Ձեր վստահելի աղբյուրը

«Կարող եմ թվարկել մի շարք գիտական կառույցներ, որոնք լուծարվեցին, հետո՝ մեկ տարի անց, պետությունը ստիպված դրանք վերականգնեց, օրինակ՝ Մեթոդական ծրագրերի մշակման կենտրոնը, որը ԿԳՄՍ-ին կից է աշխատում: Քանի որ ծրագրերն ամեն տարի են մշակվում, լուծարմամբ գործընթացը կտրվել էր և շատ ծանր վիճակ էր ստեղծվել ոլորտում»,- Տարածաշրջանային և եվրասիական ինտեգրման հարցերի մշտական հանձնաժողովի նիստին էկոնոմիկայի նախարար Վահան Քերոբյանի հետ բանավեճի մեջ մտավ «Հայաստան» խմբակցության պատգամավոր Իրինա Գասպարյանը:

Պատգամավորը հայտնեց, որ կարող է նշել նաև այլ գիտական կառույցներ, որոնք լուծարվել են և շատ վնաս պատճառել ոլորտին և տնտեսությանը:

Անդրադառնալով Վահան Քերոբյանի հայտարարությանը, թե տնտեսությունը զարգացնելու համար պետությունը դրսի մասնագետներ հրավիրած ընկերություններին համաֆինանսավորում է՝ ընդդիմադիր պատգամավորը նկատեց, որ իշխանությունները չեն գնահատում ներքին ռեսուրսները և նայում են արտասահման:

«Ներքին ռեսուրսների որակը բավականին բարձր է, ուղղակի  պետք է նրանց օգտագործել: Աշխատավարձի առումով ես կասեի, որ այն բանակը, որն ապահովում է  տնտեսական աճը, կամ կրթությունը, որը ռազմավարական ոլորտ է, շատ ցածր աշխատավարձեր են դրանցում և գիտական լաբորատոր աշխատանքների համար սարքերը չապահովելով, մենք ուղղակի կոտրում ենք այդ ոլորտը, որը բավականին բարձր էր»:

Ես պոզիտիվ չեմ գնագհատում 2022 թվականի արդյունքները և կառանձնացնեի ռազմավարական ոլորտները, որտեղ մարդիկ աշխատում են ոչ թե փող աշխատելու, բիզնեսի, այլ սերունդ դաստիարակելու կամ առողջապահության ոլորտներում, որոնք շատ վատ վիճակում են»,-ասաց Իրինա Գասպարյանը:

Պարգամավորը հակադարձեց էկոնոմիկայի նախարարի խոսքին, թե գիտական ոլորտում աշխատավարձերը բարձրացել են՝ ասելով, որ ինքն այդ ոլորտից է եկել և գիտի թե ինչքան փոքր չափով է բարձրացել գիտնականների աշխատավարձերը:

Իրինա Գասպարյանը հերքեց նաև Քերոբյանի այն հայտարարությունը, թե հաղթող ճանաչված գիտական ծրագրերի համար պետությունը ֆինանսավարում է նաև անհրաժեշտ լաբորատոր սարքավորումների ձեռքբերման ծախսերը:

Վահան Քերոբյան էլ հայտնեց, որ բոլորն էլ շատ ավելին են ուզում կրթական համակարգից, քան այն տալիս է, դրա համար էլ թե՛ կառավարությունը, թե՛ վարչապետը գլխավոր ուշադրությունը սևեռում է կրթական ոլորտին և հիշեցրեց, որ ատեստավորման արդյունքում հազարավոր ուսուցիչներ սկսել են բարձր աշխատավարձեր ստանալ՝ ընդհուպ՝ 400 հազար դրամ:

Ընդդիմադիր պատգամավորի և Էկոնոմիկայի նախարարի երկխոսությունից ձանձրացած հանձնաժողովի նախագահ Վաղարշակ Հակոբյանն էլ, մոռանալով, որ նիստն ուղիղ եթերով հեռարձակվում է, որոշեց ձգել մեջքի և արմունկների մկանները (լուսանկարի հետին պլանում):