեպի հետ կապված նկարներ, տուժած ծնողների դատաբժշկական փորձաքննության եզրակացություն, «բայց  դեռևս որևէ մի կարմիր բերետավոր շան մեղադրանք չի առաջադրվե», իսկ երեկվա դեպքն արդեն բացահայտել են։

«Ինչպե՞ս կարող են վեց ժամում ասեն՝ ամեն ինչ պարզ է, բայց այս հինգ ամսվա մեջ որևէ բան դեռ չեն պարզել, ոչ մեկին մեղադրանք չեն առաջադրել»,- ասաց Գալեյանը։

Նա ընդգծեց, որ օր առաջ պետք է կանխել այս դավաճան իշխանության գործողությունը, կալանավորեն։

Ծնողներից մեկն ասաց, որ այլ նպատակով պետք է գային այստեղ, բայց երեկվա  դեպքի պատճառով զոհված 15 տղաների հիշատակը հարգելով, այսօր ուրիշ գործողություններ չեն կատարում։

«Իմ կածիքով,  ամենառաջին պատժվողը պետք է լիներ Նիկոլն իր ժեխակույտով։ Բայց քանի որ մենք ապրում ենք Հայաստանում, մեզ  ղեկավարում են ներկայիս ղեկավարերը, որանք  անորակ են, դավաճան... »,- ասաց նա։

Մխիթար Գալեյանի մայրը՝ Աստղ Գալեյանն ասաց, որ իր պատկերացմամբ երեկ պետք է հրապարակը մարդկանց քանակից ուղղակի տրաքեր. «Բայց անտարբերություն է։ Այն, ինչ որ մենք անցել ենք,  ցավոտ է։ Մեր ցավի հետ մեկտեղ մենք պայքարում ենք։ Ճիշտ է, ուշ ենք ոտքի կանգնել, բայց կանգնել ենք։ 

Ժողովուրդ ջան, միացեք ծնողներին, այլապես կկորցնենք այն, ինչ ունենք, ինչ կյանքի գնով դեռևս պահվում է։ Մտածեք ձեր հայրենիքի մասին,  երեխաների մասին, չդառնաք սևազգեստ, ինչպես որ մենք»։ 

ՔԿ-ում հանդիպումից հետո Գարիկ Գալեյանն ասաց. «Նույն հեքիաթներն են՝ նախաքննությունը գնում է, գործը շարունակվում է։ Համբերությունիս չհերիքեց։

Ասացի՝ դուք  մինչև հիմա հայ եք կոչվում մեր տղերքի շնորհիվ։ Եթե դուք այսօր երեկոյան գնում եք տուն, համբուրում ձեր տղաներին, ես, տականքներ, երեխուս քարն եմ համբուրում։  Ամեն օր Եռաբլուրում եմ, ամեն օր մտնում եմ տղուս տուն, նոր գնում տուն։

Տականք Արգիշտին իր անգործությամբ տանում է նրան, որ կամաց-կամաց բոլոր տղաներին վերացնում են։ Հասկանում ենք ինչ են անում. բանակը քանդել են, կամաց-կամաց տղաներին էլ վերացնում են, դարպասներն էլ բացում են էլի, իրենց բարեկամն է։ Բա աղջիկներն ո՞ւմ հետ են ամուսնանալու։ Ժողովուրդը, ընդդիմությունը լուռ է։ Ես վստահ եմ, որ մեր երկրում ընդդիմություն չկա, բոլորը նույն սանրի կտավներն են։

Դուրս գալ է պետք վայրկյան առաջ։ Ծնողներ, ոտքի կանգնեք։ Քանի դեռ ձեր երեխաները չեն զոհվել, պետք է ոտքի կանգնել, այլապես բոլորի տները մտնելու է։ 

Բոլորի տներն էլ մտնելու է. գնացին խաղաղություն մուրացողին ընտրեցին վարչապետ»։