Ձեր վստահելի աղբյուրը

Հունվարի 27-ին «Վրաստանի երիտասարդական միության» անդամները բողոքի ակցիա են իրականացրել Վրաստանի հանրային հեռարձակողի մոտ՝ իրենց դժգոհությունը հայտնելով Վրաստանում գործող հիմնական լրատվականների լռության դեմ:

Jnews-ը գրում է, որ դեռևս դեկտեմբերի 26-ին, «Րաֆֆի» ուսանողության միության անդամները Վրաստանում գործող 20 խոշոր լրատվամիջոցներին էին հանձնել Արցախի մասին պատմական գրքեր, ՄԱԿ-ի տասնյակ ներկայացուցիչների և այլ առաջատար երկրների պատասխաններն Ադրբեջանին, Վրաստանի հայ համայնքի բաց նամակը, որը պարունակում էր տեղեկատվություն Ադրբեջանի կողմից Արցախում 120 000 մարդկանց շրջափակման մասին։

Պիկետն անցկացվել է հանրային առաջին հեռուստաալիքի դիմաց, որն ունի նաև հայալեզու բաժին՝ Ռամիլիա Ալիևայի գլխավորությամբ: Պիկետի մասնակիցները իրենց հետ ունեցել են ցուցանակներ, որոնց վրա գրված էր Արցախի շրջափակման, սննդի և դեղորայքի պակասության և, իհարկե, հանրության լռության մասին:

«Րաֆֆի» ուսանողական միության վարչության նախագահ Վրեժ Հարությունյանը Jnews-ի հետ զրույցում նշել է. «Հույս ունենք, որ այսօրվա անցկացված պիկետը կազդի լրատվամիջոցների վրա և մնացածն արդեն ժամանակը ցույց կտա: Մենք ապագայում ևս ըստ անհրաժեշտության՝ անցկացնելու ենք տարբեր միջոցառումներ: Բողոքի գլխավոր պատճառն այն է, որ բացառությամբ մի քանի լրատվականների, երկրի հիմնական լրատվամիջոցները գերադասում են լռել և ոչ լիարժեք տեղեկության տրամադրել հանրությանը»:

Մի քանի օր առաջ հայ երիտասարդները Թբիլիսիի տարբեր կամուրջների վրա Արցախի շրջափակման վերաբերյալ պաստառներ են տեղադրել՝ հանրության ուշադրությունը գրավելու համար։