Ձեր վստահելի աղբյուրը

Քննչական կոմիտեում Արցախյան երրորդ պատերազմում զոհված զինծառայողների ծնողների առերեսումը կատարվում էր Երևան քաղաքի ոստիկանության վարչության պետի տեղակալ Արթուր Խուդինյանի հետ, այն տևել է 3 ժամ 55 րոպե: Քննչական կոմիտեի մոտ լրագրողների հետ զրույցում ասաց փաստաբան Վահան Հովհաննիսյանը:

«Քննչական կոմիտեի քննչական գործողությունների թիրախն ուրիշ է. առերեսումները չպետք է կատարվեն մեզ հետ, պետք է կատարվեն ոստիկանության տարբեր ստորաբաժանումների աշխատակիցների միջև, քանի որ այն, ինչ մենք տեսնում ենք իրենց ցուցմունքներում, հակասություններն իրար մեջ են:

Այո, կարմիր բերետավորների բազմաթիվ ցուցմունքներ կան, որ Խուդինյանն է հրամանը տվել: Բայց այսօրվա իմ հարցին՝ ո՞վ է  բերման ենթարկելու հրամանը տվել, պարոն Խուդինյանը պարզապես չպատասխանեց, թե ով է նման հրաման տվել, իմ կողմից արձանագրվեց՝ ուղղակի հարցին պատասխան չհնչեց։ Ոչ հերքել է, ոչ հաստատել է, պատասխան չի հնչել, թե զոհված զինծառայողների ծնողներին բերման ենթարկելու հրամանն ի վերջո ով է տվել»,-ասաց Վահան Հովհաննիսյանը։

Նա հայտնեց, որ  առերեսումները շարունակվելու են ոստիկանության այլ աշխատակիցների հետ:

«Պարոն Խուդինյանն ընդունեց, որ բերման ենթարկելու ձևաչափը, միջոցը, եղանակը համաչափ չի եղել, և ինքն ամբողջ ոստիկանության անունից ներողություն խնդրեց ծնողներից: Նաև խնդրեց դա ընդունել որպես ոստիկանության պաշտոնական հայտարարություն, դիրքորոշում: Նշեց, որ որոշ ոստիկաններ որոշ դեպքերում կարող էին այլ ձևով վարվել, ինչը չեն արել, իրավական գնահատականները թողնելով քննչական մարմիններին»,-ասաց Վահան Հովհաննիսյանը:

Փաստաբանը նշեց, որ Ա. Խուդինյանն ընդունել է՝ «Եռաբլուր» զինվորական պանթեոնում հրահանգներ տալու իրավասությամբ օժտված է եղել ինքը և Երևան քաղաքի վարչությանը ենթակա ստորաբաժանումները ղեկավարվել են իր կողմից, ենթարկվել են իրեն:

«Դրանից հետո ես ուղիղ հարց եմ տվել՝ եթե միայն հրաման տալու իրավասությամբ  օժտված պաշտոնատար անձը դուք էիք, ձեզնից բացի ո՞վ կարող էր բերման ենթարկելու հրաման տալ: Այդ հարցին ևս պարոն  Խուդինյանը չի պատասխանել:

Ի վերջո ևս մեկ անգամ փաստվեց այն հանգամանքը, որ ոստիկանության կողմից կիրառվող այդ միջոցները, վարչական ձերբակալումը, հարկադրաբար ներկայացնելու գործողություններն օրենքով չեն կատարվել, կիրառվել է անհամաչափ ուժ, որի համար ոստիկանները և հրաման տվողները ենթակա են քրեական պատասխանատվության»,-նշեց փաստաբանը։

Նա ասաց, որ այս գործն իրենց համար ամբողջությամբ պարզ է, բայց ոստիկանության տարբեր ստորաբաժանումներ պատասխանատվության գնդակը տշում են մի դարպասից մյուս դարպասը:

Նշենք, որ մինչ ՔՊ ներսում առերեսումներ էին, դրսում զոհված զինծառայողների հարազատները բողոքի ակցիա էին իրականացնում՝ պահանջելով պատժել սեպտեմբերի 21-ին Եռաբլուր զինվորական պանթեոնում ծնողների նկատմամբ բռնություն գործադրած ոստիկաններին, պարզել նրանց հրաման տվողներին։

Հիշեցնենք, որ 2022 թվականի սեպտեմբերի 21-ին «Եռաբլուր» զինվորական պանթեոնում ոստիկանների կողմից բռնություն էր գործադրվել զոհված զինծառայողների ծնողների նկատմամբ։ Այդ դեպքում հարուցվել է քրեական գործ: