Ձեր վստահելի աղբյուրը

Ազատ գյուղում տեղակայված ինժեներասակրավորային վաշտի կացարանում տեղի ունեցած հրդեհի հետևանքով զոհված 14 զինծառայողի դիերը հայտնաբերվել են մահճակալներին անշարժացած, մեկինը՝ դռան մուտքի մոտ: Այս մասին Հանրային հեռուստաընկերության եթերում ասել է Փրկարար ծառայության գնդապետ Արսեն Սարոյանը։

Նրա խոսքով՝ հրդեհաշիջման աշխատանքներն իրականացվել են երկու տեղամասով:

«Մեկ տեղամասը, որը փլուզվել էր, քանի որ մինչև փրկարարների հասնելը ՊՆ մեքենայով փորձել էին փլուզել պատը, մյուս տեղամասը եղել է այն սենյակի մուտքը, որով հնարավոր է եղել անցնել, բայց հիմնականում այրվել է նախասրահը, որը տանում էր դեպի քնելու վայր։ Դրա համար փորձել էին մյուս կողմից փլուզել պատը և օգնության հասնել զինվորներին: Զուգահեռ էլ փորձում էին շատ արագ մաքրման, քանդման աշխատանքներ իրականացնել, որ մոտենային զինվորներին։

Շինությունում եղել է 21 զինծառայող։ Մինչ փրկարարների հասնելը վեց հոգին դուրս են եկել սեփական ուժերով։ Իսկ զոհված զինծառայողներից 14-ը հայտնաբերվել են մահճակալներին անշարժացած վիճակում, ենթադրում եմ, որ ծխահարված են եղել, այսինքն՝ տեղից վեր չեն կացել, իսկ մեկին էլ հայտնաբերել ենք մուտքի մոտ, փորձել է փրկվել, բայց չի կարողացել»,- նշեց Արսեն Սարոյանը։

Նրա խոսքով՝ այդ սենյակն ամբողջությամբ այրված է եղել, պատի քանդման հետևանքով փլուզվել էր տանիքը, և հողային շերտերը հանելու ընթացքում փրկարարներն արդեն տեսել են, որ բոլորն այրված են։