Ռուսաստանի հայերի միությունը պահանջում է անհապաղ ազատ արձակել Մասիս Նազարյանին ու Էլեն Կիրակոսյանին
Ռուսաստանի հայերի միությունը հանդես է եկել հայտարարությամբ՝ պահանջելով անհապաղ ազատ արձակել Եկատերինբուրգի հայ համայնքի ղեկավար Մասիս Նազարյանին ու ակտիվիստ Էլեն Կիրակոսյանին, որոնք ձերբակալվել են հայկական եկեղեցու տարածքում ի աջակցություն դեկտեմբերի 12-ից Ադրբեջանի կողմից շրջափակման մեջ գտնվող Արցախի հավաք անցկացնելու համար։
Ռուսաստանի հայերի միությունը կտրականապես անհամաձայնություն է հայտնել Եկատերինբուրգի Լենինի շրջանի դատարանի որոշման հետ, ըստ որի, 5 օրով անազատության են դատապարտվել Մասիս Նազարյանն ու Էլեն Կիրակոսյանը։
«Այդ որոշումը մենք համարում ենք պոտենցիալ պայթյունավտանգ քաղաքական սադրանք՝ ուղղված ռուսաստանյան հասարակության մեջ հակահայկական տրամադրություններ հրահրելուն և հայ հասարակության մեջ հակառուսական տրամադրությունների խթանմանը։
Կարծում ենք, որ խաղաղ միջոցառումը՝ ի պաշտպանություն Արցախի նաև ակցիա է ի պաշտպանություն ռուս խաղաղապահների, ովքեր այսօր ապահովում են արցախցիների կյանքն ու անվտանգությունը, ինչն ակնհայտորեն դուր չի գալիս ոչ միայն պաշտոնական Բաքվին, այլև Ադրբեջանի օտարերկրյա գործակալներին, որոնք այսօր, ըստ ամենայնի, ներդրված են ռուսական բազմաթիվ կառույցներում և փորձում են ռուսներին թելադրել սեփական կանոնները։
Սվերդլովսկի մարզում երկար տարիներ, ցավոք սրտի, նման խնդրի առջև են կանգնել ոչ միայն հայերը, այլև այլ ազգությունների ներկայացուցիչներ, որոնց պարբերաբար պարտադրվում են, այդ թվում՝ տեղական իշխանությունների թողտվությամբ կամ աջակցությամբ, իրենց խորթ բարոյական դրույթներ։
Այս ֆոնին Ռուսաստանում պաշտոնապես գործող հայկական հասարակական կազմակերպության կողմից անցկացված միջոցառման նկատմամբ իրավապահների անիմաստ զգոնությունը, որի էությունը համաքաղաքացիներին բարոյական աջակցություն ցուցաբերելն է, հուշում է դատավորի կողմից կայացված որոշման պատվիրված և կողմնակալ լինելու մասին»,-աված է հայտարարության մեջ։
Ռուսաստանում հայերի միությունը հրավիրել է ՌԴ նախագահի աշխատակազմի, գլխավոր դատախազության, ՌԴ ազգությունների գործերով դաշնային գործակալության, Սվերդլովի նահանգապետի ու այլոց ուշադրությունն այն վտանգների վրա, որոնք պարունակում են այդ գործողությունները, և սա այն պարագայում, երբ «Ռուսաստանը քաղհասարակության բոլոր ինստիտուտների համախմբման կարիք ունի՝ իր առջեւ ծառացած ճակատագրական խնդիրները լուծելու համար։ Ռուսաստանի հայերի միությունը վճռական կերպով վրդովմունք է հայտնում դատարանի որոշման առնչությամբ և պահանջում անհապաղ ազատ արձակել Մ.Նազարյանին և Է.Կիրակոսյանին, քանի որ նրանց գործողությունները ոչ մի կերպ չեն համապատասխանում առաջադրված մեղադրանքին։ Ռուսաստանի հայերի միությունը կապի մեջ է մեր հայրենակիցների հետ՝ նրանց անհրաժեշտ իրավական աջակցություն ցուցաբերելու համար»:
Հարակից հրապարակումներ`
Լրահոս
Տեսանյութեր
Օր չկա, որ մենք փողոցում չտեսնենք բողոքի դուրս եկած տարբեր խմբեր. Բագրատ Սրբազան
