Ձեր վստահելի աղբյուրը

Կառավարության շենքի դիմաց «Համախմբում» նախաձեռնության բողոքի ակցիան մեկնարկեց մեկ րոպե լռությամբ՝ ի հիշատակ հունվարի 19-ին Գեղարքունիքի Ազատ գյուղում զինվորների կացարանում հրդեհի հետևանքով զոհված զինծառայողների։



Ակցիայի մասնակիցներն իրենց ձեռքում ունեն «Առանց բանակ ապագա չկա», «Մեղավորը քո ԴՆԹ-ն է», «Բանակը մեր ողնաշարն է», «Զուգահեռ իրականություններ» գրություններով ցուցապաստառներ, ինչպես նաև անմեղ 15 զոհերի լուսանկարները։

Հիշեցնենք, որ Նիկոլ Փաշինյանը հունվարի 21-ին Արագածոտնի մարզում մասնավորապես հայտարարել էր. «Տեղի ունեցած դեպքերի արձագանքներից որոշներն ի ցույց են դնում, որ մենք կարիք ունենք, բացի մակերեսին գտնվող փաստերից, խորանալ և հասկանալ պրոբլեմներն իրենց խորության մեջ: Իսկ պրոբլեմներն իրականում ոչ թե մակերեսին երևացողներն են, այլ նրանք, որոնք արտահայտվում են ամենատարբեր ոլորտներում, դրանք եթե կարելի է ասել, ԴՆԹ մակարդակի պրոբլեմներ են»։

«Մեր գնահատականն է. այս ողբերգության մեղավորը և պատասխանատուն դե ֆակտո վարչապետ Նիկոլ Փաշինյանն է, երկրորդ մեղավորն ու պատասխանատուն դե ֆակտո պաշտպանության նախարար Սուրեն Պապիկյանն է։ Ուզում եմ մեջբերել ՀՀ Սահմնադրության հոդված 155-ից. «Զինված ուժերը կառավարության ենթակայության ներքո են»։ Հետևապես զինված ուժերի հետ կապված տապալման, այն էլ նման նշանակալի տապալման պատասխանատուն կառավարությունն է՝ ի դեմս նրա ղեկավարի»,-ասաց նախաձեռնության համահիմնադիր, ԵՊՀ դասախոս Մենուա Սողոմոնյանը։

Նա նշեց, ողբերգության իրական, խորքային պատճառը կապված չէ հրդեհային անվտանգության կանոնների պահպանման հետ, սա ընդամնեը վարկած է, որը շատ արագ շրջանառության մեջ է դրել Նիկոլ Փաշինյանը պատասխանատվությունից խուսափելու և հանրային համապատասխան արձագանք ստեղծելու համար։

Սողոմոնյանն իր խոսքում ընդգծեց, բացի այդ Փաշինյանն ուղղորդում է քննչական մարմիններին՝ նախաքննությունը տանելով Փաշինյանին ձեռնտու հունով։

Մանրամասները՝ տեսանյութում։