Ձեր վստահելի աղբյուրը

«Մեզ խաբում են։ Այո, ես այդ մտքին եմ։ Չի բացառվում, որ մենք ինքներս ենք մեզ խաբում։ Մեզ խաբում են, թե մեր ընտրությունը Ռուսաստանի կամ Արևմուտքի մեջ է, խաղաղության կամ պատերազմի մեջ է, միջանցք տալու-չտալու մեջ է, կամ Հայաստանի կամ  Արցախի փրկության թեմայի մեջ է»,- «Այսօրվա և վաղվա Հայաստանը. ինչ ունենք և ինչին պետք է հասնել» թեմայով պանելային քննարկմանն ասաց «Այլընտրանքային նախագծեր խմբի» համահիմնադիր, ԱԺ նախկին պատգամավոր Վահե Հովհաննիսյանը։

Նրա խոսքով, իրականում  հասարակությունն ապրում է  այս նարատիվի մեջ, ամեն մեկն ըստ դաստիարակության, սոցիալական ապահովության ընտրություն է կատարում։

«Այն վիճակում, որում մենք կանք, օբյեկտիվորեն,  առանց վարդագույն ակնոցների, ընտրությունը շատ պարզ է՝  ապրելու  և չապրելու մեջ է։ Հայաստանի, հայ ժողովրդի առջև շատ պարզ խնդիր է դրված. մենք այս պահին համաշխարհային  նշանակության ընտրության կամ փիլիսոփայական ընտրության հարցերում որևէ ռեսուրս չունենք։ Մեր առաջ շատ պարզ խնդիր է դրված և մեր վտանգն ունի շատ կոնկրետ հասցե, դեմք, անուն-ազգանուն, տալիս է ժամկետներ՝ պայմանական մեկ տարի։ Մենք նույնիսկ դա չենք հասկանում, թե ինչու են մեզ մեկ տարի տալիս»,- ասաց Վ. Հովհաննիսյանը։

Նրա խոսքով, մենք նույնիսկ մեզ խաբում ենք, թե ինչ է կատարվում այսօր Ղարաբաղում. «Եթե   Երևանում հարցնեք, բոլորը կխոսեն սոցիալական ճգնաժամից՝ ձեթ չկա, կամ չգիտեմ։ Մենք մեզ խաբում ենք, թե այսօր Ղարաբաղում Ղարաբաղի հարցն է  լուծվում։

Այսօր Ղարաբաղում լուծվում է  Հայաստանի հարցը։ Ցավում եմ, որ մեր հանրային էլիտաները չեն կարողանում լայն հասարակությանը այս պարզ ճշմարտությունը հասկացնել։ Ղարաբաղում այսօր Ղարաբաղի հարցը չի վճռվում։ Ղարաբաղում այսօր վճռվում է Հայաստանի հարցը և մեր քաղաքացին դա դժվար է պատկերացնում, թե Ղարաբաղի անկումը կամ ողբերգական սցենարները, զարգացումը Ղարաբաղում ինչի կբերի։ Չենք խոսում այդ մասին։ Իսկ ըստ իս, դա ուղղակի բացելու է  Հայաստանի անկման  դռները և Հայաստանի՝ որպես պետության փլուզումը շատ սրընթաց է գնալու, այդ մեկ տարվա ժամկետների մեջ գրեթե տեղավորվող։ Մենք չենք խոսում դրա մասին։ Դրա մասին շատ լավ գիտի, ի դեպ, իշխանությունը։

Խաբողներից մեկը իշխանության նեղ մի խումբն է, ով շատ լավ հասկանում է,  բայց երբեք չի ասելու ճշմարտությունը, օբյեկտիվ  վտանգներն իր օբյեկտիվ չափերով, ողջ ծավալով, քանի որ դա իր համար մահացու վտանգ է։

Իշխանությունը մինչև ողբերգության օրը  տարբեր նարատիվներ է հորինելու և մեզ բաժանի բարիկադների, հանրությանը բաժանի  արևմտամետների-ռուսամետների, ղարաբաղապաշտների-հայաստանապաշտների, խաղաղության և պատերազմի կողմնակիցների։ Բոլորն էլ սուտ են։ Բայց այս իշխանության գոյության միակ ձևը մնացել է սուտ  իդեաները։ Մենք մինչև չասենք, որ Ադրբեջանը խնդիր է  դրել Ղարաբաղը խեղդելով խեղդի Հայաստանը, հայկական պետությունը, մենք չենք փոխելու խնդիրը։

Ստացվում է մի վիճակ, որ մենք ազգովի բոլորս սպասում ենք աղետի։ Դա անորմալություն է՝ 21-րդ դարում մի ամբողջ ժողովուրդ սպասի, որ աղետը կգա»։

Վահե Հովհաննիսյանն ընդգծեց, որ պետությունները, ժողովուրդները ոչ թե պետք է սպասեն աղետի, այլ աղետը կասեցնեն։

«Ինձ համար այսօր  ընդդիմադիր գործիչը, ընդդիմադիր քաղաքացին այն քաղաքացին է, ով որոշում ունի կասեցնել աղետը, ոչ թե ձեռքերը ծալած սպասել»,- ասաց «Այլընտրանքային նախագծեր խմբի» համահիմնադիր, ԱԺ նախկին պատգամավոր Վահե Հովհաննիսյանը։

Նա նշեց, որ լայն հասարակությունը չի հասկանում, որ Ղարաբաղը խեղդելուց հետո շատ արագ «էկոակտիվստներին» կփոխարինեն փախստական ակտիվիստները , որոնք կգան և կպահանջեն,  իրենց պատկերացմամբ, Արևմտյան Ադրբեջանում իրենց տները, հետո մի 6000 փախստական կարող է մի օր էլ փակի  Հայաստանի ներպետական ճանապարհները, պահանջեն ութ գյուղ։

«Պետության փլուզումը կարող է շատ սրընթաց լինել։ Ղարաբաղում այսօր իսկապես 120 հազար մարդ կենաց ու մահու պայքար է տալիս ոչ թե ձեթի համար, այդ մարդիկ փորձում են լուծել  հայկականության, հայկական աշխարհի հարցը»,- ասաց Վահե Հովհաննիսյանը։

Նա նշեց, որ իր համար սահմռկեցուցիչ է, որ Ղարաբաղն այս վիճակում է, մեր ֆինանսատնտեսական էլիտարները կարող են մեծ քեֆերի մասնակցեն մերձավոր արևելքներում, ամերիկաներում, հանրային մեծ անուն ունեցող մարդիկ կարող են հանգիստ տեղափոխվել ավելի ապահով երկրներ։ 

«Ունենք էլիտա, որը փախնում է վտանգից, ունեցել ենք նախագահ, ով փախել է  վտանգից։ Հիմա էլ ունենք նախագահ, որը սիրում է  երաժշտական գործիք նվագել ու չի խոսում իր ժողովրդի հետ։ Մենք ապրում ենք չպետության պայմաններում»,- ասաց Վ. Հովհաննիսյանը։ 

Մանրամասն՝ տեսանյութում։