Ձեր վստահելի աղբյուրը

«Վերլուծական մասով ես պետք է իմ դժգոհությունը հայտնեմ, որովհետև ամեն անգամ մենք ուզում ենք կարդանք, տեսնենք վերլուծական ինչ հիմնավորումներ կան, բայց գնում ենք՝ կարդում դրսի վերլուծությունները»,-Տարածաշրջանային և եվրասիական ինտեգրման հարցերի մշտական հանձնաժողովի նիստին էկոնոմիկայի նախարար Վահան Քերոբյանին դիմեց ԱԺ ՔՊ-ական պատգամավոր Խաչատուր Սուքիասյանը:

Հանձնաժողովում քննարկվեց «Եվրասիական տնտեսական միության և նրա անդամ պետությունների՝ մի կողմից, և Սինգապուրի Հանրապետության՝ մյուս կողմից, միջև ազատ առևտրի մասին» համաձայնագիրը վավերացնելու մասին նախագիծը, որն հավանության արժանացավ և ընդգրկվեց  ԱԺ ութերորդ գումարման հինգերորդ նստաշրջանի օրակարգ:

Շարունակելով արտահայտել իր դժգոհությունը՝ Սուքիասյանն ասաց. «Մինչև անգամ փայլուն ռուսական RBK կա, որը շատ լավ տնտեսական տարբեր բլոկներ է ներկայացնում, նույնը եվրոպականը: Միևնույն է աշխարհու չկա մի բան, որ դու որոշում կայացնես և վիճակագրության վրա չհիմնվես, միայն վիճակագրությունն է քեզ տանում այս կամ այն ուղղությամբ, ուղղորդում, թե ինչպես այդ գործողությունները կազմակերպես»:

Ըստ ՔՊ-ական պատգամավորի՝ իշխանությունները շատ լավ են փակել 2022 թվականը և ինքը ցանկանում է, որ նաև նույն ձևով փակվի 2023 թվականը:

«Պետք է քրտնաջան աշխատենք, սիրենք, հարգենք մեր հայրենիքը, ամեն ինչ անենք, որ օտարները գան Հայաստանի հանրապետություն: Մենք տուրիզմի մասով էլ բավականին բացթողումներ ուենք, որպեսզի իրենք ՀՀ-ում էլ գումարներ թողնեն և այդ գումարներն էլ զարգացնեն մեր հանրապետության տնտեսությունը»,- խոսքն ավարտեց Խաչատուր Սուքիասյանը:

Ընդունված նախագծի հիմնավորման մեջ ասվում է. «Եվրասիական տնտեսական միության և նրա անդամ պետությունների՝ մի կողմից, և Սինգապուրի Հանրապետության՝ մյուս կողմից, միջև ազատ առևտրի մասին» համաձայնագիրը (այսուհետ՝ Համաձայնագիր) ստորագրվել է 2019 թվականի հոկտեմբերի 1-ին: Սինգապուրի Հանրապետություն հետ ազատ առևտրի համաձայնագրի կնքման բանակցությունները իրականացվել են Եվրասիական տնտեսական Բարձրագույն խորհրդի 2016 թվականի դեկտեմբերի 26-ի «Սինգապուրի Հանրապետության հետ ազատ առևտրի մասին համաձայնագրի կնքման մասով բանակցություններ սկսելու մասին» թիվ 16 որոշման համաձայն:

Հաշվի առնելով Սինգապուրի Հանրապետության առևտրատնտեսական առանձնահատկությունները՝ բանակցություններն իրականացվել են ինչպես ապրանքների առևտրի, այնպես էլ ծառայությունների և ներդրումների իրականացման մասով:

Եվրասիական տնտեսական  հանձնաժողովի 2016  թվականի դեկտեմբերի 21-ի «Սինգապուրի Հանրապետության հետ առևտրատնտեսական համագործակցության աշխատանքների կազմակերպման որոշ հարցերի մասին» թիվ 26 կարգադրության համաձայն՝ ամրագրվել է վերոնշյալ երկու ուղղություններով բանակցային գործընթացների զուգակցման սկզբունքը՝ հաշվի առնելով Եվրասիական տնտեսական միության և դրա անդամ պետությունների իրավասությունների տարանջատման, ինչպես նաև Եվրասիական տնտեսական հանձնաժողովի կողմից ընդհանուր համակարգման անհրաժեշտության հարցերը:

Եվրասիական տնտեսական հանձնաժողովի 2017 թվականի օգոստոսի 22-ի թիվ 27 կարգադրությամբ հաստատված՝ Սինգապուրի Հանրապետության հետ ազատ առևտրի մասին համաձայնագրի կնքման բանակցությունների անցկացման Դիրեկտիվների համաձայն՝ ապրանքների, ծառայությունների և ներդրումների շուկա մուտքի ազատականացման մասով համաձայնությունների հիման վրա պետք է ձևավորվի Սինգապուրի հետ արտոնյալ առևտրի մասով փոխադարձ պարտավորությունների միասնական փաթեթ:

Եվրասիական տնտեսական միության և Սինգապուրի միջև համաձայնեցվել է փաթեթային համաձայնությունների ամրագրման հետևյալ ձևաչափը.

ԵԱՏՄ անդամ պետությունների և Սինգապուրի Հանրապետության միջև համաձայնագիր՝ ապրանքների առևտրի մասով,
Երկկողմ համաձայնագրեր ԵԱՏՄ յուրաքանչյուր անդամ պետության և Սինգապուրի Հանրապետության միջև՝ ծառայությունների առևտրի և ներդրումների իրականացման մասով,
ԵԱՏՄ անդամ պետությունների և Սինգապուրի Հանրապետության միջև ազատ առևտրի մասին շրջանակային համաձայնագիր:

Համաձայնագրի նպատակն է ստեղծել շահավետ միջավայր և պայմաններ փոխադարձ առևտրային հարաբերությունների զարգացման և փոխադարձ հետաքրքրություն ներկայացնող բնագավառներում Կողմերի միջև տնտեսական համագործակցության խթանման համար, ինչպես նաև վերացնել Կողմերի միջև առևտրային և ներդրումային խոչընդոտները, նվազեցնել բիզնեսի ծախսերը և բարձրացնել տնտեսական արդյունավետությունը:

Համաձայնագրով նախատեսված մեխանիզմը հնարավորություն է ստեղծում խորհրդակցությունների միջոցով վեճերի կարգավորման, ինչպես նաև վեճերի փոխանցման համար:

Համաձայնագրի վավերացումը պայմանավորված է Եվրասիական տնտեսական միության շրջանակներում համագործակցությամբ, որը բխում է ՀՀ կառավարության 2021 թվականի օգոստոսի 18-ի ?1363-Ա որոշմամբ հավանության արժանացած Կառավարության 2021-2026թթ. ծրագրի հավելվածի 1գ1 կետի դրույթներից, մասնավորապես՝ ԵԱՏՄ-ի շրջանակներում կառավարությունը շարունակելու է նախաձեռնողական և փոխշահավետ համագործակցության տարբերակների քննարկումները՝ միտված կառույցի ընձեռած հնարավորությունների առավելագույն օգտագործմանը, գործընկեր երկրների միջև առևտրաշրջանառության ծավալների աճին և կոոպերացիաների զարգացմանը»: