Ձեր վստահելի աղբյուրը

«Ցանկացած  ռազմական դրության ժամանակ սահմանափակումներ մտցնելու անհրաժեշտություն կա, բայց դրանք պետք է լինեն շատ հստակ, ողջամիտ, հասկանալի թե կիրառողների, թե այդ սահմանափակումներին ենթարկվողների համար»,- ասուլիսում ասաց Խոսքի ազատության պաշտպանության կոմիտեի նախագահ Աշոտ Մելիքյանը՝ անդրադառնալով արդարադատության նախարարության կողմից շրջանառության մեջ դրված «Ռազմական դրության իրավական ռեժիմի մասին» օրենքում փոփոխություններ կատրելու մասին նախագծին,  որը վերաբերում է ինտերնետ հասանելիության, էլեկտրոնային մամուլի, սոցիալական ցանցերի և հավելվածների մասնակի կամ  ամբողջական սահմանափակմանը։

Նա նշեց, որ իրենք խորը մտահոգություն են հայտնել այդ նախագծի առնչությամբ, որովհետև, համենայնդեպս, այն դրույթները, որոնք վերաբերում են հենց ինֆորմացիոն ոլորտին, լրատվամիջոցներին, կայքերին, ինտերնետային հավելվածներին,  ուղղակի որևէ քննադատության չեն դիմանում այն պատճառով, որ դրանք վատ քննարկված, վատ հիմնավորված և ոչ հստակ մոտեցումներ են, դրույթներ են։

«Հասկանալի է, որ ռազմական իրավիճակում կեղծ լուրերի, ապատեղեկատվության վտանգն ավելանում է, ցանկացած  ռազմական դրության ժամանակ սահմանափակումներ մտցնելու անհրաժեշտություն կա, բայց դրանք պետք է լինեն շատ հստակ, ողջամիտ, հասկանալի»,- ասաց Մելիքյանը։

Նա հիշեցրեց կորոնավիրուսի, 44-օրյա պատերազմի ժամանակ ստեղծված իրավիճակը և ասաց. «Նո՞ւյնն է կրկնվելու թե՞ ոչ։ Ո՞վ է իրագործելու կամ ընդհանուր որոշումը կայացնելուց հետո ո՞վ է որոշում կայացնելու՝ այս կայքն արգելափակել, այս մեկը ոչ։ Էլի՞ ոստիկանությունը, ԱԱԾ, որքանո՞վ են դրանք պրոֆեսիոնալ։ Շատ հաճախ մեդիափորձագետներիս շրջանակներում բանավեճ է  առաջանում, թե սա խուճապ առաջացնող նյո՞ւթ է, թե՞ ոչ։ Դա քննարկման, որոշման հարց է։

Ամենակարևորը՝ պետությունը, երբ որ ուզում է իրեն վերապահել այս ամեն ինչը, վերցնել ու լրիվ փակել, տեղեկատվական վակուումն առհասարակ ո՞վ է լցնելու, լցվելու է այնպես, ինչպես պատերազմի ժամանա՞կ, հետո հասարակությունը  շոկի մեջ է լինելու, թե ինչ էին ասում, ինչ եղավ։ Դու որպես պետություն նաև պետք է պատրաստ լինես լցնելու այդ վակումը, ինչը, ըստ այսօրվա աշխատանքի, ես պետության կողմից չեմ տեսնում նման հնարավորություն, ցանկություն, պրոֆեսիոնալիզմ»։

Ա. Մելիքյանը նաև ասաց, որ սովորաբար այդպիսի կոշտ սահմանափակումներ դրվում են այն ժամանակ, երբ որ այդ գործիքներն իշխանությունը, պետությունը չի կարողանում արդյունավետ օգտագործել։ Նույն ինտերնետը, անշուշտ, նույնիսկ ռազմական դրության ժամանակ, եթե հմուտ  օգտագործես, կարող է որպես ինֆորմացիոն պատերազմի գործիք և զենք կիրառվել։

«Առաջարկվող այս փոփոխություններն այս տեսքով անընդունելի են, մերժելի։ Այն փաստաթուղթը, համենայնդեպս  3, 4 դրույթները, որոնք վերաբերում են լրատվամիջոցներին, պետք է մի կողմ դրվեն, գաղափարի և խնդիրների իրագործման տեսանկյունից զրոյական կետից քննարկվի ու նոր դրույթներ պատրաստվեն»,- ասաց Խոսքի ազատության պաշտպանության կոմիտեի նախագահը։

Նա ասաց, որ այս փուլում քննարկումները  շարունակվում են տարբեր հարթակներում։